Mbang họp mbao pak di labik 

Nyaom roya pakat negar mbang 11 di Kapul Nhà báo Viet Nam, vaktu 2020 -2025 hu peih ngak di Ha Noi dalam 3 harei, meng harei 29 tal harei 31/12/2021. 553 urang lambaok ka labaih 27 ribau urang hoi hu mbaok tame. Tui jalan “Jum pataom - Kỷ cương - Salih birau - Hadah krah - Patagok”, Nyaom roya mbang 11hu makna biak dalam, tacei jalan ka dom pakat Kapol Nhà báo Viet Nam saong kapol dom urang vak mbao dalam negar patui bruk patagok ilamu siam gheih di bao chí CMVN, rik prein tame dak padang bruk ngak mbao chí CMVN chuyen nghiep, birau, pakhang jalan sahaneng mesruh pacang, bak hatai anit ranam.  

Mesup ini 29/12, di Hà Nội, Mintri ngak nong saong patagok palei pala peih nyaom biai online dalam negar b atabiak bruk ngak, jalan ngak ka thun 2022. Dalam tuk jit praong Covid 19 rah tabiak srau kadau, gah ngak nong saong patagok palei pala bahrau pabak padai brah, pandap mbang ka labaih 100 triệu bhap bini dalam taneh ia, gam duh ka bruk pablei tabiak negar langiu. Yaom patagok di gah ngak nong tagok jaik 2,9%; yaom jien mek tame meng pablei tabiak negar langiu dom kaya nong, kaya glai, kaya ikan jeng jeng mek hu tanut glaong bahrau, lac 48,6 tỷ đô la Mỹ; rilo chỉ tiêu patagok di gah ngak nong jeng ngak hu saong ngak tapa tanut hu Rajaei jao brei. Dom gah pandap lac: pala drak, kaya nong saong kaya glai daok lac dom labik hadah, rik daong praong tame jak jeng di gah ngak nong. Thun 2022, ngak ngak nong kham merat patagok meng 2,8 tal 2,9%; patagok yaom kaya nong, kaya glai, kaya ikan pablei tabiak negar langiu hu meng 2,9 tal 3,0%. 

Viet Nam hu urang camereip njom biến chủng Omicron. Cambaic laic, harei 19/12, Sang iek ruak Trung ương Quân đội 108 (Hà Nội) taduan tuai angan K.V.H.M. ndik kapal haok meng negar Anh mai Việt Nam dut iek samar mboh dương tính SARS-CoV-2. Ngan saong bruk dut iek ruak tuk mai meng Anh, harei 20/12, sang iek ruak  langyah gene, tapa nan mboh urang ruak njom bien chung Omicron. Urang ini hu brei daok karei, khik iek sumu chip.

Pambuak tal bruk metai di uraniah kumei angan N.T.V.A (umo 8 thun) daok di chung cư Sài Gòn Pearl, harei 28/12, gah CSĐT Công an quận Bình Thạnh, TP.HCM brei thau lac hu tabiak harak khởi tố vụ án, khởi tố bị can, cap mek kreik Nguyễn Võ Quỳnh Trang (umo 26 thun, palei daok di Gia Lai) ka duas ngak pap urang karei.Tapa duah thau, Công an quận Bình Thạnh mboh lac adei V.A. daok haong ame oajeng lac ong Th saong Trang (urang diuk jaik lakhah di oong Th) di chung cư saong njauk Trang taong paoh dalam vaktu suai lavik. Melam 22/12, adei V.A. hu ba tal sa sang iek ruak di quận Bình Thạnh cấp cứu min adei metai dahlau di tuk tal sang iek ruak. Mboh yau hu bruk hagait nan oh lagaih, sang iek ruak hu khan brei gah chức năng quận Bình Thạnh thau.  Tapa pasang iek tau, gah chức năng mboh angaok rup adei hu rilo labik jum jhul praong, hu laka klak di angaok mbaok. Meng nan, gah medil lac adei njauk taong paoh ba tal metai. 

