Tal urak ini, dalam huyện hu 10 dalam 18 xã, ban sit mek hu chuẩn palei pala bahrau. Dalam tukvak meng ini tal thun 2025, huyện Bắc Bình kham merat hu jang 2 xã mek hu chuẩn palei pala bahrau paglaong. Jasi – Urang vak di rayo sap ndom VN daok di ban raya HCM hu kadha vak ndom ka bruk ini:

Xã Hồng Phong, huyện Bắc Bình lac sa dalam 2 xã daok dalam Chiến khu Lê Hồng Phong (daok iew lac Chiến khu Lê) hu pacang vil val meng dom mbuan cuah. Lac bhum taneh rilo pandiak, takik hajan abih di tỉnh Bình Thuận. Labaih 10 thun dahlau, bhap bani labik ini bhian kurang aia hacih piah pandar dalam bilan pandiak, rai diuk biak kandah kayua taneh riya thu laghu, pala drak gaok rilo cuang kandah. Peih ngak Danak dak pakat negar padang ngak palei pala bahrau meng thun 2011, tal tukvak ini, hadei di labaih 10 thun peih bruk padang ngak palei pala bahrau, mbaok meta palei pala di xã Hồng Phong salih bahrau mboh di anak meta, jalan mbak nao mai siam mekre, hacih sa-at, rai diuk di bhap bani hu paglaong. 

 Urak ini, jien mek tame kuhria rah tapa yaok sa urang dalam xã hu 44 triệu đồng sa thun, tagok dua mbang dut haong thun 2011 tuk oh ka peih bruk padang ngak palei pala bahrau. Dom sang kathaot, jaik kathaot trun samar, urak ini tok daok 17 baoh sang kathaot, 58 baoh sang jaik kathaot. Xã oh daok baoh sang taik tahak. Ong Trần Thanh Bình daok di xã Hồng Phong, huyện Bắc Bình, tỉnh Bình Thuận bui sambai khan lac: "Hu huyện, tỉnh buh jien ngak điện, jalan, sang bac, balai iek ruak saong cak rok samu gauk. Kadha biak karei tra lac aia hacih hu mai tal mikva pak ini, urak ini mikva oh daok kuhria bruk aia hacih piah pandar, thei jeng bui sambai. Dahlau diah, oh hu aia pandar, hu dom baoh sang njauk nao daok di labik karei, urak ini hu aia paje, mikva pak ini kham merat yam tapa kan kandah piah yam tagok ngak mbang, cak rok patagok kinh tế baoh sang".       

Amuk Trần Thị Hoài Xuân, Bí thư Đảng ủy gam lac Akaok UBND xã Hồng Phong, huyện Bắc Bình brei thau, tapa dom bruk ngak hu, bhap bini thau hu quyền, bruk ngak di drei dalam padang ngak palei pala bahrau. 

"Xã Hồng Phong hu Huyện ủy, UBND huyện saong bruk pambuak gauk di dom ngành dalam huyện hu daong ka puk palei. Langiu di nan, pakat ủy, karja palei gul pataom sa hatai haong gauk, gam haong bruk pachreih tui di mikva dalam xã jeng hu rik daong prong dalam bruk ngak siam dom tiêu chí padang ngak palei pala bahrau".

Daok di xã Phan Hiệp, huyện Bắc Bình, tỉnh Bình Thuận mek hu angan palei pala bahrau meng thun 2017, urak ini Phan Hiệp daok kham merat khik kajap bộ tiêu chí palei pala bahrau saong kham merat tal thun 2025 xã meda mek hu angan palei pala bahrau paglaong. Ong Đặng Văn Khánh, Akaok palei Bình Đức, xã Phan Hiệp, huyện Bắc Bình, tỉnh Bình Thuận brei thau: "Urak ini, jalan nao mai dalam palei hu tuh randaih saong bê tông haci hacih, rai diuk di bhap bini hu siam tagok. Palei Bình Đức khaol dahlak hu huyện mek ngak labik pdang ngak palei kiểu mẫu, nan ye mikva dalam palei  chreih chai hu mbaok tame ngak".

Tapa labaih 10 thun peih ngak Danak dak pakat negar padang ngak palei pala bahrau, tal urak ini, huyện Bắc Bình, tỉnh Bình Thuận hu 10 dalam 18 xã, ban sit mek hu chuẩn palei pala bahrau. Cơ sở hạ tầng dalam huyện hu sangka buh jien tame ngak, pasiam paglaong veik samu gauk, rik daong paglaong kein laba bruk ngak mbang pala drak, patagok pren khang di yaok bhum, yaok gah.

 Dahlau di tuk peih ngak palei pala bahrau (dahlau thun 2010), taong abih mblang taneh pala drak di huyện Bắc Bình tok hu jaik 40.000 ha ye hadei di 10 thun padang ngak palei pala bahrau (thun 2021) hu tagok labaih 50.000 ha. Tui nan, sản lượng pandap panda kaya mbang 10 thun tapa tagok jaik 100 ribau tấn. 

Ong Trần Anh Thịnh, akaok Jabat ngak nong saong patagok palei pala huyện Bắc Bình, tỉnh Bình Thuận brei thau: " Meng tukvak 2021-2025, huyện Bắc Bình pamaong tal bruk lac 2 xã mek hu chuẩn palei pala bahrau paglaong nan lac xã Hồng Thái saong xã harat urang Cam Phan Hiệp. Dalam nan, hu 2 palei lac Thái Hòa saong palei Bình Đức di dua xã ini kham merat padang ngak palei kiểu mẫu. Piah ngak hu bruk ba tabiak yau nan, huyện Bắc Bình mboh lac cơ sở hạ tầng di puk palei ini brei hu buh jien tame ngak".

Anak tal, Bắc Bình oh padeih paglaong rai diuk ka bhap bani, tapa dom bruk cak rok patagok kinh tế di dom palei, labik kan kandah, bhum urang bangsa takik, saong brei patagok bruk ngak mbang, pala drak tui jalan cakrok pandap panda pambuak pagam haong bruk pablei pandap./.