Amuk Phương Tú Dung, sa urang daok di xã Phước Tỉnh, huyện Long Điền, tỉnh Bà Rịa- Vũng Tàu brei thau lac, rilo thun dahlau, jalan tapen tasik ĐT 994- labik meng tatua Cửa Lấp tal canah klau Lò Vôi tuk halei jeng lac labik sarau kadau oh salamat ka bruk nao mai, mbaok jalan khut, rilo mbaih mbaoh saong bhian dauk ia. Hadei di tuk ngak pasiam, peih praong saong brei ka radaih nduac di thun ini, jalan praong saong hacih, bahrau, hu jeng jalan hu tuai du lịch biak takre: "Jalan tapen tasik ini meng tuk ngak pasiam veik lac biak mekre, siam. Rahra, tuai damuai nao mai mbuan lagaih, mikva nao ngak mbang, pablei salih jeng hu yau hatai caong."

Taphia di bruk ngak pasiam dom jalan tỉnh, rilo jalan pambuak dom puk palei, pambuak dom xã oh padeih hu buh jien tame ngak. Ong Huỳnh Văn Tươi, sa urang daok di jalan ka 14, xã Phước Hưng khan lac, 20 thun dahlau, jalan ini biak sit, nao mai biak kan kandah. Urak ini hu tuh nhựa, mbaok jalan praong 6m, mbuan lagaih ka rahra nao mai: "Jalan mbak urak ini hijao, hacih, mikva kol dahlak biak thau dhar phol kanja padang ngak ka kol dahlak. Ngak jeng jalan gheih makre ini ye drei haong mikva pak ini kham marat khik ka jalan ini pandar hu suai lavik, hijao mekre".

Tal urak ini, mbaok mata Long Điền hu hadah hadai tagok. Rilo danak dak hu ngak salah, ba tame pandar, ba jalan khang kajap ka bruk cak rok patagok, ba Long Điền meng huyện kan kandah, urak ini yam tagok khang kadang. Meng hu yau nan bo thun 2019 huyện Long Điền hu Thủ tướng Rajaei pok brei angan lac huyen mek hu tanut chuan palei pala bahrau, tal thun ini jeng lac huyện palei pala bahrau paglaong.

Tui ong Phan Thạch, Akaok UBND, Phó Bí thư Đảng uỷ xã Phước Tỉnh, jalan mbak nao mai lac sa bruk ngak hu makna praong, kayua yau nan ye bruk pathau khan jak ba, daong ka rahra thau saong njauk gauk pachraih tui dalam bruk panduan ba nao daok di labik karei, halain hatain alin taneh lac bruk ngak biak hu makna, ba tal bruk cak rok patagok: "Dalam dom thun tapa, hu bruk sangka di tỉnh huyện hu buh jien tame ka Phước Tỉnh biak rilo danak dak jalan mbak puk palei. Tapa peih ngak, rahra biak uan tabuan tuk hu dom danak dak ini, pabak hu hatai caong nao mai jang yau mbaok mata biak hadah hadai ka bhum palei."

UBND huyện Long Điền brei thau lac, piah hu jalan mbak padang ngak samu gauk dalam tuk kadung jien kanja hu takik, huyện hu caga bruk pato tacei, daong ba meng dom pakat, dom gah meng Trung ương tal tỉnh; caga dahlau dalam bruk brei thau dom angan dom danak dak bruk ngak praong, dak padang rami ramik tui bruk brei ngak dahlau dalam padang ngak jang yau jalan piah padang ngak. 

Long Điền lac huyen tapen tasik gah maraong di tỉnh Bà Rịa - Vũng Tàu, hu dom jalan hu makna praong, yau ye Jalan roya 55 pambuak ban Bà Rịa haong dom tỉnh Bình Thuận, Lâm Đồng. Meng labik dang praong yau nan, huyện Long Điền daok pambuak haong ban Bà Rịa saong ban Vũng Tàu peih ngak dom danak dak jalan mbak pambuak bhum, pambuak palei yau jalan pambuak tame jalan nduac samar Biên Hoà - Vũng Tàu, jalan tỉnh 994 pambuak haong Bình Thuận saong dom tinh, ban tapen tasik gah kreih negar. Tapa nan, ngak jeng sa jalan pambuak dom labik, dom cụm ngak kong, pabah lamnge haong dom labik đô thị, du lịch padeih padai tapen tasik, oh lac daong jhul kinh tế - xã hội pak ini cak rok patagok bo daok rik daong praong ka abih bhum kinh te praong di gah maraong negar./.