Thủ tướng Nguyễn Xuân Phúc hu mbaok tame nyaom biai pakat glong pambuak bruk  Mekong-Lan Thương mbang ka 3, hu peih tabiak di harei  24/8 tui jalan online. Nyaom biai hu peih ngak  2 thun sa mbang song hu mbaok di urang pal akaok pakat glong  6 taneh ia lac Campuchia, Lào, Myanmar, Thái Lan, Việt Nam song Trung Quốc. Nyaom biai mbang ni kayua  Lào song Trung Quốc dang akaok ngan saong kadha “Patagok talei pambuak bruk piah hu kaya meda haong gauk ”. Tui kuhria urang pal akaok dom negar hu ginum biai ka bruk pambuak gauk gah y tế bhap bini patagok  jalan pacang caga jit ruak; pambuak bruk pasiam veik  patagok kinh tế hadei di jit  Covid-19; khik ramik song pandar khang kajap jalan ia krong  Mekong.

Mintri pato magru brei thau hu ngak bruk saong dom tỉnh, ban piah caga peih bruk pacacah tamat THPT mbang 2. Mintri pato magru daok pambuak catang saong Mintri Y tế, tui iek bruk jit ruak piah tal jaik harei pakacah ye hu jalan langyah khik kajap salamat, ngak njauk panuac kakei pacang caga jit. Tui kuhria, mbang pacacah tamat THPT thun 2020 mbang 2 meda rahtabiak meng harei 29 tal 31/8 di 27 tỉnh, ban saong hu 26 ribau urang pacacah hu mbaok tame. Bruk brei harak chứng nhận tamat tạm thời, biyar học bạ saong dom blah harak chứng nhận (bản chính) salah suai abih di harei 20/9.

Labaih  400 tỷ đồng lac phun jien buh tabiak padang ngak  tatua Hang Ngoài di TPHCM, tui kuhria hu peih tabiak di bilan 9, meda daong patrun bruk gar radeih  meng jalan Nguyễn Thái Sơn tal Phạm Văn Đồng, quận Gò Vấp. Mban khik ramik padang ngak dom danak dak  pajeng ba TPHCM brei thau, danak dak atah 650 m, hu 25 m mbaok tatua  song  625 m jalan ba tapa tatua. Mbaok tatua hu peih prong  tagok 22,5 m, prong jang 2 mbang mbaok tatua klaak, hu 4 jalan radeih peih. Kayua tatua hu padang gah mangaok jalan pasei Bắc - Nam yau nan ye bruk padang ngak brei khik hu siam mekre ka radeih peih angaok jalan song radeih pasei gah ala. Tui kuhria tatua hu ngak salah bloh hadei di  11 bilan padang ngak.

Sở ngak nong saong patagok palei pala tỉnh Bà Rịa-Vũng Tàu hu payua 10 mẫu ia, ikan metai di dom lồng bè di bhap bini xã Long Sơn, ban Vũng Tàu tabiak Hà Nội saong ban raya HCM piah dut iek, piah thau cambaih makna ikan metai rilo. UB bhap bini xã Long Sơn brei thau: kuhria tal bier harei kabroi (20/8), hu 19 baoh sang raong khan ka ikan metai, khat lahik jaik 10 tỷ đồng. Tui Sở ngak nong saong patagok palei pala tỉnh Bà Rịa-Vũng Tàu, bruk raong ikan lồng bè di dom kraong Chà Và, Rạng, Dinh, Mỏ Nhát… cak rok patagok meng thun 2007, rik tame bruk daong bhap bini patagok kinh tế. Min, yaok rituh baoh sang jak gauk palao raong ikan ngak ka rilo gah kraong patakik ia nduac, tachrauk nerak alam ia.

Halak halin ruak ngak ka năng suất karoic di dom sang bein  miền Tây njauk patrun  yau nan ye yaom tagok khang meng  5.000-6.000 đồng/sa kg. Di dom tỉnh Đồng Tháp, Hậu Giang, Bến Tre, An Giang yaom karoic xoàn, sành tagok  5.000-6.000 đồng yaok  kg dut song bilan dahlau song tagok labaih  20% dut song thun dahlau. Urang blei salih di Hậu Giang brei thau dok blei  karoic xoàn yaom meng  20.000-25.000 đồng sa kg, karoic sành 14.000-20.000 đồng/kg, ni lac yaom pablei glong abih dalam 3 thun tapa. Di dom drak pasa song cửa hàng di TPHCM, yaom karoic pablei rai dok tagok meng 35.000-70.000 đồng/sa kg tui janih. Yaom pablei glong min karoic mai pasa oh rilo.

  Nga meda peih bruk ngak iek vắc-xin caga Covid-19 biak rilo di adit anak tal saong meda hu sa jabat pasang iek di negar langiu tui iek. Vắc-xin caga Covid-19 hu angan Sputnik V, hu rajaei Nga brei ngak yau panuac brei thau lac salamat saong siam lagaih hadei 2 bilan ngak iek di manuac. Tui Viện Gamaleya, labik cak rok patagok vắc-xin Sputnik V, 40 ribau urang meda hu mbaok tame ngak iek di labaih 45 pasak y tế di dalam negar Nga. Dữ liệu hu payua tal gah Y tế dunya saong dom negar daok sahneng kuhria bruk hu mbaoh tame vaktu ngak iek, nan lac dom negar vương quốc A-rập thống nhất, Ấn Độ, Braxin, Philipin saong A-rập Xê-út.

Angaok blah Twitter d idrei, Akaok mintri Khí hậu Ba Lan Michal Kurtyka brei thau  ong dương tính song Covid-19, dok brei dok karei di sang . Langiu di nan, mbao Wprost di Ba Lan brei thau  Akaok mintri gah Cơ sở hạ tầng Năng lượng praong di Ba Lan, Ong Piotr Naimski jeng njom Covid-19, hu brei dok karei. 2 akaok mintri ni  2 adit dahlau hu mbaok tame sa mbang ginum biai di rajaei song dom kapul nyaom ngak dhang ka jalan rami ramik veik gah ngak cong di negar ni. Dom harei tapa, Ba Lan hu urang ruak Covid-19 tagok glong, taeng harei  20/8 hu jiak  770 urang jom bahrau, tagok urang njom labaih 59.300 urang  dalam nan hu  1.900 urang metai.

Bruk roh duah bahrau hu khan brei thau di mangaok Nature Communications mboh biak tatoak drei, tuk pasak Hải dương học negar Anh brei mboh lac dom nerak nhựa daok par di ala mbaok di Đại Tây Dương lac 17 - 47 triệu tấn, glaong jang dom nerak tuh tabiak tasik praong ni meng thun 1950. Tui kuhria, urak ni hu labaih 8 triệu tấn nerak tuh tabiak tasik Đại Tây Dương yaok thun, ba tal dom kan kandah ka oh thau dahlau ngan haong dom pandap mbang di dalam tasik, lac labik pabak pandap mbang saong ba jien tame ka yaok rituh triệu menuac di dunya./.

Urang lang: T.Thảo & H.Pha  22/8/2020