Rilo urang cử tri hu panuac ieu langyah catang bruk tong phạt ong 

Mesup ini, di Học viện Quân y (Bộ Quốc phòng) peih bruk klauk iek vaccine Covid-19 camereip abih ka urang halan hatian. Ini lac vaccine Covid-19 akaok meti di taneh ia drei kayua Cty Nanogen daok di TPHCM roh duah,ngak tabiak, hu angan ieu lac vaccine Nanocovax. Mbang 1 ngak iek vaccine Covid-19 tui kuhria  dui atah tal bilan 2/2021 ngan saong 60 urang halan hatian umo meng 18 tal 50 thun. Dalam mbang 1,lac klauk piah iek bruk salamat di vaccine.Meyah mboh siam, salih tapa mbang 2 meng bilan 2 tal bilan 8/2021 saong mbang 3 tui kuhria lac meng bilan 8/2021 tal bilan 2/2022.

Bier harei sup 16/12, mban pato tacei pakat negar ka bruk pacang caga jit Covid-19 brei thau, dalam harei, negar drei oh mboh urang halei njom bahrau. Dom urang njom Covid-19 di Việt Nam jeng lac  1.405 urang, dalam nan hu abih tih 693 urang njom Covid-19 kayua njom mbak dalam taneh ia. Bruk njauk caik hatai nan lac, di ban raya HCM tapa 15 harei gam oh mboh hu urang njom bahrau Covid-19 dalam rahra meng di tukvak duah mboh urang ruak ka 1.342. Urak ni abih tih 3.260 urang taom gaok haong dom urang ruak dương tính hu daok karei saong dut iek mboh âm tính.

Ong Tất Thành Cang, Phaok mBan tacei jalan ka bruk sajarah TP HCM, Phaok Bí thư thường trực Thành uỷ TPHCM dahlau daih, njauk cap kreik ka duas "ngak suan adat khik ramik, ba pandar drap ar karja ba tal palai pajoa". Thường trực HĐND TP HCM biar harei nan jeng tabiak sarak brei padeih angan lac urang di HĐND TP vaktu 2016-2021 ngan haong ong Tất Thành Cang. Ong Cang ngak suan bruk pablei 9 triệu cổ phiếu di Cty CP Patagokn Nam Sài Gòn (Sadeco).

Dah page ni (17/12), Sở jalan mbak Bà Rịa -Vũng Tàu brei thau,bruk padang jalan lubang camriep di ban tapa labik vòng xoay rup patau Dầu khí kayua Sở ni batabiak hu UBND tỉnh brei ngak.Jalan Lubang atah 600 m, nduac hu 60 km/h, dalam nan 2 lubang sre atah 90 m pambuak haong jalan 2/9 tapa jalan Thống Nhất.Tui ramik ngak, jalan lubang oh gaok hagait tal rup patau Dầu Khí hu ngak meng patau bingu hoa cương kayua Liên doanh Vietsovpetro alin brei. Bruk padang ngak jalan lubang hu Vietsovpetro saong 95% sang bhap bini vil val pachreih tui. Danak dak daok dalam tukvak kuhria caga, tui kuhria hu peih pakak di thun 2022.

Phà tasik meng huyện Cần Giờ -TPHCM nao Vũng Tàu, atah 15 km tui kuhria hu peih bruk pajeng ba meng puac bilan 12, yaom harak vé rtui kuhria lac 60.000-70.000 đồng yaok urang yaok mbang nao. Ini lac jalan phà tasik akaok meti di TPHCM, tabiak meng bến Tắc Suất di ban sit Cần Thạnh (Cần Giờ) tal TP Vũng Tàu (jaik labik ngak bruk di Cảng vụ hàng hải Vũng Tàu). Urak ini, dom bruk hu kuhria caga blaoh blai. Tuk ngak salah harak gar,  phà peih iek meng harei 25/12 saong peih biak 4 harei hadei, duh ka bruk nao mai tuk tame thun bahrau 2021 saka ia harei. Jalan ini dui katut panak tukvak nao meng Long An, Tiền Giang tal Vũng Tàu, salih ka jalan radaih nao tapa cao tốc TPHCM - Long Thành - Dầu Giây.

Rajaei dom negar di châu Âu hu khan bruk klauk jru vắc-xin ka bhap bini meng puac bilan 12,dalam tuk jit Covid-19 daok tamuh gilac khang di rilo negar. Negar Đức yam tame mbang pacang cakak abih gah biak catang meng harei 16/12 saong meda peih bruk klauk vắc-xin caga Covid-19 di harei 27/12. Pháp meda klauk jru vắc-xin meng harei 30/12.Daok Italia peih bruk klauk jru pacang caga meng harei Noen.Langiu di nan hu takik di nyu 5 negar di châu Âu hu mbaok tangin tame harak pambuak gauk ngak dalam mbang klauk jru vắc-xin anak tal.

UB châu Âu brei thau dom bruk ginum biai di EU haong Anh mek hu rilo siam mekre dom gah yau bruk daong di karja atau tanut meriak gauk tui jalan samu gauk, min oh njauk gauk biak khang gah bruk ngak ikan mbuan ba tal tayah thỏa thuận.Gah EU khin jao veik ka gah Anh meng 15-18% kaya ikan cap mek hu yaok thun yau urak ini, dalam tuk rajaei Anh khin hu 60%. Tui langyah di dom urang thau bruk, makna praong abih lac gah Anh maong bruk mek veik taong abih quyền pasang iek bhum tasik negar ini lac biểu tượng di Brexit nan ye oh taduan bruk klah rabha  quyền ngak po haong dom urang taong ikan châu Âu

Jien kỹ thuật số Bitcoin hu labaih 20 ribau USD mbang camriep,lac tanut glaong di abih.Tui Reuters,paok jien kỹ thuật số praong abih di dunya hu tagok 4,5%, tagok tanut 20.440 đôla Mỹ. Dom makna ngak ka jien kỹ thuật số ni tagok khang kayua bruk pandar biak praong meng gah đầu tư,njauk dui pachreih kayua kein laba samar drak, saong caong nyu jeng sa jalan biyar jien parong abih di tukvak anak tal./.

Urang lang: Thu Thảo -Mousaphuong- 17/12