Daong ba urang buh rilo pren yava meng dom bruk ngak biak biai 

Hu mbaok dalam bruk mesruh biên giới Tây Nam thun 1979, ong Nguyễn Toàn Thắng, 64 thun daok di Quảng Ngãi lahik abih 2 gah takai, lac thương bệnh binh 1/4. Jaoh jo oh ngak ka ong duh hatai, tui jalan lac “thương binh jaoh jo min oh klaak saoh”, oh pagam pambak tame sarak, daok dua palak tangin khang kadang, ong Thắng duah jalan pasiam dom kan kandah. Meng hu bruk daong di karja palei, diuk pasang ong Thắng raong pabui, raong manuk, pala dom janih phun mbang baoh. Tuk sang hu labaih jien padai, ong hu daong ka rilo baoh sang kan kandah, yam tagok dalam rai diuk. ong Nguyễn Toàn Thắng khan lac: “Drei kham merat yam tagok daong ka baoh sang di drei, hadei di nan lac ka bol bhap rahra. Dahlak jeng hu daong biak rilo, urang kathaot ye rilo atau takik drei jeng kham merat daong”.

  Quảng Trị lac sa dalam dom tỉnh mek hu tanut ba tabiak lac oh daok baoh sang kathaot lac urang buh pren ka taneh ia, ong Hoàng Tuấn Anh, Phaok akaok Sở Lao động-Thương binh saong Xã hội Quảng Trị brei thau, langiu di jien daong yok bilan ka jaik 21 ribau urang buh pren ka taneh ia saong gauk gar di dom urang nan, tỉnh daok hu peih ngak rilo jalan jalan piah paglaong rai diuk ka urang buh  pren ka taneh ia. Abih di nyu lac, tỉnh pataom tame daong brei taneh pala drak, brei mesre phun jien, pato bruk ngak saong ba brei bruk ngak. Yau nan min, kadha njauk brei ngak dahlau abih, nan lac sang daok brei ka urang buh pren ka taneh ia. Tukvak tapa, tỉnh Quảng Trị pataom tame patau khan, jak ba, xã hội hóa rik daong jien padai brei ka urang buh rilo pren yava. Tal tuk vak ini, bruk daong sang ka urang buh rilo pren yava ka taneh ia hu ngak blaoh blai: “Urang buh  pren jaik abih lac prong thun. Khaol dahlak hu sarak jak ba, daong ka anek bhik baoh sang buh rilo pren yava, sangka tal bruk jao taneh, ba bruk ngak, pato bruk ngak ka anek kamuan urang buh prein ka taneh ia, daong sarak nao ngak bruk di negar langiu, pato bruk ngak”.

Yaom lac yau nan, tal tukvak ini dalam negar jeng daok labaih 1% baoh sang kathaot hu manuac urang daok dalam sarak karja, urang buh pren ka taneh ia dut haong abih tih baoh sang kathaot dalam negar. Cambaih laih, 2 tỉnh hu labaih 1.000 baoh sang buh pren ka taneh ia daok dalam baoh sang kathaot nan lac Nghệ An saong Quảng Bình. Ong Hồ Tấn Cảnh, Phaok akaok Sở Lao động-Thương binh saong Xã hội tỉnh Quảng Bình brei thau, hu rilo makna ngak ka baoh sang urang buh pren ka taneh ia daok kathaot lac dom urang pandik harao kayua njauk rambuis tuk nao mesruh metak, baoh sang lac urang bangsa takik, kayua adat cambat tanarakun di bhap bani nan ye bruk tabiak truh kathaot daok kan kandah… Taphia di nan jeng daok hu baoh sang buh pren ka taneh ia daok caong mong tame jien daong di karja. Ong Hồ Tấn Cảnh caong khin, njauk hu dom jalan pato tacei cambaih laih, ba tabiak sa jalan ngak dalam negar ka bruk taong yaom lac baoh sang kathaot dalam baoh sang sarak karja: “Ngan haong sang kathaot hu urang daok dalam sarak karja buh  pren ka taneh ia bo dom urang dalam baoh sang nan oh daok pren yava piah ngak bruk, langiu di peih ngak dom sarak patrun kathaot, tỉnh njauk daong ka dom baoh sang ini meng dom phun jien daong, jak ba dom kapul nyaom, manuac urang saong dom pren khang di bol bhap rah ra. Ngan haong dom baoh sang kathaot daok hu pren ngak bruk ye bruk pathau khan, jak ba, tacei pato, daong ba piah ka baoh sang khang hatai buh jien padai tame ngak mbang, nao duah bruk ngak, nao duah jalan piah taom gaok haong dom dịch vụ xã hội piah yam tagok tabiak truh kan kathaot…”

Ndom meyai haong urang vak di rayo sap ndom VN, ong Lê Tấn Dũng, Thứ trưởng Mentri Lao động-Thương binh saong Xã hội brei thau, Dự thảo Pháp lệnh daong ka urang buh pren ka cách mạng pasiam veik daok hu roh duah ngak pasiam piah pok tagok Ủy ban Thường vụ Quốc hội. Quy định bahrau langiu di bruk pamaong tal patagok kadung jien karja piah daong brei ka urang buh pren ka taneh ia, pagam haong jhul pakhang jak ba, parilo dom pren khang dalam rahra brei ka bruk ngak ini dalam tukvak anak tal, daong tabiak truh kathaot meda hu peih ngak tui jalan daong hu điều kiện yau dom sarak daong cak rok patagok bruk ngak tui dự án, jalan ngak, sarak mesre phun jien, sarak daong bac megru bruk ngak, ba brei bruk ngak ka dom  sang daok hu manuac urang ngak: “Dalam sarak ini hu rilo kadha bahrau, dalam nan khaol dahlak ba tabiak jalan ngak nan lac njauk paglaong rai diuk di urang buh rilo pren yava haong cách mạng tagok samu atau glaong jang tanut diuk rai di bhap bani labik urang buh rilo pren yava daok. Bruk ini njauk peih ngak suai lavik, khang kajap saong pataom tame pasiam veik sarak tui jalan pasiam veik dom kadha daok tavak tavaiy.”

Tukvak meng ini tal puac thun daok biak katut panak, piah mek hu tanut ba tabiak nan lac oh daok baoh sang kathaot lac urang buh  pren ka taneh ia jeng daok biak rilo bruk njauk ngak, kayua yau nan ye brei hu bruk kham merat, sahneng duah jalan ngak siam jang di dom tỉnh bal, tui njauk jalan tacei pato di urang pal akaok Đảng saong karja piah oh daok urang buh pren halei diuk rai ala tanut diuk rai kuhria rah tapa di manuac sia dalam negar gam haong nan lac bruk sa tangin haong gauk di taong abih bol bhap rah ra./.

     Urang lang: Jasi-27/7