Bruk khai ấn đền Trần hu peih tabiak haong adat pok gilau anak bàn thờ Trung thiên di đền Thiên Trường, hadei di nan lac adat raok kiệu ấn meng đền Cố Trạch (labik pok kakuh Anh hùng bangsa Trần Hưng Đạo) tapa đền Thiên Trường. Piah ramik pasiam veik, yam tal palahik bruk bik jien tagok kiệu ấn, thun ini, mBan peih bruk caik 16 camera an ninh di labik rah tabiak bruk khai ấn piah tui iek, duah mboh, kakei pahadar, langyah dom bruk oh siam, ngak suan asal di lễ hội. Dalam kapul raok kiệu ấn meng đền Cố Trạch tapa đền Thiên Trường, ong Trần Duyên Thái brei thau: 20 thun tapa, oh ka tuk halei bruk an ninh trật tự di Lễ Khai ấn Đền Trần hu siam yau thun ini: “Praong di abih lac bhap bini thau sahneng ka bruk lễ hội văn minh. Meriak gauk, glum jien thun ini takik jang biak rilo. Yau yaok thun kol dahlak raok kiệu nao tapa ye jien par, laik biak rilo. Thun ini oh hu bruk bik jien tagok kiệu ấn, oh daok bruk meriak gauk gaok kiệu, thun ini biak siam”.

Thun ini, mBan peih bruk jeng hu brei menuac rami ramik bàn thờ chip hadei di tuk salah bloh bruk khai ấn nan ye oh daok bruk nduac tame meblah mek lộc angaok bàn thờ. Dom salih bahrau di Lễ hội Khai ấn đền Trần, pamaong tal sa lễ hội văn minh jeng hu tuai damuai atah jaik mboh biak cambaih. Ini jeng lac sa dalam dom makna ngak ka yaok rabau bhap bini saong tuai damuai dang cang luac melam dalam mblang bein labik inem krung sajarah ilamu Đền Trần-Chùa Tháp piah tal 5h mesup meng hu taduan mek ấn. Hadei di ini, lac panuac di dom rang tuai nao Lễ Khai ấn di Hội đền Trần: “ Lễ hội thun ini biak siam. Bruk kuhria caga thun ini siam jang yaok thun,an ninh trật tự siam, menuac sia mai ini biak tapak hatai saong bui sambai”

- Hu mbaok tuk Khai ấn di Hội đền Trần. Thun ini dahlak mai ini mboh biak tatuak drei. Kayua menuac urang nao mai oh daok srau kadau. Akaok thun bahrau likau ka sang danaok, anek bhik saong bruk hit di drei.

- Nao lễ hội biak an ninh saong chreih chrai. Karja khik caga an ninh trật tự biak siam”

Bruk peih Lễ hội khai ấn akaok thun di đền Trần rik daong khik ramik, patagok yaom glaong inem krung ilamu, saong tapa nan piah pato pakai, brei thau ka sajarah, brei mboh ilamu “Menyum ia hadar halau”  di bangsa. Lingiu di bruk pathau khan ye labik dang di karja biak praong dalam bruk tacei ba, daong ka bhap bini klaak nao dom bhian randap oh siam dalam lễ hội. Amuk Phạm Thị Oanh, Phó Chủ tịch Thường trực Ủy ban bhap bini ban sit Nam Định, kaok mban peih ngak Lễ hội đền Trần brei thau: “Bruk peih ngak Lễ hội Khai ấn Đền Trần thun ini biak siam. Khik kajap an ninh trật tự, khik hu siam mekre bruk nao mai angaok jalan, pacang caga khuah patuh. Khik salamat ka dom kapul nyaom, menuac urang, tuai damuai tuk mai lễ hội. Dom bruk oh siam, oh lagaih dalam lễ hội oh daok mboh. Oh daok hu bruk meriak gauk, jhul gauk likau lộc ấn, atau mek lộc angaok dom bàn thờ, glum jien tagaok kiệu ấn”.

Mban peih bruk brei thau, daok brei ấn ka bhap bini saong tuai damuai di đền Trần dalam dom sang Giải Vũ meng malam 14 mbiah tal abih bilan 1 - saka ia bulan./.