Labaih 12 thun dahalu, bhum taneh di gah Pai palei Chăm Lương Tri hu taneh pala drak praong min bhian klah tasaoh kayua oh hu ia pruh, bruk pala drak di bhap bini tok pagam pambak tame ia lingik. Jeng dreih yau nan, labaih 2,5 ha taneh pala drak di  sang ong Đạo Văn Nũng luac thun oh hu ia, oh pala drak hu, rai diuk sang ong gaok ralo kan kandah.

Meng hatai saneng: “khin daong urang dahlau abih brei daong drei’ saong harei harei mboh bhap bini dalam palei klak nao labik karei ngak pah atau tame glai am dhang, tak njuh, ong Nũng duh hatai saneng duah jalan saong khang hatai buh jien tabiak ngak hệ thống thủy lợi. Amuk Châu Thị Đỉnh diuk ong Đạo Văn Nũng brei thau:

 “Dahlau daih tuk ngak ye mikva ndom lac saai Nũng oh hu ilamu habar ngak hu. Hatai sahneng di ong biak gheih, bloh ong ngak. Kurang jien, dahlak njauk nao mesraiy di mikva piah ong ngak. Harei ini thủy lợi meng jak jeng”.

Yaom lac oh hu bac gah thủy lợi, min meng hatai kham merat salih barau rai diuk, diuk pasang ong Nũng hu tabiak jalan ngak, pasang iek, kuhri kuhria saong nyim urang kren ngak bản cih chi tiết công trình thủy lợi akaok meti di palei chăm Lương Tri. Hu peih ngak meng puac thun 2000, jaik sa thun glaih glar gam saong urang ngak di puk palei, diuk pasang ong Nũng rok hu 500m ribaong dalam 5m, rok saong lum labaih 3000m3 taneh patau, ngak jalan nding ngầm bê tong hu đường kính 40cm saong rok 7 bingun ly tâm halang gluh piah ba ia meng kênh bắc mai. Ong Đạo Văn Nũng, palei chăm Lương Tri, huyện Ninh Sơn, tỉnh Ninh Thuận lac:

 “Tuk camereip sang jeng kan kandah, jien oh hu min drei anit ka taneh di drei. Taneh hu bo oh hu ia, klak naongak mbang atah angaok ceik glai. Sang kol dahlak pasang iek, thiết kế ba tabiak dự án 2 thun meng ngak bloh saong ba kein laba ka sang drei, ka mikva dalam palei. Urak ini công trình biak siam yau hatai sahneng di drei tuk camereip”

Piah caga pasiam sự cố, ong Nũng brei ngak sa blai njuk ia glaong 7m, pandar hệ thống dua bình pambuak gauk hu 6 bingun pagam saong dom mac njuk D12 công suất 450m³ ia sa tuk,  sa harei njuk pruh meng 4 tal 5 ha. Ini hu iek lac công trình thủy lợi akaok meti di Lương Tri yaom 100 triệu đồng bo diuk pasang ong Nũng ieu pataom phun jien di gauk gar dalam sang saong phun jien di gilang pariak.

Yau Yuan lac  ‘đất không phụ công người”, tuk hu blai njuk ia công suất 450m³ ia sa tuk ba tame pandar , bhum taneh thu lagu kurang ia dahlau deih urak ini jeng hijao, mekre. Mbiah tal harei ini,  labaih 12 thun min blai njuk ia di sang ong Nũng jeng daok pandar siam, oh ka hu sự cố halei. Meng labaih 7 ha taneh pala drak caga hu ia, diuk pasang ong salih janih phun pala saong pala luân canh dom janih phun yau tangei, pakao, ratak naih… pambuak saong raong glang. Barau ini,  sang ong khang hatai  pala 3ha phun jru nam trinh nữ hoàng cung. Meng nan, yaok thun hadei di tuk kaoh bloh phun jien ngak, ong Nũng daok laba hu labaih 300 triệu đồng. Ong Đạo Văn Nũng, palei Chăm Lương Tri, huyện Ninh Sơn, Ninh Thuận brei thau: 

 “Eng  sang dahlak jeng pabak hu  bruk ngak. Caong khin nan jeng biak. Kol dahlak oh ngak ka eng sang drei bo duh ka mikva drei brei hu pandap mbang pandap mepiah, ngak yau habar samu bangsa karei dalam tỉnh”.

Oh lac ngak kaya ka sang drei, diuk pasang ong Nũng daok lac kreih camin ka hatai siam. Dom thun tapa, diuk pasang ong hu ba sang nao padang haong gilang pariak piah mesraiy dom pluh triệu đồng daong ka mikva dalam palei loh veik taneh saong daong yaok pluh baoh sang dalam palei meng bruk brei mesraiy pajaih, phun jien, pabak ia pruh… yaok thun diuk pasang ong daok ba bruk ngak ka yaok pluh urang ngak dalam palei. Saai Lương Phú Sơn daok di palei Chăm Lương Tri, huyện Ninh Sơn, tinh Ninh Thuận ndom ka ong Đạo Văn Nũng yau ini:

 “Biak di nyu phun jien mikva takik lo min hu ia pala njam patam ye hu jang. Công trình thủy lợi di ong Nũng jeng hu daong ka ralo mikva di labik ini”.

Meng hu công trình thủy lợi di ong Đạo văn Nũng bo ralo mikva daok di palei Chăm Lương Tri hu ia pruh, oh daok klak tasaoh taneh yau dahlau daih. Yaok thun, mikva hu luân canh dom janih phun pala kayua yau nan ye bo rai diuk di ralo baoh sang hu kaya meda jang duk saong dahlau daih.

Dom phun hijao daok tamuh tagok angaok bhum taneh thu pandiak Ninh Thuận. Nan lac dom jak jeng bo ong Đạo Văn Nũng, sa urang nông bangsa chăm ngak hu angaok taneh pandiak bhang  Lương Tri. Caong khin di ong Nũng lac pabak hu ia pruh ka 13ha taneh pala drak di độ glaong 12m urak ini oh ka hu ia pruh; taphia di nan ngak điện 3 pha duh ka bruk njuk pruh, Saong caong khin nan hu jeng biak tuk công trình thủy lợi di ong daok patagok hu kein lagaih, ba ia la-ar mai pruh ka dom bhum taneh meng lavik mai thu pandiak./.