Dah page ni 5/7, Nyaom biai mbang ka 3 Ban Chấp hành Trung ương Đảng mbang XIII peih tabiak dalam praong prang di ban ine Hà Nội. Tổng bí thư Nguyễn Phú Trọng dang akaok, brei panuac peih mbaok nyaom biai. Di nyaom biai, Ban Chấp hành Trung ương mbang XIII pataom tame roh duah, ginum biai, brei ngak dom bruk hu makna praong yau ye: jalan cak rok patagok kinh tế - xã hội tukvak 5 thun 2021 - 2025; pasang iek, patabiak adat ngak bruk di Ban Chấp hành Trung ương, Mintri Chính trị, Ban Bí thư saong adat ngak bruk di Ủy ban pasang iek Trung ương tukvak mbang XIII; Adat peih ngak điều lệ Đảng saong adat ka bruk pasang iek, tui iek, kỷ luật di Đảng tukvak mbang XIII. Ban Chấp hành Trung ương jeng meda pasang iek brei pabak dom angan urang par akaok dom jabat  kanja tukvak Quốc hội mbang XV piah ka Quốc hội pilih ruah atau brei ngak di mbang ginum biai mbang ka 1, Quốc hội mbang XV saong dom bruk hu makna praong karei. Di danak dak, nyaom biai ngak bruk tal harei 9-7.

Kuhria tal beir harei kabroi (4/7), huyện Sông Hinh, tỉnh Phú Yên hu  10 urang dương tính SARS-CoV-2. Dom urang njom bahrau jeng lac urang bangsa takik song hu brei dok karei blaoh di huyện. Tal urak ni, huyện Sông Hinh hu  22 urang dương tính SARS-CoV-2. Hadei di tuk mboh lac hu rilo urang dương tính hong SARS-CoV-2 di bhum bangsa takik, karja huyện Sông Hinh brei pacang veik  6 labik dok , samar peih dom jalan pacang caga jit Coid-19 pak di labik ni. Mban tacei jalan pacang caga jit Covid-19 tỉnh Phú Yên jeng brei patagok 8 urang meng dom kapul ngak bruk di  tỉnh jiak taphia mai daong ka  huyện Sông Hinh duah thau ka jalan njaom mbak, mek mẫu dut iek piah samar duah mboh.

Urak ni ban raya HCM hu labaih 14.392 urang daok karei pataom gauk, 36.300 urang daok karei di sang, labik daok. Bruk brei daok karei F1 di sang hu daong patrun patakik trak damak ka dom labik brei daok karei pataom gauk di ban raya HCM. Kayua dalam tuk dom urang njom tagok biak samar, dom urang F1 jeng tagok rilo ngak ka dom labik brei daok karei di ban raya tapa truh prein.Tui tacei pato di mintri Y tế payua ka ban raya HCM harei 27/6, F1 di ban raya HCM hu brei daok karei di sang 28 harei mayah hu bilik daok karei, sir, atah haong menuac dalam sang. Urang daok karei oh tabiak truk bilik, oh taom gaok urang di dalam sang saong anek athur raong. F1 tuk hlei jeng peih ứng dụng pathau khan y tế yaok harei, dut uek rup pabhap ka drei, tui iek prein yava … Nan ye, ban raya HCM meda peih ngak iek bruk brei ka F1 daok karei di sang tuijalan lac 14-14" (nan lac 14 harei daok karei pataom gauk, 14 harei daok karei di sang).

