Pathau mikva saong taong abih gauk! Tukvak tapa, bruk trun biar đạo đức daok njauk menuac sia lên án khang. Dom bruk ngak sung jalan ngak menuac yau anek taong, pametai amaik ame, diuk pasang pametai gauk; xâm hại uranaih… dak harei dak rilo saong dak kanjah jhak jang. Kayua yau nan ye, brei hu jalan ngak chip piah paglaong đạo đức meng dalam yaok baoh sang, piah padang gheng daning khang kajap ka sa XH khang kajap, văn minh. Kadha vak di urang vak Hồng Bắc brei thau ka bruk ini.  

Tui kuhria mboh, meng thun 2012 tal thun 2016, dalam taneh ia hu labaih 127 ribau mbang taong paoh gauk dalam baoh sang. Uranaih daok dalam baoh sang hu bruk taong paoh gauk, ye bruk bac da-a nyu trun khang, dom adei bhian khin taong paoh gauk tuk kandah gauk saong ayut sahabat. Kayua yau nan ye, tukvak tapa dom bruk taong gauk dalam sang ba hu biak ralo. Ini lac sa dalam dom makna di bruk trun biar đạo đức dalam baoh sang, dalam XH urak ini. Anak meta mboh lac,meng bruk patagok saong salih bahrau di rai diuk, ralo baoh sang sangka biak rilo tal pandap panda, drap ar bo iek njul gah tinh thần, ba tal bruk amaik ame kurang sangka tal anek bhik, baoh sang oh njauk gauk. Saai Nguyễn Thanh Hà, daok di quận Thanh Xuân, Hà Nội ndom lac:

 “Tuk bo amaik ame jan var saong bruk ngak yaok harei oh daok tukvak iek glang anek bhik bo tok buh jien tabiak  pah menuac iek atau menuac daong bruk dalam sang min anek bhik kurang nao bruk iek glang, kurang nao bruk sangka saong kurang bruk pato pakai di amaik ame ye meda hu dom tác động cagar veik hatai caong di baoh sang”

Hu sa bruk biak lac dalam oh takik baoh sang urak ini, talei rohim di dom urang dalam sang dak harei dak kurang khang kajap. Urang caik ralo tukvak, jien ndo ka bruk mbang menyum, nao me-in du lịch, min takik sangka tal bruk pato pakai đạo đức, jalan ndom puac daok dang siam mekre ka anek bhik. Hadei di tuk bac, tuk ngak, amaik ame saong dom anek takik ndom meyai, sangka, klah rabha hong gauk. Ong Hoa Hữu Vân, Phó Vụ trưởng Vụ baoh sang , mintri ilamu  - Thể thao saong Du lịch ndom lac:

 “Kan kandah praong abih urak ini lac jalan  diuk rai, đạo đức saong pato pakai dalam baoh sang saong langiu baoh sang daok hu rilo bruk njauk meyai. Bruk siam mekre di sa urang anek jat gheih dalam ralo baoh sang urak ini ye maong tame blah giấy khen saong điểm 10. Daok dalam sang bac, pato pakai đạo đức jeng oh ka thu nao jaik saong dom asal pato ka luân lý, ka đạo đức saong bruk ini brei hu lagaih saong yaok umo, yaok pakat bac jang”.  

Dalam tukvak urak ini, patagok bruk diukrai siam mekre di baoh sang piah khang kajap ilamu siam mekre meng kan di baoh sang, pacang veik dom suy thoái di jalan diukrai thực dụng, vị kỷ. Nhà thơ Lê Hùng, daok di quận Bắc Từ Liêm, Hà Nội ndom lac, baoh sang meng kan VN meng rai ini tapa rai daih hu pataom veik jeng ilamu siam mekre di bangsa yau anek bhik iek praong saong thau ka ong muk, amaik ame, adei saai njauk gauk, diuk pasang anit ranam gauk… meng nan nyu jeng dom chuẩn mực đạo đức saong jalan diuk rai.

 “Njauk diuk rai pambak pagam tame tình cảm. Meng ndom puac daok dang tal taong abih dom janih dalam baoh sang ye dom ong muk njauk ngak kreih camin, hu hatai anit ranam, dom anek taco jeng brei iek praong. Baoh sang kol drei tui jalan meng kan, min brei hiện đại, hiện đại lac  taong abih dom anek brei njauk gauk. Bruk huac abih di kol drei lac anek bhik khut, bleik saleik, njil njuk. Kayua yau nan ye, ngan saong rai ranaih brei hu bruk tacei pato di amaik ame, ong muk”. 

Rilo urang ruah duah ndom lac, baoh sang harei ini meda salih barau khang gah cơ cấu, chức năng, dom hình thức saong chuẩn mực dalam dom talei pambuak bruk min labik dang, bruk ngak ngan saong bruk patagok di XH ye oh salih karei. Kayua yau nan ye, piah paglaong siam lagaih bruk pato megru đạo đức, jalan diuk rai dalam baoh sang, taphia bruk khik ramik, patagok dom yaom glaong ilamu di baoh sang meng kan brei hu pacang cakak dom adat cambat, dom bhian randap klak oh siam. PGS-TS Trịnh Hòa Bình, Giám đốc pasak Dư luận xã hội, Viện Xã hội học brei thau:  

 “Kol drei brei pakhang bruk di baoh sang, brei ngak yau habar piah patagok veik dom yaom glaong siam mekre meda lac meng ribau rai di urang Việt Nam đạo lý, ranam taneh ia saong abih hatai haong gauk”

Amuk Đặng Thị Bích Liên, Thứ trưởng mintri ilamu - Thể thao saong Du lịch brei thau: Ngak tui panuac tacei pato di Thủ tướng rajaei, mintri ilamu, Thể thao saong Du lịch daok dak padang, peih ngak bộ tiêu chí ứng xử dalam baoh sang piah  ramik pasiam dom bruk suan, oh njauk dalam jalan diukrai urak ini.

 “Baoh sang hu pakhang, pasiam saong dak padang tui jalan lac trei sil hanem phon, tiến bộ, bình đẳng saong khang kajap hu rik daong ka bruk patuh eik patrun kathaot  piah langyah dom bruk XH saong ngak brei chreih chrai dalam dom rai rah bhap bini, abih di nyu nan lac dom urang dalam baoh sang”.     

Dalam tuk ilamu, đạo đức baoh sang daok trun biar, taphia bruk jhul pakhang pato megru đạo đức, jalan diuk rai dalam bhap bini ye dom mô hình baoh sang ilamu hadah krah, dom kreih camin amaik ame pato pakai anek jat gheih atau bruk ndom puac di anek kamuan brei mboh lễ nghĩa, hiếu thuận saong ong muk, amaik ame brei hu pambak praong, piah ka yaok bhap bini maong mboh, bac megru yaok harei, meng nan jhul kandul likuk dom bruk suan, bruk oh njauk, rik daong dak padang nhân cách anek menuac saong baoh sang ilamu dalam samar barau./.