Ong Nguyễn Văn Cẩn daok bah jalan 

Ong Nguyễn Văn Cẩn thun ini umo labaih 88 thun. Yaom lac umo glaong, ka-ing kaong min harei halei ong jeng medeih biak yon, caik tabiak jaik 15 minit piah puh bah hareik anak pabah mbang sang saong jalan nao di labik ong daok. Meng mbaik gai puh angaok tangin, ong bah ramik pataom hareik veik, buh tame kadung nilong, ba caik di sa labik piah ka urang mai mbuan pataom mek.

Ong Nguyễn Văn Cẩn brei thau, dahlau diah, jalan anak sang ong bhian hu hareik kandaong veik kayua hu rilo kuan pablei salih pandap panda, ngak jhak labik daok, nan ye ong halar hatian puh ramik hareik hareim dalam van page mesup di labik drei daok ka nyu hacih sa-at saong laneng lanoi jang.

Ong ndom lac, ngan haong urang prong thun, kadha praong di abih lac njauk hu sa rup babhap khang kadang saong glo akaok hadah hadai. Kayua yau nan ye, njauk ngak dom bruk laghaih haong pren di drei. Page mesup, puh ramik sang danaok blaoh, tabiak puh bah dom canah jalan jaik taphia oh njauk lac prong prang hagait. Ngak bruk hasit ka rup babhap nyu khang kadang saong labik daok vil val drei nyu hacih sa-at jang.

Amuk Dương Thị Kim Nguyên, umo 57 thun, sang daok jaik taphia ong Cẩn brei thau, bruk ngak di ong yaom lac sit min hu makna biak prong, daong pambak prong dom bruk ngak siam gheih dalam bhap bani ngan haong labik daok di drei. Mikva pak ini kakei gauk khik ramik labik daok ka nyu hacih sa-at. Meyah mboh hareik ye njauk dhul pataom veik ka nyu hacih, piah page mesup mai, ong Cẩn takik glaih glar jang. Sap yava bhian randap meng mbaik gai puh krem di ong dalam yaok page mesup mboh jeng jaik taphia ngan haong mikva daok di labik ini.

Ong Nguyễn Văn Cẩn urang hu asal daok di miền Tây. Umo 17 thun ong nao mesruh metak, hadei di nan tagok Bei Gon jik khan ao saong kak kajap haong bruk ini tal tuk padeih hưu. Meng bruk ngak sit saong gandi gandang dalam yaok page mesup, urang dahlau diah ngak bol lin daok daong ngak brei ka jalan mbak hacih sa-at jang, mong nan yau kadha bui sambai sit sot tuk salam sa harei bahrau./.

Urang lang: Jasi-22/6