Nguyễn Quang – urang vak di rayo sap ndom VN daok di TP.HCM hu kadha vak ndom tal bruk nan:

Tỉnh Long An hu labaih 11.720ha kruac aik, dalam nan daok brei baoh lac 10.000ha. Urak ini kruac aik that saong dom pandap ngak tabiak meng phun kruac aik di Long An meblah labaih 85% sản lượng dalam taneh ia. Rilo janih pandap ngak tabiak meng phun kruac aik hu pok brei angan lac pandap OCOP.

Dom pandap OCOP meng kruac aik dak harei dak hu rilo janih, yau ye: Ia kruac  nha đam ia hani tame pa-op; sara amraik kalu kruac aik; sara amriak kruac aik; kanduh kruac aik bluh thu; hala kruac aik bluh thu; klaih kruac aik bluh thu... Min piah ka pandap OCOP meng kruac aik hu mbaok dalam dom labik pablei lẻ dalam taneh ia daok lac bruk daok atah.

Tui ong Nguyễn Văn Hiển, CEO, Chủ tịch HĐQT Công ty Kruac aik Việt, tukvak tapa, doanh nghiệp, HTX saong dom siêu thị pablei lẻ jeng parabha kein laba samu gauk. Min piah pabak dom tanut piah hu mbaok di labik pablei lac kan, jalan tal hu tangin urang blei saong hu urang takre blei lac oh mbuan:

" Siêu thị tuk halei jeng sangka dahlau tal dom pandap halei daok pablei biak nduac, biak laik. Kayua jien pah labik, pah menuac ngak di urang jeng abih rilo… meyah pandap di drei oh lagaih ye njauk klaak tabiak chip. Caong hu lagaih brei hu truyền thông yaih khan, blaoh pachreih urang blei tui jalan pablei lap gam gam meng pablei nduac, pablei laik pandap hu. Abih di nyu lac dom pandap bahrau, dom pandap meng kan di palei ba tame siêu thị piah hu urang takre saong blei rilo, lac bruk  atah saong kan".    

Duk haong dom tỉnh, ban karei dalam taneh ia, dom pandap OCOP mek hu tanut chuẩn 4-5 patuk di tỉnh Tây Ninh oh rilo. Dalam 68 pandap OCOP hu pok brei angan, hu 1 pandap 5 patuk, 20 pandap 4 patuk… 

 Amuk Trương Thị Thi, urang pan bruk khik ramik Cty TNHH Sản xuất- Dịch vụ- Thương mại Hòa An khan lac, langiu dom janih pandap di tỉnh yau ye: mesin ikan gha kreim, mil sara ameriak, kandiuk Bà Đen, ahar tapei racam, ye Tây Ninh daok hu mbuan lagaih piah ngak tabiak dom janih pandap yau ye tea, alak, ia menyum meng baoh kandiuk, kruac bhung. Hu rilo pandap ginup chuẩn OCOP, min biak kan tame hu dom siêu thị piah pablei:  "Urak ini pandap di palei oh ka tame hu dom siêu thị Co.op… Caong karja tỉnh daong padang rilo jang danak dak pambuak bruk, pablei salih piah ka doanh nghiệp pablei hu pandap, gam haong nan, daong pasiam veik dom bruk daok tavak tavaiy piah ka pandap OCOP di palei hu rilo menuac thau tal jang".

Bruk tavak tavaiy di pandap OCOP di dom tỉnh yau: Long An, Tây Ninh, Đồng Nai…, nan lac daok ngak tui jalan sit sot, oh ka pabak hu ginup pandap, bruk jao pandap saong jalan bayar jien tui hatai caong di dom labik pablei praong... kayua yau nan ye, gah chức năng dom palei daok kham merat pambuak bruk haong dom labik pablei praong dalam taneh ia, piah meng nan ngak jeng jalan ba pandap tal tangin urang blei hu siam jang.

Tui Sở Công thương tỉnh Long An, tỉnh daok kham merat ba pandap OCOP di mikva nao tal dom siêu thị praong... Pandap jeng hu dom siêu thị di urang Việt daok di negar langiu blei, abih di nyu lac dom pandap meng kan. Meng nan, daong ka mikva thau hu bruk blei pandar bahrau piah pasiam chất lượng, mekre meta…... pabak hatai caong di darak pasar.

Ong Lê Anh Tuấn, Yam ndok Sở Công thương tỉnh Tây Ninh brei thau, gam haong jhul khang, pambuak bruk pablei pandap di dom labik pablei praong, abih di nyu lac di dom sieu thi Co.opmart di Saigon Corp, Tây Ninh jeng daok hu daong dom labik ngak pasiam pandap: "Gah ngak pandap dak harei dak pabak hu bruk ba tabiak di dom labik pablei salih, abih di nyu lac labik pablei salih tui jalan bahrau yau ye Saigon Corp. Gah siêu thị jeng hu pabak pandap tani tanat piah meng nan dua gah jeng hu cakrok… dalam bruk ngak di karja, dom sở, ngành meda hu panuac daong ka UB dom tỉnh, blaoh tapa Quốc hội jeng meda pok panuac likau  Trung ương patabiak sarak lagaih piah daong ka bruk ngak nong patagok, abih di nyu lac gah ngak pandap di bhap bini dom puk palei"       

Gam haong jhul khang pambuak bruk pablei pandap, meng bruk daong di dom siêu thị dalam taneh ia, ye bruk yam takai nao gam di dom labik pablei lẻ jeng yau urang blei salih lac urang Việt daok di negar langiu, daok ngak jeng prein khang ka pandap meng kan dak harei dak siam jang, yam atah saong cakrok patagok khang kajap ./.