Việt Nam nan lac sa dalam dom taneh ia hu brah pablei tabiak negar langiu prong abih di dunya, min yaom brah pablei tabiak negar langiu jeng daok biar. Makna di nyu kayua brah Việt oh ka padang hu angan  saong chất lượng oh grap tanat.

Tal tukvak ini, dom doanh nghiệp pablei brah tabiak negar langiu di Việt Nam hu mboh tangin tame harak pambuak bruk pablei tabiak negar langiu hu labaih 1 triệu tấn brah. Ini jeng lac kadha brei mboh jalan siam mekre dalam bruk pablei brah tabiak negar langiu dalam thun ini. Yau nan min brah pablei tabiak negar langiu di Việt Nam yaom jeng daok biar saong urang blei mbang di dunya takik thau tal. Ong Bùi Huy Hoàng, tham tán thương mại Việt Nam pak Trung Quốc pandik harao khan lac,  thun 2015 brah Việt Nam meblah 54% abih tih brah blei tame di Trung Quốc min tuk ong nao tapa dom siêu thị saong cửa hàng pablei brah di negar ini ye oh duah mboh brah hu xuất xứ atau angan Việt Nam. Dalam tuk nan, dom taneh ia pablei brah tabiak negar langiu daok meriak gauk haong Việt Nam yau Thái Lan, Pakixtan, gaok mai lac Campuchia daok tapa mbaok khaol drei ka bruk pablei brah chất lượng glaong tabiak negar langiu saong padang hu angan je. Ong Bùi Huy Hoàng, tham tán thương mại pak Trung Quốc brei thau: “Khaol dahlak daok pak nan oh ka mboh dalam siêu thị hu kadung, mbao halei vak lac brah mai meng Việt Nam. Taong abih dom urang blei oh thau brah di Việt Nam lac yau habar!. Dahlak saneng bruk di Hiệp Hội lương thực lac roh duah pambuak bruk haong dom jabat thương vụ padang angan brah Việt Nam pak darak pasar Trung Quốc”.

Jalan daok pamaong tal dalam bruk pablei brah tabiak negar langiu di Việt Nam lac peih prong darak pasar tapa Mỹ, Hàn Quốc, châu Âu. Min tui jalan ngak mbang yau urak ini saong chất lượng brah oh ka glaong, asal brah Việt kan si tame hu dom darak pasar ini. Tukvak tapa, dom lô brah pablei tapa Mỹ njauk bayar mai veik kayua oh siam. Anak bruk yau nan, dom doanh nghiệp jeng caong Mentri Công thương buh jien padang ngak duk thí nghiệm mek hu chuẩn dunya pak Bhum taneran kraong Cửu Long. Ong Nguyễn Trung Kiên, Akaok Hội đồng quản trị Công ty Cổ phần Gentraco  caong lac: “Dahlak caong Hiệp hội Lương thực saong dom tham tán thương mại daong ka doanh nghiệp thau dom sarak ka bruk khik iek chất lượng, an toàn pandap panda, brei thau ka kiểm dịch thực vật, lộ trình TPP ngan haong asal brah, sarak thuế quan. Daong ka doanh nghiệp gah meriak gauk pablei salih, dom paga pacang gah kỹ thuật).

Urak ini, brah chất lượng glaong di Việt Nam meblah 27% sản lượng brah pablei tabiak negar. Min piah jhul khang bruk pablei tame Mỹ, Hàn Quốc, Châu Âu… dom doanh nghiệp saong urang nong Việt Nam njauk ngak ralo bruk yau đầu tư: pajaih, chất lượng brah hacih, ngak mblang hamu prong, padang angan pablei salih saong xúc tiến thương mại. Dom kadha ini, doanh nghiệp saong urang nong biak khin hu bruk daong di Karja. Ong Huỳnh Thế Năng, Akaok Hiệp hội Lương thực gah Meraong, Tổng Giám đốc Công ty lương thực gah meraong lac: “Pamong tal bruk padang yaom glaong pagam haong paglaong chất lượng brah saong yam tal padang angan pablei salih padai brah tui kuhria dahlau dalam quý 1 thun 2016 meda hu jalan ngak biak cambaih piah ba dom doanh nghiệp di  Hiệp hội tabiak gah anak piah ba jalan darak pasar brah di Việt Nam dalam tukvak anak tal.”     

Gah Mentri Công thương, Thứ trưởng Bộ Công thương Trần Tuấn Anh brei thau: Khaol drei njauk samar pambuak bruk haong dom negar pak nan peih ngak dom cam kết hội nhập, peih pambang ye meda hu dom tacei pato ka dom doanh nghiệp, brah di Việt Nam tame hu darak pasar ini pabak hu dom tanut gah kỹ thuật, chất lượng di dom negar ini.

Pablei brah tabiak negar langiu meyah pataom tame sa darak pasar prong yau Trung Quốc ye suai lavik oh njauk lac jalan nao khang kajap, abih di nyu nan lac tuk darak pasar hu biến động. Min piah paglaong yaom asal brah, pablei brah tame dom darak pasar kan ye oh hu jalan halei karei lac urang nong, doanh nghiệp saong dom bộ ngành chức năng njauk jhul samar bruk padang angan pablei salih brah Việt./