Urak ini bein kruac bung di sang ong Pi Năng Chiên praong 5.000m², pala 150 phun kruac bung, phun halei jeng bak baoh hijao mekre. Rilo phun bu baoh biak rilo, ong Chiên njauk mek gai kreim pandok tagok. Thun 2010, sang ong Chiên pala iek dom phun kruac bung kanduh hijao. Hadei di labaih 3 thun pala, ong Chiên mboh phun kruac bung kanduh hijao nyu lagaih haong taneh riya di bhum taneh ini, baoh rilo saong yamen bingi. Tal thun 2014, tapa bac megru ilamu di dom tỉnh miền Tây, sang ong pala rilo jang labaih 100 phun. Urak ini bein kruac bung sang ong paik hu baoh mbang camereip hu năng suất glaong, hu menuac mai blei yaom labaih 30 ribau đồng sa kg. Tui nan, sang ong laba hu labaih 70 triệu đồng. Ong Pi Năng Chiên, palei Bạc Rây 1, xã Phước Bình, huyện Bác Ái, Ninh Thuận khan lac: “Urang đảng njauk patruh hu eik, patrun hu kathaot. Piah biai haong mikva, pathau khan ka mikva Bạc Rây 1. Piah bac megru yau drei, lac urang đảng njauk kham merat ngak hu, ndom biai hu”

Ong Chiên hu ieu pataom dom sang pala kruac bung pambuak gauk jeng kapul pala kruac bung kanduh hijao pala Bạc Rây 1 piah klah rabha ilamu, khan brei gauk thau darak pasar pablei kruac bung. Lac urang dang akaok kapul pala kruac bung kanduh hijao palei Bạc Rây, ong abih hatai tacei pato mikva tui jalan pan tangin tacei bruk pak di bein pala. Bruk ngak di ong oh karei hagait sa urang jakar pachreih nong nan ye tuk halei ong jeng hu mikva anit ranam. Sa-ai Katơr Hồng daok di palei Bạc Rây 1, xã Phước Bình, huyện Bác Ái, tỉnh Ninh Thuận lac sa dalam dom urang hu ong Chiên daong saong tacei pato ilamu pala kruac bung, brei thau: Padang kapul pala kruac bung ye cei Chiên tame tal bein tacei drei pala bloh drei meng ngak tui. Bloh ong ba tabiak bein kruac bung ong iek ong ngak yau habar. Kapul pala kruac bung hu ong Chiên lac urang Đảng tacei pato kol dahlak biak siam.

Meng labik lac tok thau pala patei saong tangei lai min tuk mboh ong Pi Năng Chiên pala kruac bung hu kein laba nan ye rilo mikva Raglai dalam palei jak gauk blei pajiah kruac bung kanduh hijao mai pala, patagok taneh pala kruac bung  dalam xã hu jaik 10ha. Ong Pi Năng Thiên, akaok kapul urang dahlau daih ngak bol lin xã Phước Bình, huyện Bác Ái, Ninh Thuận ndom ka ong Chiên yau ini: Dom urang đảng pala kruac bung akaok meti lac sang ong Pi Năng Chiên di chi bộ Bạc Rây. Dahlau daih ong pala 60 phun kruac bung. Sa  vụ ong mek tame hu 5-60 triệu. Ong Chiên pala kruac bung kanduh hijao mek hu kein laba.

      Bruk pala kruac bung kanduh hijao di ong Pi Năng Chiên urang đảng praong thun urak ini hu jeng labik dui pachreih tui damuai grauk labik mai rivang iek tuk mai tal Phước Bình. Urak ini, rilo mikva Raglai jeng bac megru ngak tui piah tabiak truh kan kathaot saong yam tagok ngak kaya meda meng pala kruac bung kanduh hijao./.