Pathau mikva saong taong abih gauk!

Tukvak tapa, dom gah chức năng di Ninh Thuận hu jhul khang bruk xử lý tội phạm pandar chất nổ piah cap mek kaya ikan, min jeng daok hu rilo urang ngak ikan daok pandar chất nổ piah taong cap kaya ikan, ngak palai pajoa  môi trường, jhak khang tal nguồn lợi kaya ikan saong ngak srau kadau di tasik. Kadha vak di urang pambuak bruk Hoài Hương-Văn Cảnh brei thau ka bruk nan:

 Tukvak jaik di ini, gah Công an, Biên phòng Ninh Thuận cap mek hu rilo bruk pajeng ba thuốc nổ suan adat, dalam nan, hu pandar rilo ka bruk taong cap kaya ikan. Yau ye dalam bilan 9 meng bloh, gah Công an huyện Thuận Nam hu mboh Nguyễn Văn Thâm, ndih tapui thun 1953, daok di khu phố 2, phường Tấn Tài, ban sit Phan Rang – Tháp Chàm daok pajeng suan adat 36kg thuốc nổ. Tapa duah thau, Công an huyện Thuận Nam duah mboh saong cap mek 530 kg thuốc nổ  NT-13, NT-14. Thâm saong 4 urang karei khan lac blei dom thuốc nổ nan mai pablei ka dom sang bhap bini daok di xã bhum tasik Cà Ná, huyện Thuận Nam. Trung úy Huỳnh Phúc Ân, urang pan akaok Trạm Kiểm soát Đồn Biên phòng Ninh Chữ - Ninh Thuận brei thau:

 “Bruk mikva urang taong ikan pandar suan adat vật liệu nổ piah cap mek kaya ikan jeng daok rah tabiak. Ngan saong dom urang ngak suan, njauk cap mek piah taong phat biak catang”

            Rilo urang taong ikan di xã Thanh Hải, huyện Ninh Hải brei thau, bruk taong cap kaya ikan meng chất nổ jeng daok rah tabiak rilo, abih di nyu nan lac di labik tapen tasik, ngak jhak tal raidiuk urang taong ikan saong ngak palai pajoa tài nguyên, môi trường tasik. Bruk taong cap kaya ikan meng chất nổ, xung điện oh ka pacang cakak hu abih, lac kayua bruk langyah oh ka khang, oh ka catang nan ye oh ngak ka urang huac. Dalam tuk nan, bruk blei dom vật liệu nổ di darak pasar piah taong cap kaya ikan lac biak mbuan. Ong Đàng Ngái, urang taong ikan daok di xã Thành Hải, huyện Ninh Hải, tỉnh Ninh Thuận lac:

 “Taong cap meng chất nổ di tỉnh Ninh Thuận lac rilo di abih. Urak ini sa baoh chất nổ taong trun nyu palai pajoa 12 met vuông, atau rilo jang, rạng san hô nyu khut abih, nan oh ka ndom tal bruk drei ikan, anek hadang nyu metai lihik abih”

          Piah pasiam veik bruk khik caga tài nguyên tasik, gah chức năng tỉnh Ninh Thuận hu peih dom mbang tabung glaong pasang iek, pagui mek, xử phạt 240 mbang urang ngak suan, cap mek 3 bruk pajeng ba vật liệu nổ, mek veik 46 harak adat taong cap kaya ikan meng vây rút mùng, nộp tame kadung jien karja jaik 250 triệu đồng. Ngak tui jalan tacei di UB bhap bini tỉnh, Chi cục Thủy sản tỉnh daok peih bruk pasang iek, pagui mek, langyah catang dom bruk pandar chất nổ, chất độc, xung điện piah taong cap kaya ikan. Amuk Bùi Thị Anh Vân, Akaok hội Thủy sản tỉnh Ninh Thuận brei thau:

           “Jalan ngak suai livik piah pacang cakak bruk ini, kol drei brei hu jalan ngak siam jang, khang jang, njauk pacang cakak meng tuk bahrau tabiak gilai,. Meyah pandar dom janih nan angaok kapal, gilai piah tabiak tasik, njauk pacang cakak chip”

            Bruk taong cap kaya  ikan meng chất nổ oh lac ngak palai pajoa tài nguyên, môi trường tasik, bo daok ngak jhak tal rai diuk di yaok ribau baoh sang bhap bini daok di bhum tasik. Dom gah chức năng, dom puk palei dalam tinh Ninh Thuận njauk samar hu jalan ngak siam jang piah pacang cakak bruk ini, daong khik caga kaya ikan dalam ia./.