Pacang cakak jit ruak corona 

Brei panuac di nyaom biai, Thứ trưởng mintri Y tế Nguyễn Trường Sơn brei thau, dut song 9,6% menuac metai di jit SARS dahlau daih, menuac metai kayua nCoV meblah labaih 2%. Thứ trưởng Nguyễn Trường Sơn kuhria mboh dahlau lac, dalam tuk vak anak tal urang ruak meda hu rilo jang. Pren yava di 8 urang dok iek ruak di dom cơ sở y tế jeng daok siam tagok. Piah pacang caga jit, gah Y tế hu pambuak bruk song gah bol bala, công an song dom mintri, dom gah, caga  dom trang thiết bị, pandap y tế song urang ngak di tanut glong, caga duh ka bruk pacang caga jit dalam tuk vak anak tal, tui njauk jalan tacei pato di Thủ tướng rajaei.

Thứ trưởng Nguyễn Trường Sơn jia lac: “Mintri Y tế meda ngak siam dom bruk dalam tuk vak anak tal, khik siam mekre ka bhap bini. Gah Y tế jia lac drei ngak hu siam bruk pasang iek saong iek dhit ruak ka dom urang njom ruak di  Việt Nam dalam tuk vak anak tal”.

Pambuak tal bruk njom mbak di nCoV, Thứ trưởng mintri Y tế Nguyễn Thanh Long ndom lac, tal urak ni oh ka hu roh duah ginup ka virus ni. Min, gah Y tế mboh lac nCoV dreih yau SARS, hu 4 jalan njom mbak: pambak tapa  không khí; taom gaok tapak meng urang siam song urang ruak; tapa labik njom  virus song taom gaok tapak khak di urang njom ruak. Kayua yau nan ye, bruk cuk khẩu trang tok lac sa jalan pacang caga jit ruak song oh ginup piah pacang ruak. Gah Y tế dunya hu panuac khan brei thau, jalan ngak camereip, siam di abih piah pacang ruak nan lac rao tangin meng sabon rilo mbang dalam harei. Meyah oh rao tangin rilo mbang dalam harei brei pandar ia jru pametai anek ruak, saong Thứ trưởng Nguyễn Thanh Long caong lac, bhap bini plaih taom gaok tapak menuac yau njom atau urang njom ruak, jhui nao tal labik hu rilo menuac. Abih di nyu nan lac, tuk patuk, dhung phal sre ia dhung  brei pacang cambuai meng tanyaik atau khan bloh klaak tame thung hareik. Cuk khẩu trang min brei cuk njauk meyah oh njauk mbuan si njom mbak. Gah Y tế hu panuac kakei, jhui duah blei  khẩu trang N95. Ni lac janih  khẩu trang pandar piah iek glang urang ruak  dalam dom cơ sở y tế”.

Pambuak tal bruk mehit lac urang ngak Trung Quốc mai veik Việt Nam ngak bruk song urang Việt Nam dok di Trung Quốc mai veik taneh ia meda tagok khang, Thượng tướng Trần Đơn, Thứ trưởng mintri  Quốc phòng brei thau, dahlau di nan, gah biên phòng brei padeih xuất nhập cảnh urang meng Trung Quốc tame Việt Nam di tong abih dom jalan nao mai. Ngan song dom pabah mbang negar, gah chức năng hu brei daok karei 14 harei tong abih urangmai meng bhum hu jit (abih di nyu nan lac  tỉnh Hồ Bắc, Trung Quốc). Ngan song urang mboh yau njauk ruak atau mai meng dom bhum jit dok veik  jeng hu brei daok karei di cơ sở y tế atau di labik cộng đồng. Pak ni, labik brei daok karei jeng hu ramik, caga.

Phó Thủ tướng ndom lac: “Ngan song dom urang brei daok karei di sang, dom cơ sở y tế, khol drei brei khang hatai kayua kein laba di bhap bini. Khol drei tui pang, pachreih ba min brei khang hatai kayua meyah caik ka anek ruak pambak tabiak gah langiu, taom gaok song rilo menuac ye mbuan si pambak praong”. Phó Thủ tướng jeng hu panuac ieu Mintri Y tế pasang iek, pacang, cakak jit pak di labik, abih di nyu lac labik hu menuac nao mai meng bhum jit Hồ Bắc, Trung Quốc; panduan ba jru, trang thiết bị cơ sở pandap panda piah pasang iek siam jit ruak.

Phó Thủ tướng ieu dom gah chức năng peih ngak catang chỉ thị di Thủ tướng, kakei bhap bini oh pataom gauk rilo di lễ hội; tacei dom puk palei peih bruk brei anek saih  padeih bac... Tacei tabiak bruk ngak di dom pakat ủy song karja dom pakat, Phó Thủ tướng caong dom pakat tacei pato ngak khang bruk pacang caga jit meng pakat tỉnh tal pakat huyện, pakat huyện trun xã.

Phó Thủ tướng ndom lac: “Dalam tuk vak anak tal, urang dalam mBan tacei jalan pakat negar pataom tame pasang iek di dom puk palei. Yaom lac hu peih ngak siam min khol drei oh chủ quan, khik kajap bruk lac hu atau oh ka hu urang njom ruak, dom puk palei njauk kuhria caga, oh iek lap bruk pacang caga jit ”./.

Urang lang: Hani Pha - 6/2