Bruk urang likei sinh viên umo 18 thun, peih xe ôm công nghệ bahrau njauk urang pametai di quận Bắc Từ Liêm (Hà Nội), ngak ka menuac sia oh plaih di pandik harao, min ini oh lac bruk camereip rah tabiak pandik harao yau nan.

Ngan saong Mai Văn Hiệp (20 thun, palei di Đồng Tháp, daok di quận 7), peih xe ôm công nghệ lac bruk duah jien hadei di tuk bac. Tuk oh hu maong bac, atau hadei di tuk pakacah bloh, Hiệp kham merat peih tal 11 tuk melam meng mai phòng trọ. Hiệp khan: “Tagok ini bac abih rilo jien ndo, nan ye dahlak kham merat peih radaih duah jien, daong ka amaik ame trun naong trak jang piah kuhria ka 2 adei di dahlak daok bac pakat 3 di palei. Bilan halei peih hu rilo, hu labaih jien hasit ye payua nao palei daong amaik ame”.

  Urak ini nan lac urang daok ranaih, dalam nan hu rilo sinh viên, daok ba gauk tame peih xe ôm công nghệ

Nduac tui bruk duah jien samar meng xe ôm công nghệ, dom ayut daok ranaih peih xe ôm tuk daok lac sinh viên saong bac tamat bloh jeng daok ngak bruk ini. Văn Sang (24 thun, palei di Bình Phước, daok di quận Tân Bình) suak yava praong lac: “Bahrau bac tamat, jien bilan ngak iek oh ginup cai, peih xe ôm yau nan bo hu jien rilo jang. Ngak di công ty oh ka tal 4 bilan, dahlak likau padeih. Yaok bilan payua hu hasit daong ka amaik ame. Harei hadei oh ka thau yau habar, min anak meta ginup cai lac hu paje”.

Ruah jalan duah jien meng bruk jao pandap mbang tapa phone tangin, hu jien cai thêm saong hu jien tuk nao palei, Lê Thanh Lễ umo 25 thun, palei Tiền Giang, daok di quận 12 khan lac: “Dahlak daok sraiy sa môn, nan ye bac tamat hadei dom ayut 1 thun, dalam tukvak nan jeng kham merat peih radaih jao pandap mbang piah duah thêm jien cai. Yaom lac sang kuhria hu ka dahlak saong urang adei daok caga tame đại học, min umo labaih 20 thun paje, khin nao me-in atau ngak hagait jeng brei likau jien amaik ame ye ngại lo. Jao pandap mbang duah hu jien rilo jien jang peih xe ôm, min bruk halei jeng hu patuah saong oh patuah”.

Tuk kol dahlak tangi sua ka bruk oh patuah meda gaok njauk, Mai Văn Hiệp lac: “Iek angaok mạng mboh 1 sinh viên di Hà Nội njauk urang pametai blah mek radaih, jeng biak huac. Min urak ini khin duah jien samar, abih takik tukvak saong phun jien ye tok peih radaih xe ôm công nghệ. Ame dahlak bahrau ieu phone kakei, oh brei peih tapa maong 8 melam saong oh pajeng menuac di kreh jalan, nan oh padeih nao piah ame kuhria. Min oh klaoh hatai ngak yau nan, nan ye dahlak saong dom ayut tok likau haong po langik palaih brei dom bruk oh patuah, saong kakei rup drei eng lac brei paglaong hatai sangka…”.

Bruk sinh viên ngak thêm, atau sinh viên peih xe ôm công nghệ tuk halei jeng ngak ka kol drei mboh drut drui gam hasit mbuah kan, kayua dom sahneng kuhria duah jien daok biak meda, bo klaak tapa dom nguy hiểm, dom bruk kanjah jhak meda daok jaik taphia drei. Min biak tatuak dreiye hu dom ayut karei, jeng khin nao ngak thêm, min oh thau piah ngak hagait. Meda lac kayua urak ini, dom áp lực vô hình ngak ka rilo ayut daok ranaih mboh glaih glar, yau bruk sahneng lac drei oh samu urang karei, atau sahneng lac drei umo 18 thun ye brei thau duah jien raong rup, gaok mai daok tabiak daok karei yau dom urang daok ranaih umo di taneh ia lingiu… 

Rilo panuac ndom angaok mạng xã hội, ndom ka bruk sinh viên peih radaih xe ôm công nghệ, yaom lac vô tình atau hữu ý jeng ngak ka menuac urang mboh suh sah. Meta maong ka sinh viên daok rilo khắt khe, huak lisei 2.000 đồng jeng njauk urang biai, oh ngak thêm jeng hu menuac lac alah oh khin ngak bruk, bloh duah jien meng peih radaih xe ôm jeng hu panuac chỉ trích… Sa-ai Ánh Hồng, 1 chuyên gia tư vấn tâm lý, ndom lac: “Rilo menuac yau var nao bruk thau hu saong klah rabha ka dom ayut daok ranaih lac sinh viên, lac umo njauk hu bruk tacei jalan saong cảm thông jang tuk halei karei, kayua ini lac dom takai yam camereip piah yam tame raidiuk, tame dunya kan kandah piah praong tagok jeng menuac jeng urang”. 

Sa-ai Nguyễn Khánh (Nguyễn Kevin, Yam ndok kinh doanh 1 angan je cà phê di TPHCM) kakei lac: “Tuk pilih ruah bruk ngak thêm njauk pataom tame dom bruk pambuak tal bruk bac megru di drei, piah hu rilo jang ilamu”. Thau ka bruk ngak ye harei hadei nao ngak bruk hu mbuan ba drei tame labik ngak bruk. Nan jeng lac jalan piah ka rup drei hu prein kham merat. Duah jien lac bruk siam, bruk njauk, min njauk sahneng kuhria tal kein laba suai lavik./.