Ong Hakim Sa-Mang yaom lac umo taha, pren takik min ong tuk halei jeng abih hatai ka jamaah. Tuk hu bruk hagait pambuak tal bruk bangsa di ban raya, ong jeng kham merat hu mbaok. Meng bruk bac megru duah thau dom sarak di Đảng, hukum di Karja, dom sarak ka bangsa, dom bruk “bhap bini jum pataom dak padang raidiuk ilamu di labik daok”, bruk “Jum pataom ka urang kathaot” kayua Ủy ban Mặt trận quận 6 ba tabiak, bruk jak ba “bac megru saong ngak tui jalan hadah krah siam mekre di Hồ Chí Minh”…atau bruk duah thau dom ilamu di dom bangsa yau: Kinh, Khmer, Hoa…ong jeng hu mbaok. Bruk njauk biai nan lac, ong Hakim Sa-Mang thau hu yaom glaong di bruk bac megru saong ngak tui jalan hadah krah di Hồ Chí Minh. Nan lac meng hatung hatian ka bhap bini, ndom gam haong ngak.

Oh lac ta-eng ong kham merat bac megru, paglaong akaok sahneng, ong daok jak ba dom urang hu angan je dalam bhap bini Cam hu mbaok tame bac megru saong ngak tui panuac Wa; brei thau jalan ngak di Đảng, sarak ka bhap bini bangsa takik tal yaok baoh sang; pambuak dom bruk jak ba, dom bruk pakacah gauk anit ranam taneh ia haong bruk peih ngak nhiệm vụ chính trị saong langyah dom kadha, dom bruk daok ngak suh sah puk palei. Meng hu yau nan, raidiuk di labaih 400 urang Cam daok di phường 7, quận 6 hu tani tanat, siam mekre, mikva kham merat hu mbaok tame dom bruk ngak pahla, jum pataom gauk, daong ba gauk yam tapa kan kandah, patrun kan kathaot. 

Ong Hakim Sa-Mang bhian caik rilo tukvak nao rivang saong jak ba mikva kham merat ngak mbang, patagok kinh tế baoh sang, diukrai “siam ka dunya, mekre ka agama”. Dom baoh sang kathaot, sang kan kandah, ong jak ba dom mạnh thường quân daong, atau ong dang tabiak biai brei ka mikva hu mesraiy jien ngak mbang. Yau ye sang amuk Halymah, sang sa-ai Rokiyah, sang sa-ai Maysamah……daok di phường 7, quận 6, meng hu ong dang tabiak biai, dom sang nan hu mesraiy yaok sang 10 triệu đồng meng Gilang pariak sarak karja quận piah pablei salih. Tal urak ini, dom baoh sang nan hu tani tanat raidiuk saong bayar hu bloh sraiy ka gilang pariak. Atau sang ong Doromang, sang sa-ai Fatymah……, lac dom sang kan kandah, taik tahak, tabung haluh, pandiak ye ia harei caroi tame, hajan ye pasah abih. Anit ka dom urang nan, ong nao biai haong dom mban ngành đoàn thể di phường 7 saong quận 6, daong ngak veik sang, daong ka urang tani tanat raidiuk.

Sa-ai Maysamah, sa baoh sang kan kathaot di phường 7, quận 6, hu ong dang tabiak biai haong Gilang pariak karja quận 6 brei mesraiy jien, biak drut drui thau dhar phor tuk ndom tal ong Hakim Sa-Mang.

Yaok harei tuk sambahyang, abih di nyu nan lac tuk sambahyang harei jumaat, ong jeng hu pablak tame dom kadha ka jalan sahneng, jalan diukrai hadah krah siam mekre di Hồ Chí Minh; dom sarak Đảng saong hukum di Karja ka tự do tín ngưỡng, saong dom bruk pambuak tal bangsa takik menuac, dalam nan hu urang bangsa Cam, tapa nan hu daong ka mikva thau cambaih jang saong dak jia tame Đảng, Wa Hồ.

        Ong Phạm Văn Phố - Phó Chủ tịch Ủy ban Mặt trận Negar Việt Nam quận 6, ban raya Hồ Chí Minh brei thau ka ong Hakim Sa-mang yau ini:

  “Dahlak mboh ong Hakim Sa-mang ndom nao gam haong ngak. Ong kham merat bac megru piah tacei veik ka bhap bini Cam thau bloh ngak tui. Ong tuk halei jeng sangka iek glang ka bhap bini drei hu siam di abih. Yau iek glang gah daong phun jien, daong pren, jum pataom gauk piah yam tagok, tabiak truh kan kathaot.”

Meng hatai anit ka bhap bini, tuk halei jeng chreih bui, rap ar menuac sia, tukvak tapa, ong Hakim Samang padang hu hatai jia, hatai anit ranam di mikva urang Cam. Ong daok lac talei pambuak dom bangsa adei sa-ai dalam quận 6 yau : Kinh, Hoa, Khmer…dak harei dak khang kajap, rik daong haong karja, mặt trận, kapul nyaom, dak padang quận 6 jeng labik jum pataom bangsa saong patrun kan kathaot khang kajap di ban raya Hồ Chí Minh./.