Lac urang nông bangsa Khmer tapak tapaiy, bhian kurang anak, kurang likuk yau dom baoh sang karei, ong Lâm Văn Phấn biak thau ka dom urang oh patuah jamo, sang kan kathaot, urang kan kandah. Kayua yau nan ye, meng tuk ngak mbang hu labaih hasit hasrak, cadu jang dahlau, ong hu caik rilo pren yava ka bruk ngak pahala. Saai Thạch Hiền saong saai Lâm Thị É lac dua dalam biak ralo sang hu ong Phấn daong  hu khan brei kol dahlak thau:

Băng sap Khmer: “sang oh hu geng padang, mboh yau nan ong brei geng padang sang. Bloh ong daok brei jien, padai brah dua klau mbao. Mboh kan kathaot lo ong daong. Dahlak uan tabuani lo”.

Băng sap khmer: “Ong Phấn brei jien 200, 300 ribau đồng miat, ong ngak pahala lo. Mboh urang taha, urang kan kathaot, mboh nit ong daong. Ong daok brei yaok baoh sang sa mbao padai tra, brei ralo lo”.

Meng padai, brah bloh tal jien, geng padang sang saong ralo pandap karei tra, mboh thei kan kandah ong daong abih hatai. Thun bloh, tuk pala drak oh hu siam lagaih, ralo sang kan kathaot jeng kan kandah jang. Mboh yau nan, ong nao jak ba gauk gar but pajaih peih brei labaih 22 tấn padai tài nguyên yaom labaih 150 triệu đồng brei ka jaik 400 baoh sang daok di 6 palei dalam xã Tham Đôn. Ong Phấn lac:

Băng sap khmer: “Dahlak mboh sang dahalak kan kandah, min mboh mikva daok kan kandah jang nan ye khin klah rabha saong mikva, bruk hagait daong hu ye drei daong”.

Bruk klah rabha di ong hu daong ka ralo baoh sang yam tapa dom naong trak dalam tuk gaok kan kandah di abih. Ong Phấn bui sambai khan lac:

Băng sap khmer: “dahlak mboh bui sambai kayua bruk daong di dahlak hu kein lagaih. Yau mikva drei ruak kik drei daong jien ndo yaom lac oh ralo, mboh mikva thit ruak dahlak mboh biak bui sambai. Mboh mikva ngak mbang raong anek hu siam ye drei mboh sambai lo”.

Oh lac yau nan saoh, ong Lâm Văn Phấn daok biak kham merat saong buh rilo pren yava dalam bruk padang ngak palei pala barau di puk palei. Kuhria dalam dua thun tapa, ong jak ba urang ngak pahala, gauk gar, but pajaih  saong bhap bini dalam palei rik jien, rik pren padang ngak hu sa mbaik tatua palei pala saong sa jalan palei yaom labaih 60 triệu đồng. Dua bruk nan urak ini daok ba mai kein laba tuk daong ka bhap bini hu mbuan lagaih nao mai saong pajeng ba pandap panda. Abih di nyu nan lac dom adei sit, dom anek saih oh daok caluai gluh bok tuk hajan  atau thur mur tuk lingik pandiak yau dahlau diah. Langiu di nan, ong daok kuhria padang  pak palei di drei sa mbaik tatua bê tông  yaom jaik 30 triệu đồng. Nan lac oh ka ndom tal jaik 100 mbaik geng dok dalam palei hu ong rik daong dahlau nan. Ong Phấn lac:

Băng sap khmer: “Dom bruk praong ye karja ngak bloh ye, daok dom bruk sit daok dalam pren di dahlak ye dahlak kham merat ngak, piah daong ka mikva dalam palei patrun kan kandah”.

Meng hatai siam nan, gam rik jien rik pren padang phum sóc, palei pala, ong Lâm Văn Phấn hu bhap bini dalam palei iek praong saong ieu ong meng angan anit ranam lac “ong di dahlak”, “wa di dahlak” tuk ndom tal ong. Saai Lâm thị Ngọc Hiền brei thau:

Băng sap khmer: “Thau anek kamuan halei kan kandah, cei nan jeng daong taong abih, daong jien, daong padai. Bloh daok ngak tatua, ngak jalan tra. Cei nan ngak tatua piah ka mikva nao hamu ngak bein hu mbuan lagaih jang. Cei nan ngak pahla lo”.

Yaom lac thun ini umo labaih 60 thun, min ong Lâm Văn Phấn tuk halei jeng hu dalam rup darah ngak pahla, caong daong hu ralo jang ka dom urang oh patuah jamo kayua ong saneng lac, ba bui sambai ka urang nan lac ba bui sambai, hanem phon ka drei.

Băng sap khmer: “Dahlak daong ka urang meng hatai jai di drei, iek nan lac bruk bui sambai, dahlak daok daong mbiah tal tuk dahlak oh daok ngak truh tra”.

Biak njauk pok meyaom hatai ngak pahala di ong, diuk rai siam ka dunya mekre ka agama, abih hatai jai pamaong tal urang kan kathaot di ong Lâm Văn Phấn. Bruk ngak ini oh lac ba mai bui sambai ka urang kan kathaot bo daok rik daong oh lac sit ka bruk patruh eik patrun kathaot, an sinh xã hội saong padang ngak palei pala barau di xã Tham Đôn, huyện Mỹ Xuyên, tỉnh Sóc Trăng./.