Ong Nguyễn Văn Mọi daok di xã Phước Thuận, huyện Ninh Phước nan lac sa dalam dom urang camereip di abih pala nho di xã saong hu tal 30 thun pambuak saong nho. Jeng hu tuk tagok, tuk trun, min ong khang hatai gam ngak gam bac megru ilamu kỹ thuật piah diuk hu meng phun nho. Tal urak ini, ong Nguyễn Văn Mọi hu sa trang trại ngak nho biak praong, pabak meng nho that tal dom pandap ngak meng nho ka drak pasar. Langiu sa ha meteh taneh pala nho an toàn tui tanut chuẩn VietGap, ong daok hu 10 ha bein nho vệ tinh. Angan “Nho Ba Mọi” hu labik dang di drak pasar saong trang trại nho di ong jeng labik du lịch, labik ruah duah di dom urang ilamu. Ong hu ba bruk ngak tani tanat ka yaok pluh urang ngak dalam palei, tacei pato ilamu saong  daong pablei nho ka dom urang nông karei:

Băng: “Bruk an toàn urang iek biak praong. Kayua yau nan ye, yaom lac kan kandah min dahlak sahneng lac jalan nao urak ini nan lac VietGap. Saong tuk ngak tui VietGap ye bruk cambaih laih di abih nan lac bruk khang kajap di yaom pandap angaok drak pasar, oh hu bruk harei ini 2 đồng, harei page trun daok 5 cắc. Tuk ngak tui VietGap ye oh lac khik caga ka urang blei mbang  bo daok khik caga ka rup drei”.

Angan nho Ninh Thuận hu thau tal meng lavik mai, min gam gam hu dom tuk gaok kan kandah. Dom thun meng thun 1996 tal thun 1998, Ninh Thuận patagok khang phun nho ngan saong 2.400 ha saong hadei di nan taneh pala nho nyu trun khang. Tal thun 2009, dalam tỉnh tok daok labaih 550 ha nho. Urak ini Ninh Thuận hu 727 ha nho, năng suất hu 250 tạ sa ha, sản lượng 17 ribau tấn… Bruk trun tagok di phun nho nan mai meng năng suất saong chất lượng baoh nho nyu trun khang, bruk kurang pajaih, bruk lạm dụng jru khik caga phun pala, pandar khak drak oh njauk.

Kayua yau nan ye, piah patagok veik angan nho Ninh Thuận, tukvak tapa, Viện ruah duah kapah saong patagok ngak nông Nha Hố saong pasak pachreih patagok kinh tế xã hội Duyên Hải bhum kreih negar hu pataom tame ruah dauh ralo pajaih nho barau lagaih saong taneh pala. Urak ini Viện ruah dauh Nha Hố daok hu 131 pajaih nho dalam taneh ia saong blei meng negar langiu tame, palih ruah ngak jeng dom pajaih nho mbang that saong nho ngak alak piah pambak praong. Ong Phạm Văn Phước, giám đốc pasak tư vấn saong patagok công nghệ, viện ruah duah kapah saong patagok ngak nông Nha Hố lac:

Băng: “Dalam 131 pajaih nan daok hu ralo pajaih siam jang gac. Bloh hadei di nan drei palih ruah. Biak di nyu ini oh njauk lac dom pajaih lai bo daok lac doom pajaih nhân vô tính. Meyah hu palih ruah piah ngak ye dahlau di tuk công nhận pajaih, drei brei pambuak bruk saong dom gah hu thẩm quyền piah dut iek, khan brei mikva urang ngak nong thau saong brei pambak praong”.

Tui bruk qui hoạch patagok phun nho di Ninh Thuận, tal thun 2020, taneh pala nho di tỉnh nan lac 2.500 ha, sản lượng labaih 55 ribau tấn, năng suất labaih 270 tạ yaok ha. Dalam nan, tỉnh caik hatai peih praong taneh pala nho ngak alak tagok tal 20%, ba phun nho jeng phun pala praong dang akaok. Urak ini Ninh Thuận daok pataom tame peih praong taneh pala nho di dom bhum taneh glaong, dalam labik ia pruh Kênh Nam, Kênh Bắc, binek Lanh Ra, Tân Giang, kraong Biêu. Saong bilan 7 anak tal, tỉnh hu peih Festival nho saong alak Vang dunya Ninh Thuận, piah peih praong drak pasar, rik daong ka bruk duah jalan tabiak ka nho. Ông Châu Thăng Long, phó giám đốc sở ngak nông saong patagok palei pala Ninh thuận lac:

“Kol dahlak hu pasang iek dom labik taneh lagaih saong phun nho, sangka ruah duah pandar ilamu kỹ thuật, pajaih nho lagaih, salih barau qui trình kỹ thuật lagaih saong yaok janih taneh, pambuak saong danak dak palei pala barau piah đầu tư cơ sở hạ tâng. Pambuak pagam saong doanh nghiệp dalam bruk pablei saong caik hatai tal dom bhum nho an toàn, padang angan nho Ninh Thuận pambuak saong khik kajap chỉ dẫn địa lý hu công nhận bloh”

          Hu tapa bloh rilo mbang trun tagok, phun nho jeng daok brei mboh lac janih phun praong dang akaok, biak lagaih saong taneh riya di Ninh Thuận. Patagok khang kajap phun nho Ninh Thuận oh njauk lac patagok sa janih phun mbang baoh bo daok rik daong tame bruk yaih khan, patagok kinh tế, xã hội, du lịch di bhum taneh bak pandiak saong hangin ini./.