Prong tagok dalam sa baoh sang ngak nong kathaot, ong Lâm Se tuk halei jeng saneng  tal bruk kham merat ngak mbang piah salih bahrau rai diuk. Umo 27 thun ong khin kamei blaoh hu dom sào hamu amaik ame dua gah brei. Dom thun akaok mereip nan lac tukvak patak pataom jien padai, blei taneh riya piah peih prong bruk pala drak. Hadei di sa tukvak kham merat oh thau glaih glar, ong hu dalam tangin 11ha taneh ngak padai saong patagok bruk ngak mbang kinh tế sang.  Rai dahlak kham merat ngak habar piah patagok hu bruk ngak piah raong rup drei saong baoh sang di drei. Kadua lac anek bhik di drei hu hamu piah ngak, hu sang danaok siam mekre piah daok. Ka klau tra lac ngak habar ba bruk ngak ka mikva jaik taphia, hu bruk ngak yaok harei.  

   Ong Lâm Se brei thau, dom thun jaik di ini, meng ngak padai cao sản, đặc sản, padai chất lượng glaong, nan ye yaok vụ ong laba hu labaih 300 triệu đồng. Jan van haong hamu taneh yau nan, min tuk mboh mô hình kinh tế halei kein laba, ong nao roh duah, bac megru piah ngak tui. 4 thun dahlau, tapa dom jalan truyền thông saong dom mbang nao rivang iek tapak mô hình raong limo ia tasau di dom puk palei dalam tỉnh, ong Lâm Se buh jien tabiak blei 2 drei limo la-oi mai raong. Lac urang nong tari tareng, nan ye tok hadei di 2 thun, tapol limo ia tasau di ong cakrok hu 7 drei ngan haong jien pablei sữa yaok bilan hu jaik 20 triệu đồng.

  Dom thun jaik di ini, mboh manuac urang blei pon ralo, dalam tuk nan mikva urang nong di tỉnh Sóc Trăng meng lavik mai bhian klaak pon langiu hamu atau pablei veik ka urang lingiu palei, nan ye ong blei jamriak máy móc mai pataom mek pon piah pablei. Ong Se ndom lac, pon pablei hu oh lac di tukvak ini bo harei hadei jeng daok pablei hu. 

Gam ngak dịch vụ cuốn pon ka urang nong gam duah blei pon piah pablei, ong Se kuhria mboh lac, meng 3 máy cuốn pon, yaok harei ong mek tame hu meng 1.500 – 2.000 cuộn pon, kaoh abih jien buh tame ngak, daok laba hu 20 triệu đồng.

Mboh hu bruk pandar jamriak dalam ngak nong daok lac jalan nao khang kajap saong hu gah ngak nong saong bhap bani jhul pakhang, ong Se blei 2 sruh mac li-ua ngak dịch vụ xới taneh saong bahrau ini lac mac yuak jal liên hợp. Dalam bilan yuak padai đông xuân ini, mac yuak jal liên hợp di ong yuak hu jaik 500 ha padai ka mikva dalam palei.

Meng dom dịch vụ ngak nong ini, taphia di jien mek tame, patagok bruk ngak mbang kinh tế, ngak meda ka baoh sang, ngan haong ong Se daok lac jalabn ba brei bruk ngak ka mikva dalam palei. Ong Se khan lac, dalam 3 thun jaik di ini, sang ong tuk halei jeng hu 10-15 urang ngak luac thun, ngan haong jien bilan meng 6-7 triệu đồng. Ong Lý Hồng Lộc, akaok kapul urang nong phường 5, bal sit Sóc Trăng taong yaom: Cei Se tuk halei jeng ba akaok nao dahlau dalam dom bruk bo Kapul urang nong ba tabiak, yau bruk raong limo ia tasau, raong limo sin. Urak ini cei nan salih tapa ngak bruk cuốn pon piah pablei, nyu ba mai kein laba biak glaong, cei Se jeng lac urang ba akaok nao dahlau di puk palei. Tapa bruk di cei Se daok pak phường 5, hu ralo mikva jaik taphia mai rivang iek bac megru. Taphia di bruk cakrok patagok kinh tế sang, cei daok hu ba bruk ngak ka ralo urang hu bruk ngak tani tanat.

Meng kham merat yam tagok dalam bruk cakrok patagok kinh tế, ong Lâm Se hu Trung ương saong tỉnh Sóc Trăng pok brei ralo harak meyaom. Abih di nyu nan lac, thun bloh, ong hu Thủ tướng Raja-ei pok brei harak meyaom kayua hu thành tích xuất sắc dalam bruk urang nong pakacah gauk ngak mbang pablei salih naih jioy, gul pataom daong ba gauk ngak meda saong patrun kathaot khang kajap. Ong jeng lac sa dalam 5 urang nong ngak mbang, pablei salih naih jioy di tỉnh Sóc Trăng hu tabiak Hà Nội hu mbaok dalam Nyaom biai ngak mbang pablei salih naih jioy pakat negar mbang ka V thun 2017. Ndom ka dom bruk daok kuhria ngak di anak tal, ong Lâm Se brei thau, daok tui bruk patagok dịch vụ ngak nong, pablei salih pon, padang ngak kho khik piah pon piah pablei ka dom tỉnh thành jaik taphia./.