Mbaok catang kalik juk, khang kadang, bí thư palei Hamasing, ban sit D’ran, huyện Đơn Dương, tỉnh Lâm Đồng, ong Ya Thoang umo jaik 60 thun. Tuk halei mikva caong khin ye ong hu mbaok. Bruk praong, bruk sit jeng hu ong langyah ba siam. Bac megru hu jalan ngak siam, ông tacei pato veik abih ka mikva. Kayua yau nan ye, ong tuk halei jeng hu mikva dalam palei anit ranam. Ong Ya Thoang lac: “Khin pathau khan, jak ba hu bhap bini ye drei brei ba akaok nao dahlau dalam bruk cak rok patagok kinh tế, dak padang raidiuk drei sir, haniem phol, raong ba anek bik mbang bac tal labik tal dhua.”

Ong Ya Thoang jeng sa urang ngak nong naih joi, meng thau jalan pandar saong patagok  dom siam lagaih di langik tasik, taneh riya bhum palei dalam bruk pala caphe saong dom janih phun mbang baoh. Yaok thun sang ong mek tame hu yaok rituh trieu dong. Ong Ya Thoang khan lac: “Hadei di tuk nao nghĩa vụ quân sự mai, raidiuk biak kan kandah. 4 thun hadei, jeng hu bruk jak ba di UB bhap bini ban sit, dahlak pala caphe. Sang hu 1,5 ha, daok hu 6 sào phun hồng tra, jien mek tame sa thun hu 150 tal 180 triệu đồng”

Meng  ilamu patak pataom hu, ong Ya Thoang tacei pato mikva dalam palei jalan pala saong iek glang phun kaphe. Urak ini, dalam palei hu jaik 200 baoh sang pal labaih 300 hecta kaphe. Raidiuk mikva hu tani tanat jang dahlau biak rilo. Baoh sang kan kathoat dalam palei meng 12 % di thun 2000 trun daok 4%: “ Palei dahlak, tuk hu tha urang ngak jeng ye rilo urang mblah ngak tui, bac tui, meng nan drei  hu jalan mbuan lagaih jak ba mikva ngak tui. Thei ngak dahalu mboh hu lagaih ye drei bac tui. Tui jalan ngak brei patagok kinh tế ye mikva urang bangsa takik atau Kinh bac megru klak rabha ilamu ka gauk piah daong gauk ngak mbang cak rok patagok./.