Tuk ndom tal bruk ngak mbang di drei, di palei, ong Krung Yuir khan lac: Dahlau deih drei saong mik va di labik ni oh thei thau phun cà phê nyu yau habar, bo daok mehit urang lac pala nyu abih rilo jien, phun pajaih chit, iek glang oh mbuan yau phun bei plom, phun padai. Hu mbang ong mehit urang taha dalam palei lac di palei Lệ Chí, Đắc Sơ Mây huyện Mang Yang urang pala ye, hu brei boh, pablei hu rilo jien, ong song dom urang tapa nan iek bloh likau dom phun anek mai pale iek dalam bein… Ong H’Yon, sa dalam dom urang gam song ong Yuir ba phun cà phê mai pala  ndom lac: Kayua ba phun bahrau mai pala oh likau adat palei bo khol hulin njauk taha palei phạt sa drei pabe. Dom boh sang khol hulin pataom jien veik blei pabe piah phạt…. pang tal ni thei jeng klao. Urak ni mik va di palei Klót thei jeng pala cà phề. Meng sa bhum taneh thu lagu, ngak padai sa thun sa mbang, kurang nak karang likuh, luac thun iek lipa, urak ni palei Klót hu labaih 40 ha phun cà phê, labaih 7 ha phun am riak kalu, meng nan rai duik di mik va dak harei dak salih bahrau, dalam 110 boh sang, dok 52 boh kan kathaot min, oh dok sang eik lipa. Taeng ong Krung Yuir, urak ni hu tal 1,5 ha taneh pala cà phê daok paik boh tal mbang ka 4.

Nao taom dar bein sang, yaom lac ong Krung Yuir brei thau, ni lac bein sang min tapa maong mboh oh lac yau nan saoh. Anak meta khol hulin, mblang taneh prong labaih 4 ha. Jiak 20 thun dahlau oh hu sa phun halei rong diuk hu anek menuac, ala plak tangin tari tarieng di ong song boh sang hu jeng trang trại khép kín song 1,5 ha cà phê, 200 got amriak kalu, sa danao ikan prong meteh ha, tapon limo hu 7 drei. Meng yaom jien mek hu, lingiu mbang cai, ong patak patom piah buh tame ka bruk ngak mbang bo dok padang hu boh sang prong yaom labaih 200 triệu đồng.

Bhian ngak du kích xã, bhian njauk khol khamang chap caik guk, hu akaok negar pok brei Huân chương Kháng chiến hạng nhất song dok ngak phaok akaok kapul urang dahlau deih ngak bol lin xã, min di palei Klót, ong Krung Yuir dok hu urang thau tal di abih lac urang tari taring, thau ngak mbang song abih di nyu nan lac bruk ong dong ka mik va thau song salih bahrau akaok sahaneng dalam bruk ngak mbang piah ba mai rai duik trei sil yau harei ni./.