Dom harei ini, rilo po bein pa-ok di khu phố Suối Nước, phường Mũi Né, ban Phan Thiết, tỉnh Bình Thuận daok biak haduh hatai anak bruk rilo bein pa-ok daok dalam tuk tabiak bingu min layau thu, oh ndam baoh.

 Tui mikva pak ini brei thau, makna di bruk nan, lac kayua thun ini langik tasik oh lagiah, rilo mbang hajan tuh trun tuk pa-ok daok tabiak bingu nyu layau ka-iu, oh ndam baoh. Muk Nguyễn Thị Xuân daok di khu phố Suối Nước haduh brei thau: “Ini lac bilan pa-ok praong dalam thun piah pablei Tết Nguyên đán 2019. Yau nan min, tal urak ini jaik 2 hecta pa-ok di sang dahlak oh ndam baoh. Bilan paok ini sang dahlak meda lahik abih mbong.”

 Dreih yau nan, bilan pa-ok thun ini, sang muk Nguyễn Thị Ngọc Hoa daok di khu phố Suối Nước apah urang mai ngak brei phun pa-ok tabiak bingu karei bilan. Tal kaok bilan 10 saka ia bulan, phun tabiak dom bimong bingu camereip. Yau nan min, bruk bui sambai di sang amuk Hoa oh hu suai lavik kayua hajan khang dui atah. Bingu pa-ok daok nerak nan lac tuk biak mbuan druh ye gaok dom mbang hajan khang. Tapa nan, jaik 70% phun pa-ok di taneh praong jaik 2 hecta daok tabiak bingu khut abih, tok daok veik dom bingu tabiak baoh kayua nerak aval.

Meng hu taneh cuah gam saong ia dalam haluk siam nan ye baoh pa-ok di Mũi Né, ban Phan Thiết, tỉnh Bình Thuận yamen karei saong hu darak pasar takre blei. Tukvak Tết Nguyên đán 2018, baoh pa-ok di Mũi Né hu pablei haong yaom glaong, meng 90 tal 100 ribau đồng sa kilo. Yau nan min, ngan saong dom bruk daok rah tabiak ngak kan kandah ralo tal bruk pala drak, jeng yau raidiuk di urang nong. Tui UB bhap bini phường Mũi Né, phun pa-ok di palei ini hu pala rilo di khu phố Suối Nước ngan saong taneh pala praong labaih 60 hecta, hu 65 baoh sang pala. Langiu di bruk langik tasik oh lagaih ye bruk pa-ok khat lahik daok kayua halak mbang, abih di nyu lac halak đục  thân palai pajua.

Urak ini, gah chức năng di palei ini daok peih ngak dom jalan njauk ngak piah daong ka bhap bini samar pasiam veik bruk pala drak./.