TS Trần Hữu Minh daok pathau khan 

TS Trần Hữu Minh, Phaok Chánh Văn phòng Ủy ban An toàn giao thông negar, mboh lac, makna ba tal dom mbang bala biak triak nan, dahlau di abih lac kayua, dalam vaktu meng 23 tuk tal 6 tuk page lac tukvak anek manuac njauk padeih padei, kayua yau nan ye urang peih radaih bhian glaih glar saong teik vah. Jeng dalam tukvak ini, dom canah jalan jua lange ngak ka manuac sia nao jalan takik caik hatai sangka , urang peih radaih bhian ndik samar tapa tốc độ, tapa mbaok suan adat. Menyek gom hadah melam oh ka siam nan ye meta maong saong phản ứng di urang peih radaih jeng oh siam. Bruk pasang iek, langyah vi phạm dalam vaktu ini di gah chức năng jeng biak takik nan ye ngak ka urang peih radaih takik caik hatai sangka, meyah peih suan jeng oh njauk taong phat.

   TS Trần Hữu Minh ndom lac: “Adat ka vaktu ngak bruk di urang peih radaih, abih di nyu lac khik hu pren yava ka urang peih radaih tuk melam, urak ini jeng hu blaoh min oh ka catang”. Pagap yau adat ka vaktu ngak bruk gam gam di urang peih radaih urak ini, TS Trần Hữu Minh brei thau, adat ba tabiak lac 4 mon min tuk melam, urang peih radaih mboh biak glaih glar atau teik vah ye njauk brei adat ngak bruk katut panak jang. Hukum pajeng ba jalan mbak pasiam veik urak ini jeng daok ba caik kadha klak, peih radaih dalam 24 mon oh tapa 10 mon saong oh peih radaih gam gam tapa 4 mon, oh hu adat karei ka tukvak peih radaih tuk melam.

     Anak meta mboh lac, di dom taneh aia karei, dom jalan radaih nduac melam ye yaok dua tuk brei salih urang peih radaih. Bruk salih urang peih radaih tui labik, hu labik salih urang peih radaih di angaok radaih, hu labik salih urang peih radaih di labik padeih. Tuk radaih nao tal labik padeih ye urang peih radaih meng ndik tagok, urang peih radaih diah trun padei glaih. Yau nan, yaom lac jalan peih ngak karei di gauk min tanut dreh gauk nan lac dom urang peih radaih tok peih dua mon tuk melam blaoh salih ka urang karei peih.

   Tui TS Trần Hữu Minh, njauk tal tuk ngak catang dom adat hukum tuk nao mai pajeng ba dalam vaktu melam, dalam nan hu brei thau cambaih urang peih radaih njauk hu padeih padei saong hu menuac tui iek bruk ini. Meda peih ngak dom jalan ngak cambaih laih yau ini: padang adat hukum pakauk kateik greik gah vaktu di urang peih radaih, urang peih radaih njauk pabak hu ginup abih dom langyah ka dom kanjah jhak angaok jalan nao, tukvak njauk panduan salih urang peih radaih oh tapa dua mon, tốc độ nduac melam suai jang tốc độ ba tabiak 10km sa mon…Taphia di nan, njauk pabak dom ilamu peih radaih tuk melam tame dalam bruk pato pakai peih radaih, abih di nyu lac ngan haong urang peih radaih jalan atah. Langiu di nan, njauk pabak dom quy chuẩn angaok dom canah jalan hu brei nduac samar, pagap yau meng 60km tagok, brei hu jameng hadah angaok jalan piah daong ka urang peih radaih tuk malam.

    Sa jalan ngak praong karei tra nan lac patui bruk pagam rilo jang camera phạt la-ar ngan haong mật độ glaong angaok dom canah jalan piah patagok siam lagaih bruk pasang iek dom sruh radaih pajeng ba tuk melam. Taphai di nan, patagok bruk pasang iek angaok radaih hu talei bảo hiểm saong taong phạt bruk kak talei bảo hiểm angaok radaih pajeng tuai, kayua lac tui TS Trần Hữu Minh, meyah dom urang daok angaok  radaih kak talei an toàn ye manuac urang metai lahik dalam dom mbang bala angaok jalan mbak biak triak meda trun tal 70%./.

Urang lang: Jasi-23/7