Pathau mikva saong taong abih gauk! Meng akaok thun tal ini, tỉnh Ninh Thuận hu labaih 300 urang njauk ruak pandiak tabiak drah, ralo jang 30 urang duk saong thun 2016 saong anak tal  meda hu rilo jang. Ái Nghiêm, urang vak di rayo sap ndom VN daok di ban raya HCM hu kadha vak brei thau ka bruk ini:

Anak bruk jit ruak pandiak tabiak drah rah tabiak rilo, gah y tế tỉnh Ninh Thuận pambuak saong dom gah chức năng, dom puk palei dalam tỉnh peih dom jalan ngak pacang cakak pandiak tabiak drah, dalam nan hu bhum urang Chăm. Piah  pacang cakak ruak tamuh jeng jit, bruk ngak siam abih urak ini di dom baoh sang lac patagok bruk pametai lăng quăng, bọ gậy. Meng hu khan brei thau ka makna saong jalan pacang cakak ruak pandiak tabiak drah, sang saai Từ Thị Oanh daok di palei Thành Tín, xã Phước Hải, huyện Ninh Phước,  tỉnh Ninh Thuận hu puh ramik, pahacih sang danaok, jah tak hareik harom likuk sang:       

“Dahlau daih, sang dahlak jeng hu urang njauk ruak pandiak tabiak drah. Palei kakei sinh hoạt hacih saat….”

Huyện Ninh Phước saong ban sit Phan Rang – Tháp Chàm lac sa dalam dua palei hu urang ruak pandiak tabiak drah ralo di abih dalam tỉnh Ninh Thuận. Kuhria meng akaok thun tal ini, huyện Ninh Phước hu 86 urang njauk ruak pandiak tabiak drah. Piah patakik menuac njauk ruak, pasak y tế huyện hu patagok dom jalan ngak piah pasang iek ruak saong pametai jamuok njom mbak ruak yau: patagok bruk tui iek urang ruak, langyah labik hu ruak, pruh jru pametai jamuok, pathau khan, pachreih bhap bini tame bruk pacang cakak jit ruak, tacei pato bhap bini thau lac ruak chip. Bác sĩ Lê Văn Trạch, akaok Khoa nhi, sang iek ruak Đa khoa huyện Ninh Phước, tỉnh Ninh Thuận brei thau:          

“Bruk hu dấu hiệu di ruak yau: urang glaih glar, pandiak glaong, bhap bini brei nao tal labik y tế……”

Piah pacang ruak pandiak tabiak drah njom mbak, gah y tế tỉnh Ninh Thuận daok kham merat peih ralo jalan ngak saong kakei bhap bini ngak siam bruk pacang cakak jit. Bác sĩ Nguyễn Nhị Linh, Giám đốc pasak Y tế dự phòng tỉnh Ninh Thuận brei thau:

“Jalan pacang cakak pandiak tabiak drah hu kein lagaih abih lac, kol dahlak daok brei dom urang jakar y tế cơ sở pambuak haong karja palei, xã, phường nao tal yaok baoh sang bhap bini, tacei pato mikva rao hacih, gum tuk… puh ramik hacih vir taom dar sang piah oh hu labik brei jamuok caih mebaoh”.

Urak ini di Ninh Thuận daok tame bilan hajan, kayua yau nan ye, ruak pandiak tabiak drah mbuan tamuh jeng jit, meyah oh hu jalan pacang cakak siam. Piah pacang cakak jit, langiu bruk kham merat di gah y tế, brei hu bruk ba tangin tame di bhap bini meng dom bruk ngak sit, yau oh caik ka jamuok kiak, puh ramik hacih sa-at sang danoak, labik daok, klak dom pandap caik ia oh daok pandar piah palahik jamuok, bọ gậy./.