Bình Phước urak ni hu 5 bilai pasang iek pacang caga jit  Covid-19 di dom jalan tame tabiak,  min, bahrau ini, gah chức năng mboh hu rilo urang plaih nyaik, oh dut iek gah y tế, nao tapa dom jalan sit, lô cao su piah tame tỉnh, patagok bruk mbuan njom mbak jit dalam bhap bini. UBND tỉnh Bình Phước bahrau tacei pato Công an tỉnh pambuak bruk song gah  chức năng duah thau piah padang pabak  3 bilai pasang iek  angaok jalan ĐT 751 (huyện Chơn Thành), ĐT 741 (huyện Đồng Phú) song jalan roya 14 (huyện Bù Đăng), pasang iek radaih pajeng tuai nao mai dom tỉnh song radaih pajeng pandap panda hu nao tapa tỉnh; meyah mboh urang halei ngak suan bruk pacang caga jit Covid-19 njauk langyah catang tui hukum. Tuk vak peih tabiak ngak meng mon  sa  kreh melam  5-7-2021.

Tỉnh Bà Rịa – Vũng Tàu bahrau pathau khan samar drah ieu kakei taong abih menuac tame tỉnh ni, (dalam nan hu gam menuac daok di Bà Rịa-Vũng Tàu) njauk hu harak dut iek mboh âm tính haong SARS-CoV-2 oh tapa 5 harei kuhria meng di tuk dut iek. Bruk nan, lac piah pasang iek catang bruk pacang caga jit, oh caik ka jit ruak njom pambak dalam rahra. Tukvak ba tabiak ngak tui meng mon 12 harei 5/7. Dahlau di nan, tỉnh ni tok ieu kakei dom urang peih radaih meng bhum hu jit tame Bà Rịa-Vũng Tàu brei hu harak lac hu dut iek mboh âm tính SARS-CoV-2. Urak ni tỉnh Bà Rịa - Vũng Tàu hu padang 6 bilai pasang iek, pathau khan y tế di 3 jalan roya lac 51, 55 saong 56.

Menuac sia Mỹ hu taduan raok  Quốc khánh mbang ka 245 hong rilo bruk hu peih ngak di grauk labik dalam negar yau cuh phao bingu, diễu hành, dom bruk main sambai di gah langui. Yaom lac Mỹ dok dang akaok dunya  ka urang njom song metai kayua Covid-19, jit ruak daok pasang iek hu di negar ni tuk dom urang njom bahrau, tame sang iek ruak song metai trun biak rilo dalam tuk vak tapa. Kuhria tal urak ini, 58% urang prong di Mỹ hu klauk jru ginup  song jiak  67% urang Mỹ prong hu klauk takik di abih  1 mbang  vaccine Covid-19, jiak samu 70% tanut boTổng thống Joe Biden batabiak ka tuk vak dahlau di harei Quốc khánh.

Tui pasak Virus lâm sàng di đại học Chulalongkorn, Thái Lan brei thau, biến thể Delta lac makna ngak brei 70% dom urang njom Covid-19 bahrau di Bangkok. Roh duah di pasak virus kuhria mboh dahlau lac, ngan haong dom manuac njom ruak daok tagok biak samar saong rilo urang njom bo oh mboh hagait, meda lac dom urang njom di Bangkok meda tagok samar dalam tukvak anak tal. Dom chuyên gia y tế di negar ni jeng brei thau hệ thống y tế daok yam tapa prein saong meda pajaleih di tuk halei jeng hu dalam tuk prein dut iek jeng tal tabung.

  Sa mbang patuh khang hu mboh di Tasik Caspi harei kabroi, dom pathau khan camereip mboh lac, bruk nan meda pagam tal sa  giàn khoan jiak di nan. Min, Công ty xăng menyek karja Cộng hòa Azerbaijan dalam sa panuac ndom lac, oh hu bala halei rah tabiak angaok dom giàn khoan langiu tasik  song dom labik ngak cong ala bruk khik ramik di công ty quốc doanh ni. Dalam tuk makna di mbang patuh ka oh thau cambaih laih, Mintri Sinh thái Azerbaijan khan lac dok pasang iek ka bruk nan, song mboh lac mbang patuh meda mai meng sa bruk pruh ceik apui gluh baok./.

Urang lang: H.Pha & Thu Thảo - 5/7/2021