Hu labaih 1 578  urang lambaok ka 5,1 triệu urang Đảng dalam negar 

Nyaom roya pakat negar mbang ka XIII di Đảng hu tame bruk meng dah page ni (26/1) di Hà Nội. Peih tabiak meng harei 25/1-2/2/2021, nyaom roya XIII di Đảng hu jalan ngak lac “jum pataom - Dân chủ - adat hukum – Sahneng duah bahrau – cak rok patagok”. Hu 1.587 urang lambaok ka labaih 5,1 triệu urang đảng dalam negar mai pataom mbaok. Nyaom roya brei pilih ruah Ban Chấp hành Trung ương mbang XIII, tukvak 2021-2026 – lac jabat par akaok glaong abih di Đảng di dua mbang nyaom roya.

Melam 25/1, Mban peih ngak dom harei roya praong Ban raya HCM peih ngak Danak dak daoh tamia salam uan Nyaom roya Đảng Đảng pakat negar mbang ka XIII ngan saong kadha “Hadah hadai Đảng CSVN”. Dom urang nghệ sĩ hu parang me-in 12 kadha daoh tamia pok meyaom bruk tacei ba jalan njauk di Đảng dalam luac 91 thun tapa; pok meyaom Wa Ho praong uranam, uan taneh ia salih birau.

Đại học Huế hu peih parang iek rup cih jak ba salam uan nyaom roya mbang ka XIII di Đảng saong pahadar 91 thun padang Đảng Cộng sản Việt Nam. Parang iek hu yaih khan labaih 20 blah kayua sinh viên di sang bac cih tabiak ngan haong asal kadha brei thau ka bruk ba akaok, pato tacei padang Đảng, padang hệ thống chính trị, padang taneh ia. Tapa nan pathau khan tal urang jaka, urang đảng saong bhap bini thau hu ka makna, yaom glaong di bruk padang Đảng, padang hệ thống chính trị.Parang iek hu dui atah tal puac harei 3-2.

Chủ tịch Đảng Cộng sản Séc và Moravia, Vojtech Filip birau payua panuac tadhau ayuh tal Nyaom roya mbang 13 di Đảng Cộng sản Việt Nam. Ong brei mboh hatai iek praong saong taong yaom glaong ngan saong dom bruk ngak hu ralo di Đảng Cộng sản Việt Nam dalam dak padang taneh ia saong jhul khang hòa bình salamat dunya. Tui nan, caong khin talei rohim pambuak dua Đảng dak harei dak tagok jang.

Truyền thông dunya ba gauk brei thau ka nyaom roya mbang ka 13 (XIII) di Đảng cộng sản Việt Nam ngan haong hatai sangka, taong yaom biak glaong saong jia tame jalan ngak hu brei tapa di nyaom roya. Gah khau tin AP di Mỹ, mblah Nikkei di Nhật Bản... ndom lac mbang nyaom roya ni lac sa bruk chính trị hu makna biak praong di taneh ia hu jaik 100 triệu menuac, peih tabiak dalam tuk dom negar Đông Nam Á daok caong maong pagam pambak tame prein khang kinh te di drei tuk lac sa dalam dom taneh ia biak takik mek hu tanut patagok GDP 2,9% dalam thun 2020, meng hu bruk langyah saong pacang caga siam jit Covid-19.

UB bhap bini Ban raya HCM birau brei padang UB palih ruah urang ka Quốc hội mbang XV saong urang ka HĐ bhap bini Ban raya vaktu 2021-2026. UB palih ruah hu 21 urang, dalam nan hu muk Nguyễn Thị Lệ, Akok HĐ bhap bini Ban raya HCM hu brei ngak  Akok Ủy ban palih ruah. Uỷ ban palih ruah brei ngak bruk duh ka palih ruah urang Quốc hội hadei tuk Hội đồng palih ruah blaoh salah bruk pataom iek veik bruk palih ruah urang Quốc hội mbang XV saong palih ruah urang HĐ bhap bini dom pakat vaktu 2021-2026.

Bộ Chỉ huy Quân sự tỉnh Tiền Giang peih danak dak nao jak ba bhap bini pambuak  bruk peih “Tết quân dân” thun 2021. “Tết quân dân”  di Tiền Giang peih tabiak meng harei 25/01 tal 30/1/2021 hu jaik 250 kapul hu mbaok tame. Ni lac sa bruk ngak piah pambuak kajap talei rohim di bol lin haong rahra, daong bhum palei padang ngak saong paglaong dom asal kadha padang ngak palei pala bahrau, abih di nyu nan lac daong ka sang kan kandah, sang sarak kanja hu bui sambai mbang Tết.

Meng harei 30/3/2021, Gilang pariak sarak karja patui veik bruk peih brei jien mesre di Danak dak ka dom baoh sang kan kathaot, salih ka bruk brei jien mesre tal harei 31/12/2020 yau bruk ba tabiak di Sarak ka 28 thun 2015 di Thủ tướng Rajaei. Hadei 5 thun peih ngak danak dak brei mesre phun jien ka dom baoh sang birau tabiak truh kan kathaot, hu labaih 1 triệu 4 rituh ribau mabng baoh sang kathaot hu mesre di Gilang pariak sarak karja, kuhria tabiak hu jaik 62.000 tỷ đồng; dalam nan njauk brei ka dom baoh sang urang birau tabiak truh kathaot  bangsa takik, dom xã bhum atah bayah, bhum palei kan kandah hu mesre dahlau./.

Urang lang : Thu Thảo -Ái Nghiêm -26/1