Urang tagok drah bhian mboh gleih glar 

Dalam mbang tabung glong klauk vaccine di  ban raya HCM, rilo menuac njauk brei padeih klauk kayua darah tagok glong. Tui bác sĩ Nguyễn Hồ Vĩnh Phước, sang iek ruak  Bình Dân ban raya HCM, dom menuac nan meda lac kayua huac tuk mboh dom urang cuk ao blouse mbong patih. Bruk tagok darah yau nan tok rah tabiak di bilik iek ruak atau tuk gaok urang y tế, dok tagok darah biak lac darah glong rah tabiak di rilo tukvak dalam harei. Dalam dom menuac darah tagok glaong, hu labaih  15% tal 30% meda kayua huac tuk mboh ao blouse mbong patih. Sahneng lac bruk huac ini tapa samar drah, min bác sĩ Nguyễn Hồ Vĩnh Phước brei thau, dom urang njauk tagok darah tuk mboh ao blouse mbong patih jeng mbuan si njauk đột quỵ, nhồi máu cơ tim, suy tim atau dom ruak karei karei di boh hatai, abih di nyu nan lac dalam sa tuk vak suai lavik.

Tui yaok pataom, tagok darah di urang ranaih umo (lac ala 35 thun) lac ruak mboh hu rilo di urak ni, meng 5%-12% dom urang njauk ruak. Bruk darah tagok glong ngak kanyah jhak tal pren yava song bruk ngak. Rilo roh duah brei mboh lac, tagok darah di urang ranaih samar ba tal  vữa xơ động mạch song samar patagok dom ruak boh hatai  . 

Bác sĩ Phan Thị Như Ngọc, Khoa Nội tim mạch, sang iek ruak Đa khoa Xuyên Á brei thau, hu 70% urang tagok drah lac urang ranaih oh mboh hagait karei dalam rup song tok thau tuk nao pasang iek pren yava. Hu dom urang ruak tagok drah hu triệu chứng cambaih laih yau pandik akaok biak khang, boh hatai nduac samar, klik hijao, pacah ia hauk, laman lamuac 2 takai … Dom urang ni meda kayua ruak thận mạn tính, srau kadau nội tiết tố, menyum rilo alak, mbia... Langiu di nan, dom bruk ngak brei tagok darah di urang ranaih lac njuk pakao, limek labaih kilo, stress, takik nao mai pasram rup pabhap, mbang mbak rilo...

Piah pacang caga tagok darah, dom chuyen gia kakei lac, urang ranaih njauk patrun kilo meyah limek labaih kilo, mbang takik saradang, takik limek, mbang rilo ikan, hadang, ralow…song njam patam boh kraoh. Langui di nan, dalam yaok var mbang njauk mbang takik veik, min oh trun takik dom var mbang yaok harei. Tok brei mbang oh tapa  2-4g sara yaok harei. Njauk  mbang rilo njam patam, boh kayau piah pabak rilo chất khoáng, vitamin song chất xơ... Taphia di nan, urang ranaih brei pasram rup pabhap yaok harei, mbang, ndih njauk tukvak, plaih bruk duh hatai, padeih njuk pakao .. Meyah njauk nao iek ruak, urang ruak brei ngak tui panuac kakei di  bác sĩ, jhui eng drei padeih menyum  jru./.

Urang lang: Hanipha- 29/7