Dalam nan, njauk ndom tal bruk raong tapai pablei ralaow di sang sa-ai Đặng Văn Khanh daok di palei Bình Minh, xã Phan Hoà, huyện Bắc Bình. Bruk raong tapai ralaow hu daong ka sang hu jien mek tame tani tanat. Kadha vak di Jasi – Urang vak di rayo sap ndom Viet Nam daok di  TP.HCM hu ndom ka bruk ini:

Dahlau diah, yau dom sang ngak nong karei, sang sa-ai  Đặng Văn Khanh (bhian iew lac Cường đô) tok pataom tame dom sào hamu saong bruk jhik pet. Yaom lac biak tari tarieng min kinh tế sang sa-ai biak kan kandah. Hadei di sa tukvak duah thau darak pasar saong duah thau tapa tapuk siphau, mạng xã hội, sa-ai mboh bruk raong tapai New Zealand takik phun jien, mbuan raong, bo ba mai kein laba glaong jang biak ralo mbang dut haong dom janih athur raong karei. Tapai lac janih caik menek samar drah, ralaow pahe, bingi, bổ dưỡng, hu rilo menuac takre mbang, darak pasar tapai ralaow jeng biak tani tanat. Nan ye, bilan 8-2022, sang sa-ai khang hatai padang mbang angui meng bruk raong tapai New Zealand.

Thau cambaih ilamu kỹ thuật, jalan raong glang, sang sa-ai padang ngak van ro raong tapai dalam labik hacih sa-at, laneng lanoi. Tui sa-ai Khanh, anek tapai nyu mẫn cảm haong môi trường, nan ye taong abih pandap mbang, aia menyum njauk khik ka nyu hacih sa-at, tapai mbang pandap mbang thô saong njam patam that hijao, piah pabak ginup dinh dưỡng ka tapai drah prong, takik ruak, ralaow catang, anek pajaih khang kadang.

 Meng 30 drei tapai pajaih tuk akaok mereip tal harei ini sang sa-ai hu labaih 400 drei tapai. Langiu di bruk raong tapai New Zealand, sang sa-ai daok raong pabak tapai xám, pajaih tapai meng kan. Tapai pajaih hadei di 5 tal 6 bilan raong ye caih menek, kuhria rah tapa yaok thun  caih menek 5 – 6 mbang, yaok mbang meng 7-10 drei. Tapai raloaw hu yaom pablei meng 80-90 ribau đồng/kg. Tapai pajaih hu yaom meng 140 ribau  đồng/drei. Urak ini, darak pasar labik pablei di sang sa-ai hu tani tanat, labik pablei tapai rilo meng lac pabak brei ka darak pasar dalam saong langiu huyện yau: Phan Thiết, Phan Rang,…Yaok bilan sa-ai duah hu labaih pluh triệu đồng.  

 Meng jak jeng dalam bruk raong tapai, sa-ai hu tacei ilamu kỹ thuật ka rilo mikva dalam palei saong dom labik jaik taphia mai rivang iek, bac megru. Rilo urang hadei di tuk rivang iek, bac megru jeng hu blei tapai pajaih meng ini mai raong saong hu jak jeng tuk akaok mereip.

 Sa-ai Bá Anh Thư, urang dalam Kapul urang ngak nong xã Phan Hoà brei thau: mikva pak ini dahlau daih tok thau raong limo, pabe, menuk, ada, bruk raong tapai di sa-ai Khanh lac akaok mereip abih di Phan Hoà, huyện Bắc Bình ini.

Daok sa-ai Tạ Thị Thu, Akaok Kapul urang ngak nong xã Phan Hoà, huyện Bắc Bình, tỉnh Bình Thuận brei thau: " Sang sa-ai Khanh dahlau diah ngak padai aia min kein laba oh hu hadom, nan ye sa-ai salih tapa raong tapai, pala la-u angaok mblang taneh ngak padai oh hu kein laba. Bruk raong tapai hu brei ka sang sa-ai hu jien mek tame tani tanat. Ini lac jalan ngak mbang bahrau di mikva urang Cam labik ini. Dom hội viên karei jeng hu mai ini rivang iek bac megru jalan ngak ini, hadei di ini meda brei pambak prong bruk ngak ini di puk palei".

 Bình Thuận urak ini hu biak rilo bruk raong tapai ba jien tame glaong, min ngan haong urang Cam ye ini lac bruk ngak mbang bahrau. Meyah hu phun jien sa-ai Khanh meda peih prong van ro.  

 Bruk raong tapai oh kan, van ro jeng mbuan ngak, jien buh tame takik min ba mai kein laba kinh tế glaong. Bruk raong tapai di sa-ai Đặng Văn Khanh hu peih tabiak jalan nao bahrau dalam bruk raong glang ka bhap bani dalam xã hu jien mek tame, ba bruk ngak mbang di palei pala./.