Meng tỉ lệ thương tật lihik pren ngak 61%, min urang dahlau thiah ngak bol lin Võ Văn Vũ di xã Phước Diêm, huyện Thuận Nam, tỉnh Ninh Thuận tuk halei jeng paglaong hatai tự lực, tự cường, yam tagok kan kandah, thau ba alamu kỹ thuật tame ngak mbang, patagok kinh tế sang. Ông lac sa dalam dom urang nao dahlau hu Kapul urang dahlau thiah ngak bol lin VN pok meyaom lac “urang dahlau thiah ngak bol lin daong gauk patrun kathaot ngak kinh te naih joi” pakat negar. Kadha vak di urang pambuak bruk Huy Vũ-Văn Cảnh vak ka kreih camin thương binh ini:

        Labaih 11 thun ngak lin, thun 1993, ong Võ Văn Vũ xuất ngũ mai veik palei dalam tuk sang daok rilo kan kandah. Meng phẩm chất “Bộ đội cụ Hồ”, ông  duah jalan piah patagok kinh tế, paglaong jien mek tame ka sang. Padang mbang ngui meng phun jien mek hu tapa pablei salih dom pandap yau : ia mesin, ikan thu, urang dahlau thiah ngak bol lin Võ Văn Vũ hu buh jien tame ngak dua var raong pabui ralo tui mo hinh barau, oh mbau bruk, oh hu ia nerak tuh tabiak langiu, yaok var raong meng 200 – 300 drei; yaok thun  ông pablei meng 2 tal 3 mbang pabui ralo, kaoh bloh phun jien, ong daok laba hu jaik  200 triệu đồng. Ong Võ Văn Vũ lac: “Dahlak trun tagok meng meraong tabiak Brak, duah dom tapuk báo, tivi, yut that, tame pasram, ravang iek dom mo hinh meng Đồng Nai, Bình Dương, Sông Bé tabiak tal Ba Vì, Hà Nội, piah ptaom mek dom alamu nan piah mai patagok kinh tế sang ”

      Nao tagok meng kan kandah, yau nan ye urang dahlau thiah ngak bol lin  Võ Văn Vũ thau hu urang kathaot caong hu phun jien piah ngak yau habal, nan ye ông pabak brei dahlau anek pajaih, pandap mbang saong blei veik abih pabui raong ka labaih 20 sang kathaot, sang urang dahlau thiah ngak bol lin caong khin raong pabui. Hadei di tuk pablei pabui, ông mek veik phun jien, laba hadom, dom sang raong mek, nan ye rilo sang urang dahlau thiah ngak bol lin di puk palei hu tabiak truh kathoat. Ông Trịnh Á, sa sang raong glang hu ông Vũ daong khan lac : “Tapa bruk ngak di saai Vũ, 1 thun yau nan raong 100 drei pabui, sang dahlak meng nan jeng tani tanat, dahlak biak ndua dhar phuan saai Vũ”

       Taphia bruk daong dom sang kathaot patagok kinh te, ông daok ba bruk ngak ka dua urang ngak gam gam saong labaih 20 urang ngak thời vụ ngan saong yaom jien bilan meng 5 - 6 triệu đồng/sa bilan.

    Tari taring, kham merat,thau megru dom bruk barau piah ba tame ngak mbang hu kein laba, nan ye urang dahlau thiah ngak bol lin Võ Văn Vũ hu sang danaok praong, siam, dom urang anek hu nao bac da-a tal labik tal dhoa, gam rik daong ba brei bruk ngak ka urang ngak dalam palei. Ông Hồ Chí  Danh, akaok kapul urang dahlau thiah ngak bol lin xã Phước Diêm, huyện Thuận Nam brei thau: “Ông Võ Văn Vũ yaom lac  bệnh binh min ông kham merat abih drei, thau tự lực tự cường, ngak meda piah patagok kinh tế sang ”

      Bilan 10 thun bloh, ông hu pok meyaom di nyaom biai pakat negar Kapul urang dahlau thiah ngak bol lin Vn ka bruk “ urang dahlau thiah ngak bol lin daong gauk patrun kathaot, ngak kinh te naih joi tukvak 2011 – 2016.

Thúy Linh