Ong Thành Văn Tân daok mayai haong bhap bini

Palei An Nhơn, xã Xuân Hải, huyện Ninh Hải hu 517 baoh sang gam haong labaih 2.000 urang, taong abih jeng lac urang bangsa Cam. Dom thun jaik di ini,  raidiuk bhap bini dalam palei hu salih bahrau mboh di anak meta, puk palei khik kajap saron mbon, bhap bini sahnang hatai ngak mbang, cak rok patagok kinh tế sang danaok. Dalam palei hu labaih 100 hecta taneh pala phun ngak nong, abih tih tapon pabe, pabo, limo hu labaih 2.000 drei. Jien mek tame di rilo sang dalam palei  meng 50 tal 100 triệu đồng yaok thun, 80% baoh sang hu raidiuk ginup, meda. Urak ni, dalam palei daok 3 baoh sang kan kathaot  min, samu 0,58% dom baoh sang bhap bini. Dalam dom jak jeng nan hu prein rik daong di ong Thành Văn Tân -Bí thư chi bộ palei.

Gam saong dom urang pan akaok palei, ong Tân thau samar ba yaok sarak, yaok jalan ngak di pakat angaok tame raidiuk di palei. Ong kham merat pathau khan, jak ba bhap bini peih ngak dom bruk cak rok patagok kinh tế, patruh eik, patrun kathaot, padang ngak raidiuk ilamo di labik daok...Ong Lương Nhị daok di palei An Nhơn, xã Xuân Hải, huyện Ninh Hải, tỉnh Ninh Thuận ndem ka ong Thành Văn Tân yau ini: “Ong Bí thư chi bộ thôn An Nhơn biak abih drei haong bruk ngak di palei,…”

Ong Tân gam haong urang jaka, urang đảng dalam palei kham marat pathau khan, jak ba mikva tame padang ngak iek labik daok di palei An Nhơn jeng palei pala bahrau kiểu mẫu. Ba akaok nao dahlau dalam yaok bruk ngak, urang đảng lac talei pambuak piah ka sarak padang ngak palei pala baharu hu nao tal bhap bini. Ong haong labaih 100 urang đảng di Chi bộ palei An Nhơn hu rik tame yaok rituh triệu đồng padang ngak mblang bien hijao ka palei. Tal urak ni, An Nhơn mek hu 3/5 asal kadha, kham marat padang ngak hu bruk ngak iek labik daok di bhap bini An Nhơn palei pala bahrau kiểu mẫu dalam thun 2021. Ong Tân brei thau dom ilamo piah mek hu siam lagaih dalam bruk ngak: “Yaom lac sa urang đảng viên praong thun, min tuk halei jeng ba akaok nao dahlau…”

Ong Thành Văn Đúng, Phó bí thư Đảng ủy xã Xuân Hải, huyện Ninh Hải, tỉnh Ninh Thuận ndem ka ong Thành Văn Tân yau ini: “Di palei An Nhơn, ong Thành Văn Tân ac urang jaka đảng viên kham marat, hu rilo prein rik ka palei pala…”

Tapa dom bruk rik daong di drei, rilo thun gam ong Thành Văn Tân hu Đảng ủy xã Xuân Hải, Huyện ủy Ninh Hải, tỉnh Ninh Thuận pok mayaom ka dom bruk ngak hu dalam dak padang Đảng/.

Urang lang: Thu Thảo – 25/01