Abih tih tapon athur raong di Ninh Thuận urak ni hu labaih 254.000 drei, dalam nan hu rilo di abih lac pabo 92.000 drei, limo labaih 89.000 drei. Pandap mbang meng lingik tasik song phụ phẩm ngak nong yaok thun labaih 675 ribau tấn, pabak jaik 35% bruk rong glang. Dok veik, dom trang trại, dom boh sang raong glang eng drei pala hareik piah pabak pandap mbang. 2 thun jiak di ni, anak bruk kan kandah di langik tasik song pandiak bhang dui atah, bruk ba athur rong mai jiak sang, rong glang tui jalan meteh palao, pambuak saong raong palimek, hu mong lac jalan ngak bahrau ba mai kein laba ka urang rong. Ong Lê Quyết Thắng, Phó akaok UB bhap bini xã Nhị Hà, huyện Thuận Nam brei thau:

Salih tapa rong tui jalan limek di sang ye nyu ba mai dom kein laba ka mik va yau patak patom hu pren ngak, iek glang limo tui njauk ilamu, pasang iek hu hu ruak kik, tui iek hu bruk patagok, ka dua tra limo takik nao mai ye nyu praong samar jang. Bruk khol drei bhian brei mbang nyu praong biak samar, dong ka mik va patagok KT boh sang.

Tuk vak 2015 -2020, tỉnh Ninh Thuận thau lac brei rami rami bruk rong glang, patagok tui jalan trang trại, raong công nghiệp, meteh công nghiệp, paglaong chất lượng tapon athur pabak ka bruk chế biến, khik hacih saat pandap mbang. Dalam 2 thun 2015, 2016 padang bhum pala hareik prong 315 ha,, pambuak pagam song bhum rong athur hu takê, yaok thun hareik hu 56.700 tấn. Tuk vak 2017 -2020 Ninh Thuận hu labaih 1.930 ha mblang hareik pabak ka bruk rong athur hu takê, tui nan tapon limo hu 55.000 drei, tapon pabe 35.000 drei, tapon pabe 60.000 drei. Patagok bhum rong glang pambuak pagam song mblang hareik hu labaih 65% tong abih tapon athur rong hu take.  Ong Phan Quang Thựu- Phó akaok Sở ngak nong song patagok palei pala Ninh Thuận lac:

 Bruk khik caga tapon athur lac bruk biak prong, gah ngak nong song puk palei pathau khan jak ba tacei pato bhap bini pala hareik gam song pandap mbang ka tapon athur. Ni lac bruk prong hu makna siam. Meng bloh gam song bruk dong ba di karja ye bhap bini thau pala hareik piah pabak pandap mbang ka tapon athur rong, ni lac sa jalan ngak biak siam.         

Sa dalam dom jalan bo Ninh Thuận dok peih tabiak lac ngak brei paglaong ilamu, iek glang tui jalan var ro gam song bruk chế biến, duah labik pablei tabiak lac kadha praong piah paglong quy mô song chất lượng tapon athur rong ka puk palei dalam tuk vak anak tal.

Meng bruk pambak tame dom pren khang, dom kein lagaih song jalan salih khang di gah rong glang meda dong ngak brei tagok jien mek tame ka bhap bini, rik dong ka bruk patagok KT di tỉnh Ninh Thuận. Min, piah ngak hu bruk paglong quy mô song chất lượng tapon athur rong dalam tuk vak 2015- 2020, brei hu bruk kham merat di bhap bini song jalan ba tabiak njauk di gah ngak nong palei pala./.