Labaih 18 thun tapa, bhap bani palei Thạnh Mỹ A, xã Bình Thành, huyện Phụng Hiệp, tỉnh Hậu Giang hu bhian randap haong tal pato thaoh oh mek jien di urang dahlau diah ngak bol lin angan Văn Đình Thanh-uom 65 thun, bo uranaih pak ini bhian iew lac ong Năm Thanh. Bruk njauk biai nan lac ong Năm Thanh halar hatian peih tal pato bac ini tok piah pato pakai ka dom adei hatung hatai anit ranam taneh aia tapa dom kadha bac, dom kadha daoh pok meyaom dakrai sajarah bangsa.

Labaih 18 thun tapa,  angan je di ong Năm Thanh pato dakrai sajarah brei thaoh oh mek jien dak harei dak hu pambak prong tal grauk bhum palei, ngak ka ralo urang ngak amaik ngak ame oh lac di xã Bình Thành, bo dom xã jaik taphia dalam  huyện Phụng Hiệp jeng chreih chrai mai likau ka anek kamuan drei tame bac. Meyah tuk karei, tal pato tok hu meng 20 tal 30 adei, umo meng 5 tal 15 thun ye tame tuk padeih hè, tal bac tuk halei jeng hu meng 60 tal 70 adei kayua dom amaik ame mboh ini lac sa mblang ma-in kein laba . Sa-ai Nguyễn Văn Bé daok di palei Thạnh Mỹ A, xã Bình Thành hu dua urang anek daok bac di tal bac ini khan lac: “Bruk pato tacei di Năm Thanh hu ngak ka dom adei salih bahrau biak ralo, dalam baoh sang jeng yau di langiu jalan saong dalam sang bac. Yaok harei jeng hu bac megru yau ini, ye hadei di tuk bac dom adei mboh hu tiến bộ”

Labaih 18 thun dahlau, ong Năm Thanh tabiak truh bol lin padeih hưu pambuak pagam haong bruk ngak hamu, ngak puh. Tukvak ini, mboh anek naih dalam palei kurang ralo janih meng mblang ma-in tal bruk puac tapuk, abih di nyu lac oh thau cambaih ka dakrai sajarah bangsa, nan ye ong peih tal pato dakrai sajarah ini. Ong Năm Thanh khan lac: “Môn sajarah nan nyu brei mboh bruk bangsa  di drei, saong ilamu taong kol khamang khik caga taneh ia  palei negar, meda lac urak ini bruk dakrai sajarah ye dom kamuan oh thau rilo nan ye dahlak peih tal pato  dakrai sajarah saong ilamu meng kan di cách mạng ka dom uranaih.”

Yaok adit, ong Năm Thanh pato harei Adit. Deaok dom bilan  hè, ong pato yaok adit 3 van, yaok van dui atah 3 tuk. Dalam nan ong caik tabiak sa tuk piah bac veik kadha daoh klak, javap chalơi dom tangi sua katut ka dak rai sajarah piah hadar veik dom kadha hu bac bloh. Tukvak daok veik, ong pato kadha daoh bahrau saong langyah dom ilamo bahrau tui angan. Pagap yau dalam bilan hu bruk dakrai sajarah halei prong, ong mek nan piah pato tacei dalam. Adei Lê Cẩm Tiên daok di palei Thạnh Mỹ A, xã Bình Thành brei thau: “Pak ini anek bac hu dom kadha daoh gheih, dom dalikan dakrai sajarah saong dom panuac javap jaleiy dakrai bo ong Năm hu pato ka kol anek”            

       Di tal pato dakrai sajarah brei thaoh oh mek jien tuk hu adei halei kanal bài, javap jaleiy hu dom tangi sua, ye ong Năm Thanh jeng hu pok meyaom meng pok pandap yau siphau, har, kẹo... piah pachreih dom adei. Lingiu di nan, ong daok buh jien kadung tabiak saong jak ba dom urang ngak pahla daong brei jien padai, ba anek saih nao rivang iek Muyim, kalan kakuh Wa Ho atau khu inem krung căn cứ Tỉnh ủy Hậu Giang... piah ka dom adei thau dalam jang ka dakrai sajarah taneh aia, palei negar. Ong Năm Thanh ndom lac: “Dahlak  peih pato hu 18 thun meteh paje, urak ini dahlak kham merat khik ramik mbiah tal tuk halei oh daok ngak hu tra, kadha bo dahlak caong khin di abih nan lac khik veik tal bac ini miat miat saong pato tacei ka anek kamuan thau cambaih ka dakrai sajarah di taneh ia”.  

Ong Năm Thanh saneng lac: pato dakrai sajarah piah pato pakai ka dom anek kamuan hatai anit ranam taneh aia palei negar. Saong tuk hatai anit ranam taneh ia, palei negar nyu njaom tame dalam hatai ye meda ngak jeng pren khang piah ka dom adei kham merat jang dalam bruk bac megru piah jeng manuac urang hu kein laba ka taneh aia harei hadei. Hatung hatai prong glaong ka bruk pala manuac di ong Văn Đình Thanh biak njauk pok meyaom saong mblah tui./.