Sang ong Châu Ly lac sa dalam dom baoh sang urang Cam hadah krah di Ban raya HCM 

Ong Châu Ly, muk Amina palei daok di tỉnh An Giang. Thun 1987, dua ong muk ini jeng diuk jeng pasang blaoh mai padang mbang ngui di Quận 8, Ban raya HCM. Raidiuk kan kandah, min ong muk pachreih gauk kham ngak mbang, sangka raong pato dom anek jeng menuac. Ong Châu Ly sahaneng, raong pato anek bik oh lac taong meng hawei bo lac meng yaok panuac ndom, yaok bruk ngak siam di amaik ame brei ka anek mblah tui. Meng jalan pato yau nan, 4 urang anek di ong, muk jeng thau kham merat bac da-a saong salut mbut. Dom urang anek urak ini bac tamat đại học saong hu bruk ngak tani tanat. Taeng anek likei talauc daok ngak bruk di negar Indonesia. Bruk jak jeng di dom urang anek lac bruk bui sambai haniem phol di ong muk. Ong Châu Ly brei thau ka ilamu khik brei baoh sang hu haniem phol: “tui dalak, urang kumei brei thau khik siam talei rohim siam makre dalam sang…”

Ong Châu Ly saong amuk Amina tuk halei jeng ani ranam gauk, klah rabha ka gauk dom glaih glar jeng yau bingi sahanang piah pabak ka baoh sang hu haniem phol. Oh padeih di nan, ong muk ini daok kham merat ba drei tame dom bruk di palei, jak ba mikva puk paga khik ramiksiam mekre salamat, pacang bruk taong paoh gauk dalam sang, dak padang baoh sang ilamu…Thau sangka, daong urang karei saong ba akaok nao dahlau nan ye dalam khu phố thei jeng anit ranam diuk pasang ong muk Châu Ly. Muk Fatimah daok di Phường 2, Quận 8, Ban raya HCM brei thau: “ Dua diuk pasang ong ni siam hatai lo, halei ruak kik kan kandah ong muk jeng hu daong…”

Lac Chánh văn phòng Ban đại diện Bhap bini Islam Ban raya HCM, ong Châu Ly tuk halei jeng abih hatai saong bruk ngak  ka bhap bini. Ong Mach Dares Samael, Phó Ban đại diện Bhap bini Islam ban HCM ndom ka ong yau ini:  “Sang saai Châu Ly lac sang ngak mbang naih bo daok lac baoh sang haniem phul...”

Meng diukrai siam mekre, haniem phol saong thau sahaneng ka bhap bini, baoh sang ong Châu Ly saong muk Amina lac sa dalam dom baoh sang urang Cam hadah krah di Ban raya HCM hu mikva urang Cam Ban raya bac megru, ngak tui./.

Urang lang: Ái Nghiêm – 28/06/2020