Ngak pandap mbang brei ka urang daok karei 

“Langyah catang manuac urang oh ngak tui bruk brei daok karei saong oh taduan mek pandap panda, kaya mbang menyum di dom labik brei daok karei pataom sa labik”. Nan lac asal kadha dalam Harak pathau khan ka 122 ka kết luận di Thủ tướng Raja-ei Nguyễn Xuân Phúc di mbang nyaom Thường trực raja-ei ndom ka bruk pacang caga jit COVID-19 rah tabiak harei 23/3/2020. Thủ tướng pachreih bruk rik daong jien padai brei ka bruk pacang caga jit tapa Ủy ban Trung ương Mặt trận Negar Việt Nam.

Dahlau di nan, bruk srau dhau dalam bruk ba pandap ka urang daok brei daok karei, mboh rilo nan lac du học sinh meng negar langiu gilac veik  puk palei, hu rah tabiak di Ký túc xá Đại học Quốc gia TPHCM daok ngak ka bhap bani duh hatai. Yaok rituh urang jak gauk ba dom janih pandap panda kaya mbang yau: aia menyum, jru bổ, baoh kayau, gam haong rilo janih pandap panda prong karei yau: kadhik angin, phui, nệm, mbaik uak sang, tu la-ar… Bruk ngak nan daok ngak tamuh tabiak dom dịch vụ mbang tui yau pablei aia menyum, tapaok pandap ka nyu siam ... jeng hu mboh di labik ini. Oh lac tok ngak ka gah chức năng glaih glar bo bruk pataom gauk rilo manuac nan jeng lac jalan ba tal mbuan njaom mbak jit ruak.

Hadei di tuk hu harak brei thau di Thủ tướng, meng harei 24-3, pabah mnbang ký túc xá ĐH Quốc gia TPHCM hu tauk harak brei thau “oh taduan mek pandap di gauk gar payua tame", rilo urang mai payua pandap panda yau kadhik, kaya mbang… oh hu nan ye njauk ba nao sang veik nan ka bruk pataom gauk rilo manuac urang hu patrun dut haong dahlau nan. Gah pabah mbang khu A peih prong di KTX khu A ĐHQG TP.HCM manuac urang payua pandap panda brei ka urang daok karei dalam nan tok daok dua klau urang.

Yau nan min, jabat chức năng jeng brei labaih 10 urang daok di pabah mbang piah pasang iek bruk payua pandap panda njauk hun saong pandap oh cang hu. Taphia di nan gah langiu jeng hu urang pandar loa piah pathau khan oh taduan mek pandap panda oh cang hu brei ka urang brei daok karei. Dom pandap panda hu gah chức năng taduan mek mboh rilo nan lac pandap panda njauk hu ka urang kamei, aia rao tangin, aia sara saong jru tavao.

Yaom lac hu harak brei thau oh taduan mek pandap panda min jeng hu rilo urang jeng daok dang langiu pandiak piah likau gah dân quân brei ba pandap mbang saong pandap panda karei ka manuac sang di drei daok dalam nan, min jeng oh hu thei taduan.

Tui amuk Nguyễn Thị Huỳnh Mai, Chánh Văn phòng Sở Y tế TP.HCM, urang brei tame daok karei meda hu ngak bruk khai báo y tế. Ngan haong dom urang hu pren yava oh siam atau hu dom janih ruak caong khin hu bruk mbang menyum karei, dom labik brei daok karei meda hu brei urang taduan mek jru, pandap mbang kayua manuac dalam sang ba tame yaok harei. Dom urang hu brei daok karei di ký túc xá ĐHQG TP.HCM jang yau di dom labik brei daok karei pataom sa labik jeng hu karja daong brei klau van mbang huak yaok harei ginup dinh dưỡng, chất lượng tui quy chuẩn.

Bác sĩ Nguyễn Thành Dũng, Akaok sang iek ruak dã chiến Củ Chi, TPHCM brei thau: langiu di van huak, urang brei daok karei daok hu rilo urang ngak pahla daong brei dom janih kaya mbang karei yau har, kẹo, sữa, aia yamen...

Tui ong Nguyễn Hoài Nam – phaok akaok Sở Y tế TP.HCM, dalam dom labik brei daok karei hu pabak ginup abih pandap mbang harei klau van, dom pandap panda bhian pandar brei ka urang brei daok karei. Dom baoh sang hu urang daok brei daok karei pataom sa labik juai duh hatai kayua thei jeng hu duh siam, mong iek y tế biak siam. Kayua yau nan ye, bruk payua pandap panda, kaya mbang tame dalam labik brei daok karei nan lac bruk oh caong khin. Ong Nam ndom lac: “manuac sia pataom gauk rilo di labik brei daok karei mbuan ba tal njaom mbak ruak. Meyah pandap mbang oh hu khử khuẩn, hu ba tame labik brei daok karei pataom sa labik ye biak nguy hiểm".

Dalam tuk rilo bác sĩ van rup drei ngak bruk harei melam mong iek ka urang ruak, rilo urang karei daok kham merat kuhria caga piah hu labik brei daok karei siam mekre saong rilo urang halar hatian nao tame puh ramik vệ sinh di dom labik brei daok karei…, ye dom bruk srau dhau rah tabiak anak labik brei daok karei di Đại học Quốc gia TPHCM daok ngak ka manuac sia duh hatai. Dom urang hu brei nao daok karei mboh rilo lac dom urang prong, hu bac megru pak negar langiu, nan ye bruk ba pandap yau nan mong mboh oh siam, oh gheih. Dalam tuk jit ruak mbuan si tamuh prong, dom urang ngak amaik ame juai tok thau saneng tal hasit anek bhik di drei, bo njauk saneng rilo jang tal bol bhap rah ra daok abih hatai kham merat rik daong pren yava piah pacang caga jit./.

Urang lang: Jasi - 28/3