Bruk njauk caik hatai akaok meti di yaok urang tuk taom gaok Lưu Lập Đức lac sami samar, bui sambai, chreih chrai. Đức khan lac, thun 2015 hadei di tuk nao nghĩa vụ quân sự blaoh, sa-ai mai veik palei haong hatai caong khin ngak habar piah paglaong yaom dom janaih kaya nong di bhum palei drei.

Piah ba tangin tame ngak, Đức tame Ban raya HCM bac bruk ngak tui danak dak daong ka urang lin nao nghia vu quan su blaoh. 6 bilan bac bruk ngak, Đức kham merat nao tal dom nhà hàng, siêu thị, sang bac bán trú duah thau ka bruk blei pandar njam patam, baoh karaoh - nan lac bruk lagaih di bhum taneh Lâm Đồng. Thau hu bruk catang di gah ini lac pandap brei hacih sa-at, oh pandar jru, mai sang veik, Đức buh jien tame pala dom janih njam patam, baoh karaoh hu darak pasar takre blei.

Angaok taneh praong 5 hecta, sa-ai ba ilamu cong nghe glaong tame pala dom janih njam, akaok lasun prang, bắp cải tím, bei java, trong nde, su hào, hala sun…Mbang paik pablei camereip, sa-ai ba nao yaih khan di dom labik dalam Ban raya HCM. Tapa pasang iek catang di gah blei tame, njam patam baoh karaoh di sa-ai hu taduan pambuak bruk piah pablei.

Patagok bruk ngak hu di drei, Lưu Lập Đức nao tal dom baoh sang ngak bein hu taneh pala praong mbiah dalam tỉnh blei pandap tui jalan pambuak gauk pala saong pablei kaya nong. Sa-ai dang tabiak pabak brei pajaih, khak, jalan ngak ka mikva. Tuk paik, Đức pasang eik tapak, kaya nong hu siam mekre yau panuac sanya meng blei.

Dua thun tapa, meng tuk camereip yaok bilan pabak labaih 60 tấn njam patam, baoh karaoh ka dom siêu thị, nhà hàng saong dom sang bac mẩm non di Ban raya HCM, tal urak ini tagok jaik  300 tấn.

Piah peih praong bruk pala ngak saong patagok parilo kaya nong siam, thun 2019, Lưu Lập Đức padang Công ty TNHH Agri Đức Tiến, pablei kaya nong tieu chuan VietGap piah yam tabiak dom darak pasar praong dalam negar. Hatai caong khin sahaneng khin ngak di urang likei dam bangsa Tày hu jeng biak. Jien mek tame yaok thun di doanh nghiep Đức Tiến hu 30 tỷ đồng, hadei di tuk kaoh tabiak yaom jien buh tame ngak, daok laba hu labaih 3 tỷ đồng. Cong ty hu ba bruk ngak tani tanat ka jaik 40 urang. Jien mek tame meng 5 tal 6 trieu đồng sa urang sa bilan.

  Lưu Lập Đức brei thau, jalan anak tal daok rilo kan kandah. Bruk sa-ai pamaong tal oh lac darak pasar dalam taneh ia bo daok yam tabiak darak pasar dunya. Kayua yau nan ye, dom bruk ngak hu tuk camereip ini lac jalan lagaih piah ka Đức kham merat jang, brei mboh asar siam di kaya nong Đức Trọng jeng yau kaya nong Viet Nam di dom darak pasar kan tame. Langiu di nan, bruk sa-ai tuk halei jeng pamaong tal nan lac bruk salih jalan sahaneng di bhap bini dalam bruk ngak nong, meyah ngak njauk, yaok mblang taneh meda ba mai kein laba glaong piah salih barau raidiuk di mikva.

Birau ini, dalam tukvak gaok kan kandah kayua jit Covid-19,  Lưu Lập Đức hu blei daong kaya nong ka yaok pluh baoh sang urang dalam palei. Dalam mbang ribuk ia sua di bhum Kreh negar thun 2020, sa-ai rik daong ka bhap bini labik ini yaok tấn njam patam, baoh karaoh. Dalam dom bruk ngak di kapul dam dara dalam palei, sa-ai Lưu Lập Đức tuk halei jeng baih drei hu mbaok tame.

Meng dom bruk ngak hu nan, Lưu Lập Đức hu taduan giải thưởng Lương Định Của thun 2020 saong hu Thủ tướng Rajaei alin brei Harak meyaom. Sa-ai daok hu Tỉnh Đoàn - Hội LHTN Việt Nam tỉnh Lâm Đồng  meyaom lac Dam dara naih gheih ngak tui panuac Wa saong Doanh nhân ranaih umo padang mbang ngui naih joi thun 2020./.

Urang lang: Jasi - 10/5/2021