Pandap panda hu angan OCOP hu yaih khan pak di nyaom drak pasa 

Biar harei 28/12, di Hà Nội, UB Bangsa peih bruk taom mbaok kapul anek saih, SV, dam dara bangsa takik naih gheih thun 2020. Ini lac sa dalam dom asal kadha di bruk pok meyaom anek saih,SV, dam dara bangsa takik naih gheih thun 2020. Abih tih anek saih, SV, dam dara bangsa takik naih gheih hu pok meyaom thun ini lac 145 urang di 50 bangsa mai meng 47 tỉnh, ban dalam taneh ia, dalam nan hu 10 anek saih lac anek kamuan dom bangsa takik hu biak takik menuac bac dalam sang bac phổ thông bangsa gam bac gam daok pakacah hu tame Đại học.Bruk pok meyaom hu papar binguk tapak angaok VTC saong VOV di Rayo sap ndom Việt Nam mon 8 melam ini (29/12).

Padang ngak "danak dak yaok xã sa pandap" (OCOP), tal tuk vak ni, UBND tỉnh Bình Thuận hu brei angan 30 pandap OCOP mek hu chuẩn 3 patuk saong 26 pandap OCOP mek hu chuẩn 4 patuk.Dom pandap ni hu UBND tỉnh brei harak chứng nhận, hu tauk tem brei angann “OCOP Bình Thuận” tui tanut patuk vak di angaok kadung.Bruk brei caik tanut pandap OCOP hu kein laba dalam 3 thun.Danak dak rik tame bruk cak rok patagok kinh tế bhum puk palei, paglaong kein laba di pandap, paglaong raidiuk saong jien mek tame di bhap bini.

Mesup ini (29/12), UBND tỉnh Đồng Tháp brei thau, urang kumei daok di palei Hòa Khánh, xã Vĩnh Thới, huyện Lai Vung nao sruh radaih haong urang ruak 1440 tapa dut iek mboh dương tính mbang 1 haong Covid-19. Urang ruak daok hu brei daok karei di sang iek ruak Đa khoa Sa Đéc, prein yava hu tani tanat. Tapa duah thau, urang kumei nan hu taom gaok haong 4 urang dalam sang. Urak ini 3 labik pataom brei daok pa-atah di gauk dalam tỉnh hu caga blaoh dom janih piah patrun patakik di abih bruk njom mbak tuk mboh hu jit ruak.

Mban pato tacei pacang caga jit Covid-19 dua tỉnh: An Giang saong Sóc Trăng daok samar drak pasang iek, pacang cakak dom urang taom gaok jaik haong urang ruak 1440. Tapa duah thau mboh lac 1 urang peih radaih daok di An Giang lac F1 saong 15 urang F2 di urang peih radaih ni, hu ba nao daok karei pataom gauk saong daok mek mẫu dut iek. Daok di Sóc Trăng, Sở Y tế hu ba tabiak angan di 12 urang taom gaok jaik haong urang peih radaih (F2). Kayua jalan nao mai  di urang peih radaih biak kan kandah nan ye 2 tinh, ban ni daok samar drak peih bruk pacang caga jit, dom huyện daok patagok tanut sangka glaong di abih, karieh pabah mbang dom labik bo urang peih radaih hu nao tal.

UBND tỉnh Đồng Nai hu padang kapul rilo gah piah pasang iek, langyah bruk Cty CP đầu tư LDG padang ngak suan hukum 488 baoh sang di labik Tân Thịnh, xã Đồi 61, huyện Trảng Bom; dalam nan hu 198 biệt thự saong 290 sang tapen gauk. Hu thau, Cty LDG oh ka ngak salah dom adat piah padang ngak sang, oh ka hu adat salih bruk pandar taneh. Danak dak nan jeng oh ka hu harak adat. Dahlau di nan, UBND tỉnh Đồng Nai hu tabiak bruk taong phạt Cty LDG 540 triệu đồng saong bayar veik yaom jien 5,7 tỷ đồng mek tame suan hukum meng danak dak.

Ủy ban Châu Âu brei thau bruk parabha 200 triệu mbang vắc-xin Covid-19, hu ngak tabiak meng công ty Phai-dơ di Mỹ saong công ty Bai-ô-en-tếch di Đức tui kuhria hu ngak salah di bilan 9/2021. EU hu mbaoh tangin tame veik rilo sanya kakei pablei dahlau vắc-xin haong rilo công ty abih tih jaik 2 tỷ mbang vắc-xin, ginup pabak ka yaok rituh triệu bhap bini dalam kapul ngan haong 2 mbang klauk jru tui adat.

Karja Nam Phi bahrau tabiak panuac brei thau bruk pacang cakak veik pakat 3 dalam negar meng harei ini (29/12), piah pacang cakak bruk njom mbak di jit Covid-19 daok rah tabiak khang di taneh ia châu Phi ini. Taong abih bruk hu rilo menuac hu mbaok oh brei peih ngak dalam 14 harei, lingiu di bruk metai lahik min menuac hu mbaok oh rilo jang 50 urang. Rajaei jeng oh brei peih pabei salih pandap menyum hu cồn, dui atah tukvak giới nghiêm meng mon 9 melam tal mon 6 dah page harei hadei. Nam Phi hu labaih 1 triệu menuac njom Covid-19, labaih 27 rabau urang metai.

Urang lambaok di 27 negar dalam Liên minh châu Âu hu njauk gauk pandar sanya pablei salih saong pambuak Liên minh châu Âu-Anh. Bruk ni meda daong peih tabiak samar drak bruk sanya piah pacang klaih klaoh pablei salih di dua gah hadei di melam 31/12.Dalam tuk nan, Quốc hội Anh jeng meda ginum biaai di harei 30/12 piah peih bruk buh phiếu brei tapa sanya Brexit haong Liên minh châu Âu./.

Urang lang: Mousaphuong- Thu Thảo -29/12