Rilo danak dak jalan mbak, tatua palei, sang ilamo bhap bini, darak palei… hu sangka buh jien tame ngak, daong ka bhum palei di mikva bangsa takik, abih di nyu nan lac mikva Khmer oh padeih hadah hadai. Kadha vak ka bruk salih bahrau mbaok mata di mikva Khmer daok di Sóc Trăng di urang vak Thạch Hồng:

Uan raok Chôl Chnăm Thmây thun ini, sang saai Lưu Minh Ly saong anai Sơn Thị Vương daok di puk Sa Bâu, xã Thuận Hoà bui sambai jang, kayua raidiuk di sang dak harei dak tagok. Dahlau deih, diuk pasang saai Ly saong anai Vương lac sang kan kathaot, oh hu taneh pala drak. Thun blaoh, sang hu huyện daong brei 10 triệu đồng meng danak dak daong salih bruk ngak. Meng kham marat di drei, sang saai urak hu tani tanat jang. Saai Lưu Minh Ly khan lac: " Sang kan kathaot, hu kanja daong ka dahlak salih bruk ngak, daong brei sa mac pruh jru, 1 mac cakak hareik, meng nan bo dahlak hu rilo bruk ngak jang. Sa harei urak ini, jeng duah hu labaih 200 ribau đồng".

Bahrau ini, rahra daok di puk Sa Bâu, xã Thuận Hoà daok uan tabuan tuk jalan bê tông, padang ngak tukvak ka 1, praong 3 mét meteh, atah 1,4km hu ngak haong yaom jien labaih 2 tỷ đồng bahrau hu ba tame pandar daong ka mikva mbuan lagaih dalam bruk nao mai, pajeng ba pandap panda, dom anek saih nao bac hu mbuan jang.

 Tacei tangin tame dom sruh radaih mac daok nduac bingi di angaok jalan bahrau ngak blaoh, ong Thạch Được, akaok Mban ngak bruk mặt trận puk Sa Bâu brei thau, raidiuk di mikva Khmer urak ini hu hadah hadai tagok. Hu jalan bê tông ini, bo kaya nong urak ini hu urang blei tame blei tal labik. Langiu di ngak padai, di puk Sa Bâu ini daok hu bhum pala sa janih phun medar haong mblang taneh praong, nan ye mikva oh daok haduh hatai ka bruk pajeng ba kaya nong hadei di tuk paik, yuak.

" Dahlau deih oh hu jalan, urak ini hu karja palei ngak jalan bê tông ngak brei mbaok meta palei siam makre jang biak rilo. Jalan palei hu peih praong, anek bhik nao bac hu mbuan jang, blaoh kaya nong pablei jeng hu yaom jang. Mikva pak ini bui sambai chreih chrai lo tuk hu karja palei sangka buh jien tame ngak yau nan".

Bruk peih ngak siam dom danak dak bruk ngak negar hu ngak brei salih bahrau siam, rik daong praong tame bruk cak rok kinh tế-xã hội, patruh eih patrun kathaot di rahra, jhul patagok kinh te bhum palei pala di pak ini.

Dalam thun 2022 meng blaoh, abih tih phun jien piah ngak 3 danak dak bruk ngak negar di huyện Châu Thành lac labaih 28 tỷ đồng, dalam nan hu padang ngak palei pala bahrau; patrun kathaot khang kajap saong cak rok patagok kinh tế-xã hội bhum bangsa takik saong bhum ceik. Taphia di nan, huyện daok peih ngak samu gauk, pablak tame dom danak dak yau ye padang ngak cơ sở hạ tầng, parilo jalan ngak mbang duah jien, patagok bruk ngak patrun kathaot, daong patagok bruk ngak mbang, pala drak… Meng hu yau nan, tal urak ini, abih tih 7 xã di huyện jeng mek hu tanut chuan palei pala bahrau; dalam nan hu 1 xã mek hu tanut chuan palei pala bahrau paglaong. Dom baoh sang kan kathaot trun daok labaih 5,2%, dom baoh sang jaik kathaot daok labaih 3,3%. Phó akaok UBND huyện Châu Thành, ong Nguyễn Văn Mỹ ndem lac: "Bruk praong abih tapa danak dak ini, lac drei paglaong hu hatai tự lực, tự cường di mikva. Lac urang bangsa takik, dahlau deih hu dom urang hu hatai pagam pambak tame karja, tapa dom danak dak ini,hu daong ka urang hu hatai kham marat yam tagok dalam raidiuk piah ngak kaya mada ka sang drei saong rik daong ka rahra".

Meng dom danak dak bruk ngak negar, bruk kham marat di abih hệ thống chính trị, bruk ba tangin tame di rahra, tal urak ini, bhum urang Khmer di Sóc Trăng hu salih bahrau mbaok mata. Dom baoh sang taik tahak dahlau deih hu salih tapa dom baoh sang praong, khang kajap, jalan nao mai hu tuh bê tông, mikva hu daong cak rok patagok kinh te baoh sang, yam tagok tabiak truh kan kathaot… Meng hu yau nan, bo mikva uan raok tết Chôl Chnăm Thmây thun ini dalam bui sambai, chreih chrai, trei sil haniem phul./.