Diuk pasang sa-ai Trần Ngọc Vũ daok di palei 10, xã Tâm Thắng daok jar var tabiak puh praong 5 ha di sang drei piah ngak paga ba tame, kaoh klaak rilo phun cà phê, amriak kalu, piah jao mbaok taneh brei ka dom kapul ngak jalan. Sa-ai Trần Ngọc Vũ khan lac, hu pathau khan, jak ba, diuk pasang sa-ai halan hatian brei labaih 11.000 m2 taneh, kaoh klaak 300 phun cà phê, 250 gheng amriak kalu daok paik asar pablei piah ngak jalan. Abih tih yaom taneh haong drap ar tagok tal jaik 2 tỷ đồng:  “Sang hu karja palei mai tal sang jak ba brei taneh ngak jalan. Diuk pasang mboh hu kein laba suai lavik di bruk brei taneh, kayua lac brei taneh bloh, hu jalan nao tapa, mikva nao mai mbuan lagaih, pajeng ba kaya nong jeng mbuan, mbaok meta palei pala hu rio hadah hadai. Mboh hu kein laba yau nan, sang dahlak njauk hatai brei taneh.”

 Sa-ai Lê Anh Tuấn daok di palei 8 hu brei labaih 2.000 m2 taneh haong 50 phun café, 70 gheng amriak kalu. Abih tih yaom taneh saong drap ar angaok nan yaom tagok tal 700 triệu đồng. Sa-ai Lê Anh Tuấn brei thau, lambaok UBND xã langyah brei thau bruk Karja tok buh tabiak ginup jien ngak jalan, daok bruk peih taneh oh hu jien. Kayua yau nan ye, meyah bhap bini oh halan hatian brei taneh, jalan nao mai kan ngak hu. Meng dom kan kandah ini, sang dahlak halan hatian brei taneh piah ngak jalan: “Kapul pathau khan mai jak ba, tacei tabiak brei mboh kein laba di bruk brei taneh ngak jalan saong pahadah mbaok meta ka puk palei, sang drei mboh kein laba biak, nan ye taduan brei. Jalan sang drei dahlau daih sit, gluh baok di bilan hajan, urak ini hu karja buh jien ngak jalan praong piah nao mai, biak uan tabuan. Hu jalan praong nao tapa sang ye khat lahik di anak meta jeng oh hagait, hadei ini duah veik, dahlak haong sang di drei halan hatian brei taneh ngak jalan kayua mboh kein laba ka puk paga”.

Peih ngak sarak di HĐ bhap bini huyện Cư Jút, UB bhap bini huyện hu brei jien ngak jalan vành đai dom xã atah 7,5 km, pambuak dom xã Tâm Thắng, ban sit Ea T’ling saong xã Trúc Sơn. Jalan hu peih tabiak ngak meng bilan 10/2022 saong tui kuhria, kreh thun 2024 hu ngak salah. Dalam sarak di HĐ bhap bini huyện tacei cambaih, kayua kan kandah ka phun jien, UB bhap bini huyện tok brei ginup jien padang ngak, daok bruk peih taneh, brei bruk ka dom xã, ban sit pathau khan, jak ba bhap bini alin hadiah taneh piah ngak.  

Ong Trần Thế Quang - Bí thư Đảng ủy xã Tâm Thắng brei thau, jalan nao tapa xã atah 3,2 km. Tal tukvak ini, hu 57/67 sang taduan brei taneh piah ngak jalan. 65% mbaok taneh hu peih salah bloh, daok 35% tra meda hu peih ngak dalam tukvak anak tal. Abih tih taneh di bhap bini alin hadiah kuhria tabiak yaom jien lac jaik 12 tỷ đồng. Bruk brei taneh, phun kayau, drap ar piah ngak jalan di bhap bini lac bruk halan hatian. Ong Trần Thế Quang lac: “Kol dahlak tacei tabiak brei bhap bini mboh lac tuk hu dom jalan peih bahrau nao tapa, hadei di nan yaom taneh nyu tagok. Sarak di UB bhap bini huyện jeng hu daong bruk pandar taneh daok, tuk mboh lagaih, saong brei nộp dom janih jien phí tuk salih harak chứng nhận quyền pandar taneh. Kadha ini piah plaih bruk bhap bini alin hadiah taneh bloh, oh daok njauk bayar jien phí atau jien je piah ngak veik harak chứng nhận quyền pandar taneh.”

Bruk alin hadiah taneh, phun kayau, njam patam saong drap ar ngak jalan nao mai dalam dom thun tapa oh lac di xã Tâm Thắng, bo daok hu mboh di dom xã, ban sit dalam huyện. Bruk bhap bini halan hatian brei yaok pluh rabau mét vuông taneh yaom yaok pluh tỷ đồng ngak jalan daok rik daong siam ka bruk mek hu angan huyện palei pala bahrau di Cư Jút dalam thun 2025./.