Biar  harei kabroi, Jabat Cảnh sát điều tra Công an tỉnh Bình Dương pambuak saong Công an huyen Bàu Bàng chap mek urang blah gilang pariak di labik nini hadei 2 mong rah tabiak. Urang chap hu angan lac Trần Văn Hùng, 31 thun, sang daok di  xã Tân Hưng, huyện Bàu Bàng, tỉnh Bình Dương. Tui duah thau tuk camereip, 13 tuk 15 minit harei nan, Hùng peih radaih moto tame gilang pariak BIDV dhar di Bàu Bàng pandar pndap dreih phao saong pandap patuh piah kateik greik  urang ngak bruk di gilang meblah mek 450 trieu dong. Taduan panuac khan, dom gah nghiệp vụ Công an tỉnh Bình Dương, huyện Bàu Bàng peih bruk pasang iek, duah thau, chap mek  nyu di sang, mek dom pandap pambak tal piah langyah. Camereip, urang lac kayua cá độ caoh mbanh tavak sre  nan ye pandar phao, baoh patuh ja tame blah gilang.

Dom menuac metai kayua ia dauk ia sua saong hajan praong di bang Ba-hi-a negar Braxin tagok tal 20 menuac, hu 2 binek talah, ngak brei 62 rabau 800 menuac njauk panduan nao labik karei. Tui karja bang, takik di nyu 358 urang njauk rambus kayua ia sua khang di abih kuhria meng dahlau mai, ngak kan kandah tal 470 rabau menuac di 116 ban sit.  Ia dauk ia sua jeng ngak khut trak jalan mbak, rilo sang njauk ia sua ba seik. Kayua ia dauk ia sua, dom labik y tế njauk padeih ngak. Rilo jru tavao saong vắc-xin khut, lahik.  Hajan ia sua jeng ngak khut khat biak trak di Bô-li-via, meng hajan praong dui atah meng adit dahlau, ngak kan kandah tal takik di nyu 55 bhum palei saong labaih 8 rabau sang.

Harei kabroi 28/12, Mỹ, Pháp saong Anh hu urang birau njom Covid-19  dalam harei glong abih kuhria meng dahlau mai . Ta-eng negar Prang, urang njom Covid-19 tagok khang tal jaik 180 ribau mbang, glong abih di châu Âu. Rajaei Prang brei adat pablei rilo bộ dut iek ruak Covid-19 saong pabak parilo urang jakar khik iek, pacang bruk pataom rilo urang  di melam yam tapa thun birau 31/12 anak tal. Dom urang ilamu y te sahaneng lac, urang njom ruak di Prang tagok khang kayua dom bruk ngak uan raok Giang sinh meng blaoh jeng yau bruk jia tame bruk hu biak rilo menuac hu dut iek Covid-19. Mentri Pato megru Pháp brei thau, brei salih karei bruk pacang acga y te dalam sang bac memg harei 3/1 anak tal, brei anek saih dut iek ruak mboh am tinh 2 mbang tagok meyah ayut bac hoang gauk dương tinh haong Covid-19 meng brei tame sang bac. 

Biến thể Omicron daok pambak praong tal dom taneh ia châu Á, tui nan, hu rilo taneh ia Đông Nam Á harei kabroi brei thau lac hu dom urang njauk biến thể này. Bruk njaom mbak samar di biến thể Omicron meda ngak brei trak damak, tapa prein ngak bruk di gah y tế takik khang kadang dalam bhum. Urang jakar y tế dom taneh ia nan hu panuac kakei bhap bini dang atah di gauk, ngak njauk tui dom jalan pacang caga jit saong eng drei dut iek COVID-19 dahlau di tuk taom gaok gauk gar haong ayut sahabat di tuk uan thun bahrau jaik tal, piah khik caga rup drei saong plaih ngak ka jit ruak njaom mbak./.

Urang lang: Ái Nghiêm -Mousaphuong- 29/12