Meng puac thun 2014 tal thun 2015, huyện Thuận Nam lac labik gaok kan kandah trak kayua pandiak bhang, mik va urang nong oh pala drak hu dalam 3 vụ gam. Đông xuân 2015 -2016 lac vụ ngak veik camereip di huyen ni hadei di sa tuk vak atah klak saoh mblang hamu.

Dalam tuk vak ni, sambo hajao di phun padai rah atah tapen jalan roya 1, ba mai sambo hadah bahrau bhum taneh thu lagu Thuận Nam. Ong Đạt Mân Ôn dok di palei Văn Lâm, xã Phước Nam tuk tabiak rivang hamu, mong 3 sào padai dok sraoh neran, ong gam bui sambai gam duh hatai kayua oh thau lac ia thủy lợi hu ginup pruh mbiah tal tuk abih vụ halei oh. Ong Đạt Mân Ôn, urang nong daok di xã Phước Nam, huyện Thuận Nam lac Labik ini caong hu ia, taeng sang hulin padai jiak sraoh song rilo mblang taneh karei karei, njauk lac padai di labik ni caong hu ia. Meyah oh hu ia, bhap bini di xã Phước Nam ni meda eik tra.

Ong Đạt Chung Vui, urang jakar ngak nong xã Phước Nam brei thau, urak ni, dalam xã hu labaih 100 ha padai dok sraoh neran. Rilo mik va urang nong mboh takai hamu daok takik ia, nan ye duh hatai. Min gah ngak nong xã daok hu jalan parabha ia, khik ginup ka bruk pala drak. Dalam dom harei tal, tui bruk parabha ia di Bilai thủy nông Thuận Nam, brei parabha ia dahlau ka xã Phước Nam meng danao Tân Giang. Yau nan ye, ia meda ginup ka mik va pala drak dalam vụ đông xuân ni.  

Di rilo mblang hamu dalam huyện Ninh Phước, urang nong jeng dok pataom tame bruk ba ia tame takai hamu. Vụ ni, saai Đổng Quang Vinh dok di ban sit Phước Dân ngak hu 4 sào padai. Hamu di saai jang yau rilo mblang hamu jiak nan dok tamuh siam. Padai tam hu labaih 10 harei paje . Mek ia di Binek Nha Trinh, ia di labik ni hu rilo.

Dahlau vụ đông xuân, gah ngak nong tỉnh Ninh Thuận hu kuhria tal bruk patak pataom ia pruh. Bruk patrun taneh phun pala brei hu rilo ia di labik atah krong ribong hu rilo palei dalam tỉnh kham merat peih ngak. Gah ngak nong tỉnh ni jeng hu panuac kakei urang nong tok ngak padai di dom labik hu ia piah klah khat lihik. Kayua yau nan ye, vụ đông xuân thun ni, tỉnh Ninh Thuận tok ngak labaih 20.400 ha, trun labaih 5.300 ha

Vụ đông xuân di Ninh Thuận meng bilan 12 thun 2015 tal kreih bilan 4 thun 2016. Tỉnh ni kham merat khik ginup ia pruh ka abih vụ. Ong Nguyễn Tin, Trưởng phòng ngak nong, Sở ngak nong song patagok palei pala tỉnh Ninh Thuận brei thau: Urak ni, ia di 20 danao hu 74 triệu khối, samu 39% dung tích thiết kế. Nan lac sa dalam dom bruk bo khol hulin brei tui iek piah parabha ia ka siam lagaih

Piah pacang pandiak bhang dalam tukvak anak tal, hadei di tuk tamat vụ đông xuân, iek tui ia hu pabak di dom danao song ia meng sang mac thủy điện Đa Nhim, Gah ngak nong tỉnh Ninh Thuận meda ba tabiak bruk pala drak bilan hè thu ka nyu lagaih song bruk pruh ia di dom danao, dom binek. Dom puk palei dalam tỉnh daok salih janih phun pala, patakik taneh ngak padai, salih tapa pala thun pandar takik ia. Lingiu di nan, brei pataom tame bruk tam drak di dom labik ginup ia pruh hadei di tuk parabha ginup ia pandar ka bhap bini, ginup ia menyum ka athur rong dalam thun 2016 ni./.