Mesup 7/10, di jabat Trung ương Đảng, ala bruk pal akaok di Tổng Bí thư Nguyễn Phú Trọng, nyaom biai mbang ka 4 Ban Chấp hành Trung ương Đảng khóa XIII hu ngak salah tong abih  asal kadha, danak dak ba tabiak, hadei di labaih 3 harei ngak bruk sami samar. Brei panuac tamat mbang nyaom, Tổng Bí thư Nguyễn Phú Trọng ndom lac, labik bahrau di Nyaom biai Trung ương 4 mbang ni lac hu peih prong bruk ngak, oh lac dalam bruk padang ngak, pasiam veik Đảng bo dok hu gam bruk padang jalan chính trị njauk tui jalan ngak di sarak mbang nyaom XIII di Đảng; gam song bruk pacang cakak, jhul kadun likuk ye njauk samar pacang caga, khang hatai mesruh pacang, langyah catang  bruk suy thoái jalan sahneng chính trị, đạo đức, jalan diukrai song dom bruk  tham nhũng, tiêu cực...Gam haong nan, pabak, ngak brei cambaih laih dom bruk suy thoái ka jalan  chính trị song đạo đức, bruk diukrai, "tự diễn biến", "tự chuyển hoá", "tiêu cực" gam song tuk vak bahrau.

Thủ tướng Phạm Minh Chính bahrau hu harak payua akaok UB bhap bini dom tỉnh, ban saong dom akaok  mintri, akaok jabat samu mintri ka bruk taduan raok rahra mai palei. Tui Thủ tướng, bruk rahra nao palei lac caong khin di rahra, oh hu hagait piah ndom, min meyah oh peih ngak siam bruk taduan raok, brei ka rahra eng drei nao meda ngak brei jit ruak mbuan njaom mbak. Kayua yau nan ye,  Thủ tướng ieu dom tỉnh, ban oh ka pasang iek hu abih jit ruak, kham merat jak ba rahra daok veik, pambuak haong bruk daong di karja, pasiam veik bruk ngak mbang, pablei salih siam mekre, salamat. Daok dom menuac caong khin nao palei, njauk padang angan khan brei palei thau saong peih bruk taduan, raok tal labik.

Salipan bilan bahrau brei mesraiy hu 19% phun jien đầu tư công meng phun jien mesraiy di negar langui - ODA, hu 9 dalam 13 Mintri likau bayar danak dak phun jien ngan song yaom phun jien abih tih trun jiak  9 ribau  tỷ đồng, hu  7 dalam 13 Mintri oh ka mesraiy hu phun jien ODA halei… Ni lac dom bruk njauk caik hatai sangka  hu batabiak di nyaom biai  ka bruk peih jien brei mesraiy phun jien  đầu tư công meng phun jien sre di  negar langui di rajaei dalam 9 bilan thun 2021 di dom mintri, dom gah  trung ương, kayua mintri jien ndo peih ngak mesup  7/10. Di nyaom biai, lambaok dom mintri, dom gah  Trung ương jeng ndom lac, kan kandah meng jit ruak  Covid-19 ngak ka dom danak dak jeng suai lavik dut song bruk batabiak. Mong mboh tal puac thun ni, oh ngak salah bruk mesraiy  95% tal 100% phun jien đầu tư công meng phun jien mesraiy di negar langui di rajaei.

Ong Phạm Đức Hải, Phaok mban tacei jalan pacang caga jit COVID-19 TP.HCM brei thau, hadei di 1 adit siam mekre bahrau, meda lac rahra samar ba drei tame diukrai lagaih, siam mekre, salamat. Kuhria tal harei 6/10, ban raya hu 19 quận, huyện saong ban Thủ Đức hu pok brei panuac lac pasang iek hu jit, daok veik quận Bình Tân haong huyện Bình Chánh oh ka hu pok brei panuac lac pasang iek hu jit. Dalam ban raya hu 972 dalam 1.412 doanh nghiệp daok ngak bruk, samu 68% saong hu 146.000 dalam 288.000 urang ngak bruk di dom labik chế xuất, labik ngak kong. Di labik Công nghệ glaong ban raya,  hu 27.300 dalam abih tih 50.000 urang ngak nao ngak bruk. 

Sở Lao động, Thương binh và Xã hội tỉnh Bình Thuận brei thau, kuhria tal  7/10, UBND tỉnh hu pasang iek, mbaoh tangin brei dong ka  5.718 urang ngak bruk  tự do tui sarak 68 di rajaei  ngan song yaom jien jiak 8,6 tỷ đồng dalam abih tih 16.427 harak hồ sơ likau daong bo tỉnh hu taduan.Dom harak hồ sơ dok veik dok ngak ka nyu ginup piah pok tagok pakat angaok pasang iek. Muk  Trần thị Thanh Nhàn, Phó Giám đốc Sở Lao động, Thương binh song  Xã hội tỉnh Bình Thuận brei thau dalam tuk peih ngak sarak 68 di rajaei, biak rilo urang ngak bruk  tự do hu rai duik kan kandah oh dok dalam angan hu dong brei. Nan ye, dom puk palei hu panuac likau  tỉnh pasang iek, samar pabak piah ka urang hu jalan yam tapa kan kandah kayua jit COVID-19.

Cty jru tavao Pfizer di Mỹ harei 7/10 hu ngak harak likau adat brei pandar samar drah vaccine pacang Covid-19 di drei ngak ka uranaih dalam umo meng 5 tal 11 thun.  Adat brei atau oh meda hu tabiak di puac bilan 10 atau dalam bilan 11. Uranaih takik gaok dom ruak trak hadei di tuk njauk Covid-19 min meng hu biến chủng Delta, jaik 30 rabau uranaih di Mỹ njauk tame sang iek ruak dalam bilan 8 meng blaoh.  Tal urak ini, bahrau hu vaccine di Pfizer hu adat brei pandar ka uraniah umo meng 12 tal 15 thun di Mỹ.

Jit ruak Covid-19 di Prang daok trun song rai duik dok hu siam mekre veik. Yaom lac yau nan, rajaei Prang jeng dok caik hatai tani tanat dalam bruk pacadu dom bruk y tế pacang caga.Dalam kham merat patagok menuac urang klauk jru pacang, meng di harei 15/10, Prang brei klaak dut iek Covid-19 brei saoh ka dom urang ka oh klauk vắc-xin atau oh hu tacei pato di bác sĩ. Urang cong khin dut iek brei bayar takik di abih  22 euro ka dut iek samar kháng nguyên song  44 euro ka dut iek sinh học phân tử PCR. Hadei di urang umo prong, Prang brei peih bruk klauk  vắc-xin patagok ka urang iek glang y tế hu klauk mbang ka 2 meng 6 bilan tagok. Min, bruk klauk, vắc-xin patagok lac  tui jalan halan hatain.

Mbang megei baoh taneh 6,1 độ Richter di tuk jaik mon 11 melam 7/10 ngak brei megei ban ine Tokyo di negar Japon, ngak ka rilo sang lahik điện saong dom jalan radaih nduac samar brei padeih nduac. Dom tàu điện ngầm, tàu điện haong radaih nduac samar di Tokyo nduac klaih klaoh, dalam tuk mblang kapal haok Haneda brei kreik pabah mbang dalam tukvak katut panak piah pasang iek bruk salamat di jalan kapal haok par trun tagok. Yaom lac megei baoh taneh bhian rah tabiak di negar Japon, min mbang megei baoh taneh khang yau harei 7/10 biak takik mboh di ban ine taneh ia ini./.

Urang lang: H.Pha & M.Phuong – 08/10/2021