Tui jalan “pan tangin tacei bruk”, tal pato pala njam hacih saat hu peih tabiak di angaok mblang hamu xã Phước Ninh, huyện Thuận Nam, tỉnh Ninh Thuận song pachreih hu rilo urang kamei bangsa Cham mai pataom mbaok. Adei saai hu bac song peih ngak tapak di angaok taneh pala njam meng bruk ngak taneh, pa-ndih pajaih, pala drak, buh khak tal bruk thau lac hu halak halin, meng nan gam khik hu chất lượng njam gam patagok hu năng suất.

 Amuk Thiên Thị Kim Thu daok di xã Phước Ninh, huyện Thuận Nam brei thau: dahlau deih tuk oh ka hu tame tal pato pala njam hacih saat ni, sang muk pala tui jalan klak, buh khak ka rilo piah njam tamuh samar, hu halak ye blei jru mai pruh, tapa nan bein njam sang muk tamuh siam. Min muk oh thau lac pala yau ni meda ngak jhak ka pren yava urang mbang. Meng hu bac di tal bac ni, muk Thu meng thau lac, meyah ngak njauk jalan, meda patak patom hu rilo phun jien, takik hu halak halin, khik hu pren yava ka rup drei song ka urang mbang njam. Amuk Thu lac:

Tame tal bac pala njam ni drei mboh biak siam. Mek hu kein lagaih, hulin meda pala rilo jang, pableiduah jien tame sang.

          Tapa tal bac pala njam hữu cơ, dom urang kamei Cham dok hu pato bruk pametai halak halin oh pandar jru hóa chất, tok pandar meriak, lasun song liya…tui jalan ngak biak mbuan piah jeng sa janih jru pacang caga hu dom janih halak angaok njam patam. Tuk camereip dom urang bac mboh biak suh sah ka janih jru ngak eng ni. Min hadei di sa tuk vak ngak iek, urang mboh biak sahanang hatai kayua njam pala tamuh siam.

Pala njam tui jalan hữu cơ brei ka urang kamei Cham thau dom ilamu pala njam hacih saat, peih tabiak jalan ka mikva salih bahrau rai duik song patagok chất lượng njam patam pablei tabiak darak pasa.

Hadei di 3 bialn bac, gam song lý thuyết, dom urang bac hu thau dom jalan ngak, ilamu pala njam meng bruk ngak taneh, trun pajaih, buh khak, pacang caga dom janih ruak, iek glang,  paik njam. Hadei di tuk bac lý thuyết bloh, urang bac hu pala njam pak di palei. Tapa nan mboh lac, tong abih taneh pala njam ngak iek di mik va jeng tamuh siam. Ông Phan Thủy - Phó Phòng Lao động-Thương binh song Xã hội huyện Thuận Nam , tỉnh Ninh Thuận brei thau:

Phòng Lao động-Thương binh xã hội pambuak bruk song UB bhap bini xã Phước Ninh song labik pato bruk ngak di Ninh Phước peih sa tal pato ka urang kamei, abih di nyu nan lac urang kamei Cham di xã  Phước Ninh, tapa nan dong ka dom urang bac thau ilamu pala njam, patagok jien mek tame ka boh sang, ba bruk ngak pak di palei, saong patrun kan kathaot khang kajap gam song danak dak padang ngak palei pala bahrau. Anak tal khol hulin hu tham mưu ka UB huyện peih prong bruk ngak ni dalam huyện.

          Tuk dom tal pato pala njam hacih saat hu peih tabiak di dom puk palei, meda lac jalan daong ka urang kamei Cham Ninh Thuận pasiam bruk pala drak,  pamong tal bruk pabak njam hacih saat ka urang dalam palei  song dom bhum jaik taphia. Tapa nan dong duah bruk ngak pak di labik song patagok jien mek tame di angaok sa mblang taneh pala ka urang daok di bhum palei bhian njauk pandiak bhang, tua riya./.