Kayua yau nan ye, mai palei negar njauk tukvak lac bruk siam di abih piah ka urang ngak hu jalan nao gilac veik Hàn Quốc piah ngak bruk saong oh ngak kan kandah tal quyen loi di dom urang ngak karei, jeng yau angan je, thaot bingu di taneh ia. Kadha vak di urang vak Hà Nam:

Hadei di labaih 9 thun ngak bruk di Hàn Quốc, thun 2020, saai Bùi Văn Hiếu, palei daok di tỉnh Thanh Hóa mai gilac veik taneh ia. Oh mboh duh hatai yau rilo urang ngak karei tuk oh duah hu bruk ngak, meng phun jien, ilamo hu bac magru dalam tuk daok ngak bruk di palei negar Kim Chi, saai Hiếu oh kan piah duah ka drei sa bruk ngak lagaih, haong yaom jien bilan glaong di Công ty pandap mbang di Hàn Quốc, daok di labik ngak kong Tân Bình, ban raya Hồ Chí Minh. Min piah hu yau ini, lac mai meng tari tareng, kham marat bac magru, ngak bruk tuk daok di negar langiu saong hu jalan kuhria caga dahlau ka harei mai veik palei tuk abih tukvak pambuak bruk di urang likei ini.

"Tapa negar langiu, tuk camriep jien bilan hu 1,2 triệu won, hadei di nan tagok hu 2,7 tal 2,8 triệu won. Bruk ngak biak tani tanat. Tuk jaik mai palei negar, brei hu jalan caga ngak cambaih laih, brei pasram ndem mayai sap Hàn biak siam, topic sap negar Hàn 2 pakat 4 hagait nan, ye tuk mai Việt Nam biak mbuan likau tame ngak phiên dịch, khik ramik nhà hàng haong yaom jien bilan biak glaong, lac labaih 20 triệu sa bilan".

Min anak meta mboh lac, hu rilo urang ngak di Việt Nam nduac klaak saong daok gilac suan adat hukum di Hàn Quốc hadei di tuk abih tukvak ngak bruk. Jeng thau lac daok dalam nduac dauk oh mbuan lagaih hagait, tuk ruak kik oh khin nao iek ruak saong huac njauk cap mek, njauk pateok mai palei negar…min kayua duah jien kuhria ka raidiuk, rilo urang ngak jeng menuac ngak bruk suan adat hukum.

Jeng bhian hu tukvak nao ngak bruk di Hàn Quốc labaih 9 thun, saai Trần Văn Tiến, palei daok di huyện Ân Thi, tỉnh Hưng Yên thau cambaih lac, urang ngak Việt Nam di Hàn Quốc yaom lac hu gah negar saabat taong yaom glaong prein ngak bruk, tari taring, naih joi, min bruk ngak dauk, chat bruk di Hàn Quốc oh lac ngak ka urang ngak gaok dom kan kandah, gaok mai hu urang metai lahik di negar langiu, bo bruk praong jang lac pacang veik jalan nao di yaok ratuh urang karei hu hatai caong tapa Hàn Quốc ngak bruk:

"Mai palei negar ye kan duah hu bruk ngak jang, jien mek tame bier, labaih 20 triệu dalam tuk urang ngak gah nan jien bilan hu tuk 40, 50 triệu sa bilan, nan ye dom urang nan meng nduac dauk daok gilac veik biak rilo. Min, dom urang halei nao blaoh ye njauk mai palei negar piah brei jalan ka dom urang daok di palei, jhui ngak kan kandah tal dom urang ini".

Ong Nguyễn Gia Liêm, phó akaok Cục Khik ramik urang ngak negar langiu (Mintri LĐTBXH) brei thau, hadei di rilo thun ba tabiak dom jalan ngak, urak ini dom urang ngak negar Việt Nam abih tukvak harak gar, klaak nduac dauk saong daok gilac veik, ngak bruk suan adat hukum di Hàn Quốc mboh trun, daok di tanut 27 tal 28%. Urak ini, jabat chức năng tuk halei jeng kakei dom tinh, ban patagok dom jalan ngak, jak ba pathau khan piah ka dom urang ngak di bhum palei drei mai veik palei negar njauk tukvak. Bruk mai veik palei negar njauk tukvak oh lac khik siam mekre ka urang ngak saong dom urang ngak karei, bo daok daong ka talei pambuak bruk di Việt Nam haong Hàn Quốc hu tani tanat saong cak rok patagok dalam tukvak anak tal.

" Mintri Lao động Thương binh saong Xã hội hu harak payua tal taong abih tih dom tinh, ban ieu kakei iek praong bruk pambuak gauk di bhum palei haong Hàn Quốc, paglaong bruk pilih ruah urang ngak saong hu jalan piah patakik bruk urang ngak daok veik Hàn Quốc suan adat hukum; pambuak haong gah Hàn Quốc piah ba mbuan lagaih ka urang ngak bruk, khik kajap quyen loi di urang ngak piah ka urang ngak meda ngak njauk tui dom harak pambuak bruk ngak, saong mai veik palei negar njauk tukvak".

Hàn Quốc lac darak pasa taduan urang ngak di Việt Nam dang ka 3 hadei di Nhật Bản saong Đài Loan (Trung Quốc). Urang ngak di Việt Nam tapa Hàn Quốc ngak dom bruk yau ye: ngak pandap, padang ngak sang danaok, ngak nong saong ngak ikan. Mboh lac bruk ngak ka urang ngak Việt Nam di darak pasa ini jeng daok hu dom siam lagaih. Gam haong dom jalan ngak meng kanja, meng jabat chức năng, rilo urang ngak nao ngak bruk di Hàn Quốc mai veik palei negar caong khin saong daok kuhria padang kapul rahra daong bruk hit ngak mbang, daong dom urang nao ngak bruk di Hàn Quốc sanang hatai mai gilac veik palei negar tuk abih tukvak ngak bruk tui harak pambuak bruk./.