Pathau mikva saong grauk ayut!

Ong Hán Văn Phát daok di palei Tân Đức, xã Phước Hữu, huyện Ninh Phước, tỉnh Ninh Thuận, meng hatai kham merat yam tabiak truh kan kathaot, ong khang hatai nao mesrei phun jien, hu mbaok tame tal pato pasram  di mblang hamu, nao rivang iek bac megru dom bruk ngak siam di dom tỉnh karei, patagok bruk raong glang, pala drak. Dalam kadha“Urang ngak hamu caong thau” harei ini, khol dahlak hu kadha vak khan ka bruk ngak kaya meda di ong Hán Văn Phát daok di xã Phước Hữu, huyện Ninh Phước, tỉnh Ninh Thuận. 

Ong buh jien tame ngak mbang, peih ngak tui rilo jalan, pambuak bruk mek katut raong atah. Hu phun jien daong brei mesre yaom laba lap di karja, ong blei taneh piah pala drak saong cak rok patagok bruk raong athur hu takaiy, lac janih athur hu rilo dalam palei. Meng nan bruk ngak mbang di sang ong dak harei dak tagok. Urak ini, sang ong hu jaik 27 hecta, dalam nan hu labaih 5 hecta hamu; 3 hecta pala njam patam; labaih 8 hecta phun pa-ok blait, kandiuk saong 10 hecta glai phun neem, me-om hijao taneh bilau piah hu halui ka athur raong. Langiu di nan, ong brei kuac rok pasiam veik 5 danao raong ikan ia taba saong raong 300 drei pabo. Piah pabak bruk pala drak di sang drei saong piah pah ka mikva, ong blei 1 mac li-ua saong 2 mac menyek D8 piah njuk pruh ia mbang pah…Jien mek tame di sang ong yaok thun hu labaih 400 triệu đồng, 3 urang anek bac tamat bloh Đại học saong hu bruk ngak tani tanat…

Piah pasiam bruk pandiak bhang tua riya bhian rah tabiak, ong pah urang caoh 2 baoh danao padang ia jaik 500 mét vuong; peih taneh bilau saong pasiam hu 2 hecta taneh ngak hamu caga hu ia. Langiu di nan, yaok bilan sang ong ba bruk ngak tani tanat ka 18 urang, jien mek tame meng 3 triệu tal 4 triệu đồng sa urang dalam sa bilan; daong ka 6 urang tabiak truh kan kathaot khang kajap./.