Ong Lò Văn Uông daok di bản Cụ, xã Chiềng Ly, huyện Thuận Châu, tỉnh Sơn La hu ralo urang thau tal, kayua ong lac sa urang đảng sami samar, ba akaok nao dahlau, lac urang nong ngak mbang pablei salih naih jioy pakat huyện, pakat tỉnh. Meng labaih 3 héc ta taneh mbon bahrau peih, ngan haong jalan ngak mbang kinh tế trang trại, yaok thun ong Uông mek tame hu yaok rituh triệu đồng. Kadha vak di Thanh Thủy, daok pak bhum Tây Bắc.

Yam tapa umo 58 thun, min ong Lò Văn Uông daok di bản Cụ, xã Chiềng Ly, huyện Thuận Châu, tỉnh Sơn La jeng daok takre bruk ngak bein yau dom harei akaok mereip bahrau tabiak truh bol lin mai veik sang. Labaih pluh thun, ong Uông patagok kinh tế tui jalan pala drak, raong glang, kuac rok danao raong ikan. Meng jaik 3 héc ta taneh bahrau peih, ong Uông pala cà phê, phun mbang baoh, pala tangeiy, khoai sọ, ribung krem, takac danao raong ikan saong menuk ada.

Dom thun akaok mereip ngak trang trại, kayua oh ka hu ilamu pala drak, raong glang, nan ye phun pala bhian njauk halak mbang, suai praong, takik kein laba. Oh kadun likuk, ong Uông nao duah bac megru ilamu tapa sách báo, hu mbaok tame dom tal pato patham pachreih bruk ngak nong, pachreih bruk ngak ikan kayua huyện, xã peih tabiak. Thau hu ilamu pala drak, raong glang ong ba tame bruk ngak mbang pala drak, nan ye năng suất haong sản lượng phun pala, anek athur raong hu tagok glaong. Yaok thun sang ong mek tame hu jaik 15 tấn asar cà phê; labaih 10 tấn tangeiy; labaih 7 tấn baoh yau mơ, mận, pa-aok, panat.

Pambuak haong bruk pala drak, sang ong Uông daok patagok bruk raong glang anek athur, menuk ada saong kuac rok danao raong ikan, ngan haong yaok pluh drei athur saong tapol menuk ada labaih 200 drei. Jien laba meng bruk pala drak saong raong glang yaok thun sang ong mek tame hu labaih 200 triệu đồng, rai diuk oh padeih salih bahrau saong patagok. Ong Lò Văn Uông brei thau: “Ong lac bí thư chi bộ nan ye tuk njaom biai dalam bản, mbang nyaom di chi bộ dahlak jeng pathau khan jak ba mikva bhap bani patagok phun pala anek athur raong”

Oh lac ngak mbang naih jioy, lac sa urang đảng, ong Uông bhian duah thau hatai saneng, hatai caong khin di mikva pambuak haong bruk pathau khan, jak ba bhap bani padang rai diuk ilamo di labik daok, khik iek an ninh trật tự dalam palei. Meng thun 2004, ong hu chi bộ pok ngak Bí thư chi bộ bản Cụ. Ong Uông tuk halei jeng ba akaok nao dahlau dalam bruk cakrok patagok kinh tế, dak padang rai diuk bahrau. Dalam bruk padang ngak palei pala bahrau, ong Uông hu nao jak ba bhap bani rik daong jien padai, harei ngak, ngak jalan nao mai dalam palei, ngak jeng mbaok meta palei pala bahrau. Ong Lò Văn Sánh di bản Cụ, xã Chiềng Ly, huyện Thuận Châu, tỉnh Sơn La lac: “Ong Lò Văn Uông lac bí thư chi bộ tuk halei jeng jak ba bhap bani cak rok patagok kinh tế, patagok bruk raong glang. Dalam sang ong Ương yau kreih camin, ngak mbang naih joi.”

Meng dom kham merat oh thau glaih glar, ralo thun gam ong Lò Văn Uông hu pok brei angan “urang nong ngak mbang naih jioy" pakat huyện, "Baoh sang ilamo”, ong tuk halei jeng lac urang đảng ba akaok nao dahlau, urang nong naih gheih piah ka mikva dalam palei, dalam xã bac megru saong ngak tui./.