Pathau mikva saong taong abih gauk!

Hadei di 3 thun peih ngak, danak dak padang ngak palei pala bahrau  di huyện pulao Phú Quý, tỉnh Bình Thuận hu bhap bini daok pak ini biak njauk hatai, pachreih tui. Bruk tacei pato abih hatai di dom pakat ủy Đảng saong bruk rik daong di taong abih hệ thống chính trị hu daong ka huyện pulao Phú Quý mek hu ralo jak jeng siam mekre dalam bruk ini:

Puac bilan 1, dom mbang angin khang angaok tasik ngak ka bruk nao tal pulao Phú Quý di tuai damuai gaok oh takik kan kandah. Min hadei di labaih 7 tuk, gilai jeng nao tal pabah lamnge. Kadha njauk caik hatai camereip abih di tuai damuai ngan haong pulao tasik ini, lac sambo hijao di dom  phun kayau tapen jalan. Luac thun gaok riyak saong angin, yau nan bo pulao Phú Quý jeng cuk angaok rup drei sa blah ao that hijao. Tatuak drei jang tuk khaol dahlak mboh jalan halei di labik ini jeng hacih sa-at, loh hu hareik tuh pambuk atau haok rah jalan. Amuk Phạm Thị Hoa – thôn Mỹ Khê, xã Tam Thanh, huyện pulao Phú Quý brei thau: Menuk kanjaok ye tagok nao puh jalan. Puh hacih abih, blaoh biar harei hu puh veik. Yaok harei puh dua klau mbang. Tuk hu hala jruh ye nao puh.

Meng tuk hu bruk padang ngak palei pala bahrau, mikva angaok pulao thei jeng chreih chrai iek glang phun hijao, khik ramik hacih sa-at môi trường. Langiu di nan, mikva daok abih hatai pachreih tui bruk padang ngak jalan mbak nao mai dalam palei. Kayua mikva mboh lac, hu rik daong hasit haong Karja ngak jalan bê tông anak sang meng abih dhul mul, gluh baok. Pagap yau jalan bê tông bahrau ngak salah blaoh anak sang ong Nguyễn Huynh di palei Triều Dương, xã Tam Thanh. Ong Huynh lac: Dom jalan di Phú Quý ye dalam nan hu karja daong 80%. Daok veik bhap bani drei 20%. Drei njauk ba tangin tame haong karja padang ngak jalan nao mai dalam palei ka nyu siam, oh daok dom jalan haluk nao mai kan kandah. Nduac radaih tapa, mong nao mong mai, dhul par tagok kan mboh jalan, nan ye njauk pachreih tui.

Meda lac, tuk vak tapa bruk padang ngak palei pala bahrau hu bhap bini biak pachreih tui kayua karja palei peih ngak siam bruk pathau khan saong urang đảng tuk halei jeng ba akaok nao dahlau. Thau hu abih dom kein laba di bruk padang ngak palei pala bahrau, mikva meng chreih chai halar hatian ba tangin tame bruk di xã, di huyện. Nan ye, meng akaok mereip dom pakat ủy Đảng di huyện pulao Phú Quý biak sangka tal bruk jak ba bhap bani tame bruk padang ngak palei pala bahrau. Ong Lê Hồng Lợi – Phaok bí thư thường trực huyện ủy Phú Quý brei thau: Khaol dahlak abih drei tacei pato pathau khan, abih di nyu nan lac dalam hệ thống mặt trận piah ka mikva thau cambaih dom asal kadha, bruk hagait caong khin hu mbaok bhap bani gam haong karja palei padang ngak palei pala bahrau.

Meng hu bruk njauk hatai pachreih tui di bhap bani bo huyện pulao Phú Quý hu biak ralo mbuan lagaih dalam tuk peih ngak danak dak bruk ngak pakat negar ka padang ngak palei pala bahrau. Tapa 3 thun peih ngak, urak ini mbaok meta  di huyện pulao hu salih bahrau mboh di anak meta. Sang danaok praong - siam jang. Taong abih dom baoh sang di bhap bani hu pandar aia taba, jaik abih dom baoh sang hu jaman hacih sa-at. Baoh sang kathaot trun daok takik. Bruk ngak mbang kinh tế di bol bhap hu grap tanat. Jalan mbak, cơ sở hạ tầng hu sangka buh jien tame ngak pabak ka bruk dân sinh kinh tế ka bhap bani angaok pulao kaoh. Meng bruk kham merat di  taong abih urang Đảng, taong abih bhap bani, huyện pulao Phú Quý meda samar ngak hu abih dom tanut chuẩn padang ngak palei pala bahrau dalam thun bahrau ini./.