Ong Điểu Đấy meng rilo thun ini mai hu bhap bini palei Tà Tê 1, xã Lộc Thành maong lac sa kreih camin hadah dalam bruk ngak kinh tế joi. Pambak tame siam lagaih di taneh riya lagaih haong rilo janih phun pala, ong saong sang di drei gam gam peih praong taneh pala tui jalan đa canh, pambuak haong pala phun công nghiệp, phun lương thực saong raong glang piah cakrok patagok kinh tế sang. Meng hatai takre bac megru, tari taring, sahneng duah, samar thau bruk caong hu dom janih kaya nong di darak pasa, nan ye  tal urak ini, sang ong hu ginup meda, hu jien raong anek mbang bac. Ong Điểu Đấy, daok di palei Tà Tê 1, xã Lộc Thành, huyện Lộc Ninh lac:“Urak ini meda lac kinh tế sang dahlak hu tani tanat, lac kathaot oh njauk min lac kaya meda jeng oh njauk, min drei hu jien padai piah raong anek bhik mbang bac ginup abih”.

Sa dalam dom kadha biak karei ba tal jak jeng dalam bruk ngak kinh tế di urang likei Stiêng ngak nong ini, lingiu di bruk tari taring, takre bac megru, lac hatai sahneng bahrau. Yaom lac raidiuk tani tanat, hu jien padai, hu drap ar min ong oh yaih khan, oh daok saoh mbang, bo tuk halei jeng sangka patagok kinh tế khang kajap, peih praong bruk pala drak. Ong Điểu Đấy brei thau: “Urang mboh  karei min sang dahlak oh sahneng lac yau nan, meyah hu jien, dahlak pataom blei taneh dahlau, bloh ka meng ngak sang atau blei radaih. Drei blei taneh piah peih praong pala drak, meng nan cakrok patagok jang bruk ngak mbang, duah jien”.

Jeng hu hatai sahneng yau nan bo tal harei ini, sang ong hu ngak pô  11 ha taneh pala drak, dalam nan hu  6 ha cao su, 2,5 ha pa-ok blait, jaik 2 ha amriak kalu saong 0,7 ha padai, brei jien mek tame tani tanat. Lingiu di bruk hu thau tal lac urang tuk halei jeng ba akaok nao dahlau dalam dom bruk pakacah gauk pala drak di palei, ong Điểu Đấy daok lac sa urang siam hatung hatain, hu hatai anit ka menuac urang. Pachreih tui bruk urang ngak nong daong gauk pala drak, rilo thun tapa, sang ong hu daong pajaih amriak kalu, phun jien ngak mbang ka dom sang kan kandah dalam bhum. Lingiu di nan, ong daok halan hatian brei taneh, rik daong harei ngak bruk saong jien padai piah ngak jalan ka bhap bini nao mai. Ong Lê Thế Ban, Chủ tịch kapul urang nong xã Lộc Thành, huyện Lộc Ninh brei thau: “Lac urang bangsa takik min sa-ai Điểu Đấy tuk halei jeng bac megru, duah thau piah cakrok patagok kinh tế sang. Yaok thun sa-ai Điểu Đấy hu daong biak rilo pajaih amriak kalu ka mikva pala piah cakrok patagok. Daok dom hội viên kan kandah ye sa-ai Điểu Đấy brei nyim jien oh mek laba piah mikva hu jien buh tame pala drak”.

Meng dom kham merat oh thau glaih glar piah cakrok patagok kinh tế sang, gam saong dom rik daong ka puk paga, thun 2017, ong Điểu Đấy hu Chủ tịch UBND tỉnh Bình Phước alin harak meyaom ka dom thành tích xuất sắc dalam bruk ngak mbang, pala drak, pablei salih naih joi, rik daong cakrok patagok kinh tế - xã hội di puk palei./.