Bhum taneran kraong Cuu Long daok yuak padai

Di bhum taneran kraong Cuu Long, yaom padai brah tagok khang di abih  lac janih biar yau IR 50404. Janih padai ini yaom pablei di mblang hamu meng 5.500 – 5.700 đồng sa kilo, glaong jang adit dahlau labaih 200 đồng sa kilo saong dut haong padai bilan Đông xuân tagok labaih 800 đồng sa kilo. Muk Trần Thị Thu Vy, daok di xã Thiện Mỹ, huyện Châu Thành, tỉnh Sóc Trăng chreih chrai brei thau, 35 công taneh padai OM 18 di sang birau yuak pablei ka urang pablei salih yaom 5.900 đồng sa kilo, laba labaih 2 triệu 5 rituh ribau đồng sa công. Yaom padai Hè thu tagok, gam saong padai siam nan ye mbuan pablei: “Padai pablei mbuan lagaih kayua yaom tagok, urang blei jeng samar. Meyah padai trun yaom ye kan kandah jang, min thun ini bilan padai ini hu rilo saong yaom tagok nan ye urang nong pablei jeng mbuan.”

Daok ong Nguyễn Văn Tiên, urang nong daok di huyện Cai Lậy, tỉnh Tiền Giang jeng brei thau, yaom padai Hè thu thun ini glaong jang thun blaoh nan ye hu laba rilo jang: “ Padai thun ini di dahlak dut saong dom thun dahlau nyu siam jang, hu rilo jang. Mbang ini dahlak pablei hu laba. Kayua mbang ini yaom padai glaong jang, mbang dahlau padai rilo jang min pablei yaom biar jang.”

Tukvak ini, rilo labik dalam bhum taneran kraong Cuu Long yuak blaoh padai Hè thu. Dom mblang hamu daok veik pataom ralo di dom tỉnh tapen tasik yau Trà Vinh, Sóc Trăng, Bến Tre, Kiên Giang… Sóc Trăng nan lac sa dalam dom tỉnh hu taneh padai hè thu tame tuk yuak praong abih di bhum taneran kraong Cuu Long. Dalam tỉnh tam drak labaih 142.000 ha; dalam nan hu labaih 29.000 ha padai yuak blaoh, kuhria rah tapa padai yuak hu jaik 5,9 tấn sa hecta. Urak ini, padai tathah pajaih OM 18 urang blei yaom jaik 6.000 đồng sa kilo, OM 5451 hu yaom 5.800 đồng sa kilo saong padai ST 24 hu yaom meng 6.600 - 6.800 đồng sa kilo...glaong jang tukvak ini thun dahlau labaih 1.000 đồng sa kilo. Meng yaom padai yau ini urang ngak hamu hu laba  meng 40 tal 50%. Ong  Võ Minh Luân, Akok Jabat ngak nong saong patagok palei pala huyện Châu Thành, tỉnh Sóc Trăng brei thau: “ Padai di huyện Châu Thành biak njauk, hu meng 5,6 tal 6 tấn sa hecta, yaom blei padai biak glaong, abih di nyu lac dom pajaih padai  yau OM 18, OM5451 saong dom pajaih padai ST.Meyah dut kein laba ye padai bilan hè thu ini glaong jang padai Hè thu thun 2019, kuhria rah tapa  mikva laba hu meng 16 tal 18 triệu sa hecta.

Di tỉnh An Giang, tal urak ini urang nong yuak hu jaik 200.000 ha padai Hè thu, hu labaih 5,8 tấn sa ha. Tuk yuak blaoh hu urang mai tal hamu blei padai. Yaom padai pasah jeng tagok meng 50 đồng tal 350 đồng sa kilo. Daok brah bhian yaom meng 10.800 tal 11.500 đồng sa kilo, tagok 1.000 tal 1.300 đồng sa kilo dut saong thun dahlau…

Padai hè thu thun ini oh lac tagok yaom bo padai jeng siam jang; asar brah mekre meda pablei tabiak negar langiu hu. Harak pambuak bruk pablei salih tự do di Liên minh Châu Âu saong Việt Nam (EVFTA) hu ba tame pandar meng harei 1/8 lac pabah mbang peih tabiak rilo mbuan lagaih ka doanh nghiep Viet Nam pablei brah tame darak EU. Brah di Việt Nam oh kak jien je tuk pableitame EU. Dalam tuk jit Covid-19 rah tabiak dalam kan kandah, bruk khin blei brah di dunya jeng tagok. Tui Hiệp hội padai brah Việt Nam, meng kreh bilan 7 yaom brah pablei tapa negar langiu di Viet Nam tagok gam saong mbiah tal urak ini tapa yaom brah dreih gauk di Thái Lan piah dang kaok di dunya.

Daok tui Mentri Ngak nong saong Patagok palei pala, 7 bilan thun ini, Viet Nam pablei tabiak negar lingiu hu jaik 3,9 triệu tấn, jien mek tame hu 1,9 tỷ đô la Mỹ, trun 1,4% ka khối lượng min tagok jaik 11% ka yaom jien mek tame dut saong tukvak ini thun blaoh. Ong Nguyễn Văn Đôn, Giám đốc Công ty TNHH Việt Hưng, tỉnh Tiền Giang khan brei thau, bilan padai Hè thu thun ini padai brah jeng tagok glong saong glaong di abih kuhria dalam 10 thun tapa, abih di nyu lac darak pasar dalam taneh ia: “ Padai brah hè thu tagok yaom ralo lac dalam negar, daok pablei tabiak negar langiu tagok hu hasit min. Yaom tagok, urang nong bui sambai, doanh nghiệp ye blei tame pablei tabiak jeng hu laba”.

Bilan  hè thu 2020 di bhum taneran kraong Cuu Long tam drah jiak 1, 6 triệu  hecta, tui kuhria dahlau mek hu 8,7 triệu tấn. Rilo tỉnh hu labaih 6 tấn sa hecta, meng yaom tagok, urang nong laba hu labaih 30%. Ini lac bruk bui sambai, hadah hadai ka gah padai brah di bhum taneh padai miền Tây. Angaok mblang hamu, urang ngak nong bhum taneran kraong Cuu Long daok sami samar yuak padai Hè thu saong tam drak padai Thu Đông 2020 saong hatai jia: bilan yuak kuak hadei padai biak njauk./.

Urang lang: Aí Nghiêm  20/8/2020 11:16:20