Dom urang hu angan je hu bac megru paglong akaok sahneng di drei 

Atah di ni labaih 10 thun, xã Phước Thành, huyện Bác Ái, tỉnh Ninh Thuận lac labik takik hu sron mbon. Kayua dok jiak taphia tỉnh Khánh Hòa song hu jalan roya 27B nao tapa, nan ye rilo kol tội phạm pagam pambak tame labik ni piah nduac dauk song ngak dom bruk suan hukum. Piah patrun patakik dom bruk ngak suan hukum, pakat ủy, karja xã hu peih rilo jalan ngak samu gauk, dalam nan njauk ndom tal di abih lac bruk but pajaih eng drei khik ramik sron mbon puk palei, rik dong paglong hatai sahneng ngak tui hukum song patagok bruk caik hatai di bhap bini dalam palei tal khol tội phạm.

Sa dalam dom urang hu rik dong oh sit tame bruk ni lac ong  Chamaléa Tiến, urang hu angan je di palei  Ma Nai.Meng hu rilo ilamu dalam tukvak ngak bruk di palei saong abih hatung hatian ka bruk ngak, thun 2010, ong hu karja song bhap bini pok ngak akaok mban  jak ba padang talei but pajaih eng drei khik ramik  sron mbon puk palei.Ong hu jak ba but pajaih  Chamaléa hu  55 boh sang hu mbaok tame bruk ni.Ala bruk tacei pato di ong, dom urang hu angan dalam talei but pajaih kham merat pathau khan, brei thau dom adat hukum tal rilo mikva; kham merat jak ba dom boh sang hu anek ngak suan piah pato pakai; tong phạt dom bruk oh ngak tui adat palei, adat di but pajaih, hukum di karja saong samar tacei tabiak khol tội phạm. Tapa tuk vak peih ngak hu siam lagaih, dom but pajaih karei hu bac megru song njauk hatai ngak tui. Urak ni dalam xã Phước Thành (h.Bác Ái) hu  13 but pajaih ngak siam bruk ni.

Dalam dom thun tapa, labik dang di urang hu angan je dalam bhap bini bangsa takik biak prong dalam bruk khik ramik, patagok ilamu meng kan anak bruk mbuan si lahik nao, saong tah klaak dom adat cambat klak oh daok lagaih. Meng hu rilo ilamu dalam raidiuk song thau cambaih ka adat cambat tanarakun di mik va bangsa takik, urang hu angan je jeng dom urang ba akaoknao dahlau piah khik song ba ilamu tal bol bhap rahra, abih di nyu nan lac  rai ranaih umo.

Di palei Vụ Bổn, xã Phước Ninh (h.Thuận Nam),bhap bini hu ndom rilo tal ong Từ Công Xiêng abih hatai dalam bruk khik rimik ilamu Chăm Ahier. Yaok  tangi sua di mik va dalam bruk peih ngak adat jeng hu ong langyah song tacei pato cambaih laih. Dom yaom glaong siam mekre song makna di Katê hu ong kham merat pato veik ka anek taco, adei sa-ai song bhap  bini dalam palei.Ong dok hu jak ba bhpa bini padang boh sang haniem phol, diukrai tui ilamu bahrau dalam bruk likhah caga, ndam metai lahik, rija roya tapa dom mbang taom gaok ndom nyai nao mai dalam palei, dalam but pajaih,rik dong ngak siam bruk “Tong abih bhap bini jum pataom gauk dak padang rai duik ilamu”.

Atau ong Pi Năng Trách, daok di palei Ma Oai, xã Phước Thắng (huyện Bác Ái) tuk halei jeng suh sah ka bruk khik ramik alat ragam bangsa Raglai. Dalam rilo thun gam, ong song dom nghệ nhân dalam palei kham merat padang saong khik hu  3 kapul alat ragu bangsa, saong hu mbaok tame pato bruk main alat ragu  Mã La ka anek saih dom sang bac dalam huyện.

Muk Pi Năng Thị Thủy, Akaok mban bangsa  tỉnh brei thau:Urak ni,Ninh Thuận hu 124 urang hu angan je dalam bhap bini bangsa  Chăm,Raglai, K’Ho, Nùng...Anak meta mboh lac, dom urang hu angan je oh lac hu mong yau labik pambuak talei rohim di Đảng haong bhap bini, bo dom urang nan dok ba akaok menuac sia dalam puk palei khang hatai jia tui Đảng, karja.Nan lac dom menuac rik dong prong dalam bruk patagok kinh tế – xã hội,khik caga siam mekre salamad puk palei,padang ngak palei pala bahrau,khik ramik song patagok ilamu meng kan di bangsa./.

Urang lang: Hanipha- 17/12