Mikva daok di chung cư HQC 35 Hồ Học Lãm cuk khẩu trang tuk nao tame sang mac  

Chung cư Zen Tower daok di pasak quận 12, anak mbaok jabat UBND quận,  hu yaok ribau bhap bani. Meng tuk hu jit Covid-19 njaom mbak, mBan khik iek chung cư hu pathau khan, jak ba bhap bani paglaong akaok saneng pacang khik rup drei, ba tangin rk prein tame haong rahra dalam bruk paccang caga jit.

Dalam dom thang máy tuk halei jeng peih video brei thau ka bruk pacang caga jit, kakei bhap bani bhian rao tangin meng japol, aia rao tangin pametai anek ruak, puh ramik sang danaok haci hacih saong cuk khẩu trang tuk nao tabiak langiu.

Di chung cư HQC 35 Hồ Học Lãm (phường An Lạc, quận Bình Tân), bruk pacang caga jit ruak jeng biak hu caik hatai sangka. Ong Nguyễn Phương, Phaok mBan khik iek saong vận hành chung cư, brei thau: “mBan khik iek hu ndom haong dom baoh sang kuhri kuhria veik, patakik jang bruk brei ka tuai damuai tame tabiak chung cư. Taong abih tuai damuai mai tal chung cư njauk brei thau angan je, tut angan di lễ tân, di bảo vệ. Bruk jao pandap blei di labik mblang bein langiu sảnh, urang jao pandap oh brei tame chung cư. Dom harei tapa, mban hu kaoh tabiak kadung jien khik piah blei khẩu trang y tế brei ka mikva, saong daok hu caik  khẩu trang di labik gah langiu thang máy piah ka mikva pandar tuk trun tagok chung cư”. Dom harei puac adit, mikva dalam chung cư njauk takik nao tabiak gah langiu, bo sinh hoạt saong ngak bruk dalam sang di drei. 

Meng di tuk hu jit Covid-19, mban khik iek chung cư Dreamhome Recidence (phường 14, quận Gò Vấp) hu tauk poster brei thau ka jit ruak di bảng thong tin dalam chung cư, di kanjan thang máy. Labik quầy lễ tân, sang vệ sinh công cộng hu caik kalaok aia rao tangin, cồn sát khuẩn brei thaoh ka bhap bani saong tuai damuai mai pambuak bruk. Labik sảnh, thang máy chung cư tuk halei jeng hu urang puh ramik vệ sinh, pametai anek ruak. 

Sa-ai Phạm Tuấn Hải, akaok mban khik iek chung cư Dreamhome Recidence, brei thau: “Khaol dahlak tauk harak pathau khan di dom sảnh hu thang mac, kakei taong abih urang ngak dalam mban khik iek saong urang ngak vệ sinh, bảo vệ chung cư cuk khẩu trang tuk taom gaok mikva; plaih nao mai, oh nao ma-in meyah mboh rup drei patuk, pandiak atau kan suak yava. Di chung cư, mban khik iek hu peih ngak dua mbang pruh jru pametai anek ruak piah patrun bruk njaom mbak jit”. 

Sở Xây dựng TPHCM bahrau hu harak pandar UBND 24 quận huyện pathau khan, tacei pato dom kapul nyaom, manuac urang daok dalam chung cư peih ngak catang, ngak njauk tui dom tacei pato di Thủ tướng Raja-ei ka bruk pacang caga jit ruak. Tui nan, pandar dom ban quản trị, mban khik iek chung cư duah thau cambaih bruk nao mai di bhap bani, abih di nyu lac ngan haong dom chung cư hu urang negar langiu. Meyah mboh urang halei yau njaom mbak ruak daok dalam chung cư ye njauk samar khan brei gah y tế thau piah brei daok karei, tui iek, điều trị samar drah urang njaom mbak ruak. Bhap bani dalam chung cư ngak njauk tui panuac kakei di jabat chuyên môn gah y tế, pambuak bruk siam haong jabat chức năng peih ngak siam dom jalan ngak pacang caga jit ruak./.

Urang lang: Jasi - 23-3